課程編號：CC002
================================
疫情可能有第二波，但股市唔會再破底
港交所上市20年，冇脫離基本因素
美匯指數好圖兩張
版務—呢篇之後仲有兩篇專欄
疫情可能有第二波，但股市唔會再破底
去到6月下半月，亦差不多半年結，本專欄都差不多會暫別。今年投資表現如何？照計，都應該係輸錢嘅。如果你有錢贏，就已經醒過絶大多數人，因為絶大多數股市指數，今年都係跌嘅。咁你咁叻3月前沽然後3月尾撈到底，或者一路係渣住科技股冇震走，就抵你發。
呢排大市幾明顯進入整固期，好明顯的，你見埃汾冇乜嘢好寫就知。升又升唔到跌又跌唔落咁。但當然都係偏向睇好，除咗凡事（盲目？）樂觀外，你見啲走勢，都係跌完升返，多過高開低收。
另外想講，話擔心疫情第二波，係有道理嘅—畢竟第一波搞到股市咁大鑊。但我暫時唔係太擔心—唔係唔擔心疫情，係股市。首先，正如公司同事講，人係有學習能力嘅，啲鬼之前口罩又唔戴，明顯係過份鬆懈，到死得多人先開始驚。
但同股票又一樣，人性總係開頭就太樂觀，之後又忽然大悲觀。我依然認為，股市大跌，亦都係因為恐慌情緒（而唔係死咗人）。當然仲有經濟停頓亦係一個問題。
咁就帶到去我想講嘅嘢：就算有第二波疫情，似乎都唔會再好似之前咁封晒城。正如我講，人係會學習嘅，我相信嚟緊嘅情況，你會見到好似而家韓國之類咁，繼續有個案，但只要唔大規模失控，就唔會再返返以前咁嚴控。
講到尾亦只係經濟同人命嘅取捨。當然一開頭咁講定必畀人鬧死。而的確即使比較右翼嘅媒體，都話呢個取捨係偽命題，唔嚴控疫情，根本經濟都一樣會受累。
咁以第一波嚟睇，似乎都係。但，代價呢？樓上嘅圖幾有趣。瑞典亦被人認為係「佛系抗疫」，而亦見到死亡率似乎高過週邊嘅國家。但又不過，又見到對經濟打擊真係細好多喎。
你見美國嗰邊，基本上講到明唔會再封城。當然，如果疫情真係失控，亦唔到佢地堅持原則。如果反口嘅，咁就自己睇路了，應該股市會跌返。但重申一次，唔會返返去之前嘅低位。
港交所上市20年，冇脫離實體經濟
港交所上市20年，咁你見到，20年升咗80倍，仲要其實當中派息幾好。事後諗返，真係冇理由唔買。20年前估香港20年後嘅今日仲係金融獨大，唔會太難估。而港交所係獨市生意，其實冇理由唔買。
但今次唔再重覆講咩如果買咗就發達之類。反而想講嘅係，有冇諗過，點解可以升到咁多倍？係因為乜？
並唔只係因為佢係獨市生意。你可以諗下，大陸銀行夠受保護，亦都壟斷，但不見得股價就表現好好。舊文都寫過（https://bit.ly/3coA1fw），新加坡交易所一樣獨市生意，但近十年股價係原地踏步的，港交所近十年都至少升到一個開（但同頭十年比當然爭得遠）
股價點解升？好簡單，就係盈利。真的。又要講「脫離基本因素」嘅，又可以諗下。港交所20年嘅純利，升咗成10倍。咁你可以話，喂，純利「只係」升10倍，但股價升80倍，仲唔係「脫離基本因素」？
問題係，只係睇你個時間拎邊一段。港交所一上升就勁升。如果我用2002年開始睇，又有啲唔同（點解2002年？因為我篇舊文比較港交所星交所倫交所，而倫交所要2002年先上市）。
請睇，2002-2010，港交所股價升10倍，純利亦差不多係咁上下的。同樣到2010-2020，亦係咁上下，純利一個開，股價亦一個開。
「脫離基本因素」？其實係因為，上市個價定得太平。不過，「官股」好似一定係咁。唔記得係東尼定彼得林治都教過，呢啲政府IPO，一定要買。原因好簡單，佢地必定係定得平。官員又冇得分，平賣資產冇所謂，最緊要啲機構投資者賺到錢，大眾又賺到錢，唔好一上市就勁插畀人鬧。你見領匯（823）又好，地鐵（66）又好，中銀香港（2388，唔完全係官股啦），都係咁情況。
美匯指數好圖兩張
Facebook Page寫過幾篇文講美匯指數，其實有部份在呢度已寫過。有興趣嘅可以去慢慢睇返，總共係有四篇的。
呢度又係乜東東？又另外畀圖你睇。見到，美匯指數，同恒指，真係有一個幾強嘅反向關係。特別係上面呢個圖，2001-2010年。2001年你見恒指極弱，科網爆破，美金強勢，恒指跌。2002年開始其實美金已不停跌，但你見2002年港股仲要跌，03年先見底（所以唔係包生仔嘅一定反方向關係，邊有咁著數）。打後咁多年，好簡單，美匯指數一路跌跌跌，恒指一路升升升—直到2008年，雷曼爆煲。估都估到，咁大鑊，梗係股市狂跌美金狂升。然後聯儲局救市，09年大逆轉，美金狂跌，股票狂升。之後？睇下一個圖
之後10年，關係好似冇咁明顯，主要係因為恒指都牛皮咗好耐，亦有話印銀紙改變咗好多定律，唔知。但，例如2011同2015年嘅大跌，都見到美金強。去到近兩三年更加明顯，2017嘅恒指大升，又係美金大跌。2018年完全就掉轉。今年都見到係咁。
版務—呢篇之後仲有兩篇專欄
好多人都問，到底呢個專欄到6月22日後會點。其實係好事，證明唔少讀者都鍾意睇，否則有得佢自然死亡就得，使乜問我。
暫時可以答嘅係，收費專欄應該會繼續，亦都應該唔會大加價，但有可能轉另一個平台。
另外，我同homeblogger之後會有另一啲嘅合作，好快會宣佈。
所以都係，如果想知道最新情況嘅，可以Facebook PM我，或者email我：ivankirsten@gmail，或者whatsapp我: 9809 8494。話我知你想再收到，咁我可以第一時間通知你。