美股好多股票都爆升，去到呢啲位，大家可能一方面又會覺得個市仲有可能大升，但另一方面又怕風險高，而呢個情況，做Long Call就係最好嘅選擇。
Long Call 控制風險嘅最好方法，係「細注高槓桿」。就算博唔贏，細注玩，最多都係輸所付出嘅期權金。但假如贏到，由於槓桿高，回報都會好厲害。
揀選Long Call，要槓桿高，有三個要點。第一，到期日唔好太遠，可以揀大概一個月以後。第二，引伸波幅要喺40%以下，愈低愈好。第三，要揀價外少少嘅Call，行使價大概揀高過現價5%至8%，就差唔多。
Long Call 係一個難贏嘅策略，唔會有必勝嘅方法，所以輸錢係大家一定會經歷嘅事。但點解都要玩Long Call，係因為輸，最多都係輸100%，但贏的話，可以贏1000%，甚至更多。
唔好訓身去玩，太大注玩，如果你嘅心理狀態carry 唔到，反而因為你唔敢坐上去，仲贏唔到大錢。開始嘅時候，可以細細注玩先，然後贏到錢，就連本帶利搬倉上去，以「過關」嘅形式賺大錢。
昨晚美股，有啲雞犬𣅜升嘅感覺，如果呢種市況持續，其實只要係揀啲偏向強勢嘅股票，就有機會大賺。反而，更難嘅係，你會唔會有嗰種決斷力入市去博。
記住，Long Call 係一種有限風險嘅方法，只要跟足方法，計好注碼，係唔會輸得死人。特別係如果大家之前都係賺到唔錯嘅回報的話，我認為，大家更唔應該有太多顧慮。符合以上所講嘅條件，再加你覺得隻股票有機會有升的話，就放膽入市啦。
最後，賺大錢，真係要講運。Good Luck。