歡迎大家加入新開設「美股研究報告」會員專用 Facebook 群組
https://www.facebook.com/groups/386563215606501/
=============
前日文章，還寫Trump 有機會贏得大選，但現在看來，Biden 獲勝，已無懸念。不過，對於我哋嘅投資部署，又有咩影響呢？
先係講一吓整體美股嘅表現。
自上月13號起，美股走勢都係偏弱，原因，我認為係大家都睇唔通後市。大戶，最唔鍾意嘅就係所謂嘅不確定性。向好、向淡，都無所謂。向好，可以買股票；向淡，可以鋤低個市，用衍生工具賺錢，再喺低位獲利。但如果個市係受到好多不確定嘅因素影響，會引致突發嘅大升、大跌，呢樣就係佢哋最難應付嘅嘢。
而星期三美股指數期貨嘅表現，某程度上可以印證到呢樣嘢。香港早上時間，Trump 明顯帶先，指數上升。其後Trump 優勢減少，指數升幅收窄。到Biden突然取得壓倒性優勢，指數又係上升。即係話，邊個贏，唔係最重要。最重要，係唔好再拖泥帶水，要有結果。
但當然，Biden 選到，同Trump 選到，對股市嘅影響會有啲唔同。
Biden 選到，有兩個板塊，有重大利好反應。第一，係太陽能股，大家應該都會熟識，最簡單嘅選擇就係投資ETF，Ticker 係TAN，止蝕位為$64.48。
第二，係中概股，惟短期BABA 除外。
BABA 係自身問題，唔關Biden 事。但其餘中資股，特別係有電子商貿 (E-commerce) 成份嘅股票，表現都相當唔錯。以ETF 計，EMQQ值得留意，止蝕位為$50.11。
鍾意玩期權嘅，就以FXI 或EEM 更佳。後者，申報，我有期權好倉。
AAPL，昨晚後期表現終於有所改善，鍾意嘅朋友，可睇住$107.32，唔跌穿可以繼續睇好。MSFT 都勁，處理方法一樣，止蝕位$199.62。咁當然，XLK都係好選擇，止蝕位$109.57。
網購股好強勢，唔想煩，繼續可以睇實IBUY，止蝕位稍遠，為$82.00。
之前提過嘅雲端會計服務公司BlackLine (Ticker: BL)，走勢好強，止蝕位稍遠，為$89.98。已持有嘅就繼續揸，未有貨暫時只宜小注，整固再上，上樓梯後可再買。
但有少少嘢想提醒大家。
嚟緊個市，真係唔好逆順而行。雖然我個人認為，美股牛市尚未完結嘅機會較高，但實在我都唔敢講實。牛轉熊，最傷嘅會係撈底買底嘅人，相反，升就揸貨，跌會肯走的話，就算真係轉入熊市，起碼都唔會咁易輸大錢。
至於其他美股板塊嘅動向，可能到下星期會更加清晰。星期一再講。