歡迎大家加入新開設「美股研究報告」會員專用 Facebook 群組
https://www.facebook.com/groups/386563215606501/
=========附件==========
=========附件==========
今個星期,我建議會先出入防守模式。
其實呢一刻,對於後市,我仲未係睇得好通。但係,明顯地,投資嘅風險已經增加。
點解我咁講?
或者有啲朋友都會聽過我講,美股第一日跌市,我自己唔係咁擔心,因為過去其實有好多次,美股跌完好快就無事,然後啲強勢股仲要喺好短時間內就再次升破頂。
但如果出現以下嘅一種形態 – 大跌、反彈企唔穩、再跌穿底,咁情況就完全唔一樣,後市將有機會再有更深調整,跌穿位嘅股票,當然我會毫不猶豫地止賺、止蝕,就算係未跌穿位嘅股票,我都有可能會先行迴避,待市況回穩後再買。
有啲股票,我會建議要先走。
LULU 嘅下跌,除咗係受累於大市跌勢之外,亦同佢嘅業績遜於預期有關。好多時候,一啲因業績欠佳再下跌嘅股票,都未必能夠咁快回復早前嘅升勢,再加上佢嘅股價走勢已明顯脫離早前嘅上升通道,所以有貨嘅朋友,可以考慮沽貨走人。
但無論如何,有買呢隻股票嘅朋友,應該都賺得好開心。
另外,亦有一啲明顯走勢轉差嘅股票,例如係MA。
我鍾意買入一啲升勢平穩向上嘅股票,其中一個原因係,呢啲股票一旦走勢有變,我哋就會好快察覺到覺得到。有時,如果某啲股票嘅止賺、止蝕位距離好遠,我哋都未必咁容易睇到佢哋嘅走勢出現變化。但如果係呢啲升勢平穩嘅股票,我哋就會好快知道。
MA,如果有貨,我都會建議先走。
但有無一啲股票,仍然係表現強勢?
都有,不過數目減少咗。而其中一隻,係ADBE。
ADBE嘅走勢,仍跟隨著4月初開始嘅上升通道,一路上升。上星期五,股價仲有一段時間,係曾經造出過歷史新高,只係尾市未能夠企穩於高位而矣,但股價走勢明顯係優於大市。
對於呢隻股票,有貨嘅話,可以繼續持有,只要繼續睇住通道同止蝕位就可以。而未有貨,如果他日市況回穩,而隻股仲仍然可以維持住上升勢頭,咁之後就可以入市。
最後,我會好留意啲指數ETF嘅走勢,特別係早前走勢最強嘅納指。
以上係納指ETF QQQ嘅走勢圖。截至上星期五,股價都仍然仲企於上升通道當中。一日兩日跌穿唔緊要,但我會睇到星期尾,如果QQQ嘅走勢係明顯跌落通道以下,咁我對後市嘅睇法就會更差。
執筆之時,美股期貨繼續下跌,但過去亦試過到美股開市不久後跌幅就收窄,甚至回升,對於後市嘅走勢,我仲要多少少時間去觀察。但有啲咩特別發展,我會喺Facebook 群組update大家。
另外,有問題都可以電郵至 [email protected] 畀我。星期三再講。