近月嘅市，絕對係走緊一個強者愈強，弱者愈弱嘅格局。一啲強勢ETF，升到無頂，一直升唔停，但一啲弱勢ETF，就仲要跌。如果你係揀得啱ETF嚟買，呢兩三個月，你應該係可以賺到相當唔錯嘅回報。但若然你係走去買啲弱勢ETF，唔單止無錢賺，仲可能要輸錢。
上星期，同大家講過不要沾手嘅FXI，就係一個好好嘅例子。
呢隻ETF，基本上係投資港股，但大會睇到，其實佢嘅股價由11月頭開始就已經無再升，上週叫大家唔好掂，然後喺過去一個星期，佢嘅股價就跌咗落嚟。當其他ETF一跌上升，人哋有錢賺，但你卻買錯ETF要輸錢，呢種感覺當然都唔係咁好受。繼續，好似FXI 呢類嘅ETF，都係要避開。
至於QQQ，有重新起步向上嘅跡象，我會留意，等佢升好少少就會買，不過唔係依家。
咁有啲咩ETF值得買？其實都係嗰啲，好多我相信大家都已經買咗，今日跟進吓。
先係ARKK。基本上，佢由3月以來，股價就係咁升，我知有好多朋友都買咗，我畀大家嘅建議就係要繼續持有。只要佢繼續維持住呢種大漲小回嘅格局，就唔好咁易放手，咁樣，大家先可以喺佢嘅身上賺到最好嘅回報。惟此ETF止蝕位距離現價相當遠，暫時未係買入時機。
至於大家問5隻ARK ETF，買邊隻好。最大路，係ARKK，無特別喜好，就買呢隻。另外4隻，我覺得有2隻比較好，分別係ARKG 同ARKW。
ARKG，好處係5隻ETF入面升得最勁，唔好處係佢嘅升勢都比較反覆，即是說，佢不時會撞中止蝕位後先再抽上。
當然，有止蝕位都要守。如果股價跌穿$90.60，我都建議要暫時離場，等有升勢再買。呢樣嘢，有時候係要取捨。一啲升勢最勁嘅ETF，往往股價走勢都會比較反覆，會有啲難玩，至於係咪揀呢隻ETF，大家可以自己選擇。
ARKW，相對會穩定好多，由3月起，就一直維持住上升趨勢，止蝕位係$136.12，現價可買，唔跌穿就可以繼續揸。
最後，仲有唔少走勢仍然強勁嘅ETF，以下一次過畀哂啲Ticker 大家，TAN、SMH、ICLN、SOCL、IBUY。
至於其餘美股情況，近日係有啲轉強跡象，如能維持，下星期我可能會加注，之後再講。