【漁民系列】漁利投資日記 Day 16

11月16日周一。今日市勢唔錯，好多股票創52周新高，最令漁利有所感悟的係，好多創新高股份都熟口熟面，例如金蝶（268）、中國軟件（354）、江銅（358）、敏實（425）、嘉里物流（636）、龍湖（960）、海爾電器（1169）、叻叻漁友捉到但小弟miss咗的五礦資源（1208）、海豐（1308）、中國宏橋（1378）、贛鋒鋰業（1772）、海天（1882）、敏華（1999）、安踏（2020）、紫金（2899）、阜博（3738）等等等等。咁代表咩？就係漁夫系統已幫手篩選晒強股出來，所以小弟睇來睇去都是一堆強股，就算買唔中爆升股，但買弱股的機會大幅下降（睇唔到又點會買呢？小弟冇跟系統自作主張買的阿里（9988）除外），起碼都減少咗輸錢機會，淨係咁已經值回票價！

今日其中一個亮眼的行業，係金屬與採礦，當頭起7隻金屬股，除了天工（826），其餘升幅介乎5.39%至11.16%。小弟都估唔到上周五細細注long call江銅，一個交易日就派彩，有得同各位一早賺得盤滿缽滿的師兄師姐大大聲。隻江銅call最高差唔多係小弟買入價的10倍，小弟梗係冇咁叻沽到高位，今日分兩次減持咗四分三，平均都有6倍，起碼攞番個本兼部份利潤，立於不敗之地先。至於剩番的四分一價值都仲高過小弟的買入價值，反正已經負成本，即管睇下有冇得放紙鳶。

風中勁草，運輸行業今日都係升多跌少，最勁梗係有韓資基金收購的神州租車（699），收3.76元，同收購價4元只差6.3%，之後應會隨收購消息波動，博私有化又係另一門學問，有專人利用這些機會搵食，但小弟才疏學淺，實在唔識。小弟仲記得當初見佢出訊號，仍是滿腦子問號，但11月2日出訊號至今，半個月升咗44.62%，唉！好彩嘉里物流都創新高，唔失禮啫。

至於早前表現強勁的地產，今日集體偏軟，其中幾隻的能量齊齊減一至兩格，可能回吐？有隻今日才出訊號的奇葩建發國際（1908）股價破頂，小弟並無研究，要做下功課先。

有漁友搵到超人系股份集體轉強，真係見微知著，小弟不得不讚一句「有（耐）心有（毅）力」。其中長江1號可能值得關注，11月6日突破兼大成交，剛脫離成交密集區，150天線及200天線都逢關破關，尚餘250天線在57.8元水平。不過如果要博，小弟唔會用期權，因為我覺得以超人同大少的穩健性格，長江1號應該好細機會爆升，long期權可能時間值都輸埋。

至於其他行業，軟硬件大部分升，紡織品同家庭耐用品表現都唔差，汽車則個別發展。

有個板塊，風中勁草唔算多，冇普升現象，強股無咩，就係綜合金融服務。唓，咁有咩好睇？係架，個板塊無咩好留意，奇就奇在內地券商股隻隻死狗之際，有隻廣發証券（1776）喺10月出咗突破，過咗近一個月股價仍升7.81%，距離52周高位僅5.51%，有奇葩feel，而且月頭至今幾棍大成交陽燭，近日回落成交縮，有啲似VCP pattern，小弟決定今次買股不買市，趁今日細成交，在11.28元細細注博下。

今日寫住咁多先。

============

了解更多：股市漁夫系統 免費試用

股市漁夫是一套高績效的選股系統，系統運用技術分析配合統計學製作出不同指標顯示短、中、長線的港股表現；較一般指數更能反映真實市況，對分析後市走勢有絕對的優勢。股市漁夫選股系統透過精密的方程式去找出股票強弱勢頭，全天侯自動分析個股走勢、突破股、大市評論及視頻等功能。莊博士獨家的運算方程用 「破勢」、「止賺」把機會向用戶展示。漁夫選股系統更有不同種類之篩選股票準則來提高勝算。

 

莊志雄博士為股市漁夫創辦人及香港大學專業進修學院客席講師，並在Now 財經台合作主持《名家給力場》。
股市漁夫是香港財經媒體，而股市漁夫選股系統由莊志雄博士及成家博客Homeblogger團隊共同研發，2018年 11 月11日正式推出，此前莊志雄博士曾任職《信報》研究部主管，並先後於和記黃埔、AXA安盛、永泰地產有限公司、永道管理顧問有限公司（Coopers & Lybrand）等不同類型企業及上市集團擔任管理顧問、財務及市場分析工作，涉及範疇包括資產管理、地產、電訊及電子商貿等。