課程編號：CC002
================================
美股急回，唔算意外，唔使恐慌
睇拆息就知港股企得硬
聯儲局未年兩年半都唔加息，銀行股冇運行
版務：專欄何去何從？
美股急回，唔算意外
唔係話馬後炮，事實我冇好明確咁講。但美股星期四晚急回1900點，真係有蹟可尋。貴就固然貴，但其實美股過去N咁多年都冇平過。反而我係留意到一啲其他嘅指標：首先係見到，上圖，睇RSI。Facebook Page出咗篇文都有講，埃汾唔多信技術分析，但亦唔係完全唔睇。RSI係其中一個幾好嘅指標。其實同講VIX差不多，RSI咁升法，急回係遲早嘅事。
另外，見到美股有好多散戶入市，仲要買好多細價股，或者啲破產嘅公司就當炒。Tesla升到過千銀都算，升到大過Toyota都算，話晒都賣到車，但有間叫Nikola （連個名都抄Tesla）嘅，一個仙收入都未有，都炒到癲。就真係股災先兆，真係「脫離實體經濟」。
當然你好難估到，點解星期二唔跌星期三唔跌，星期四先借聯儲局出經濟預測急跌。原本唔擔心經濟，忽然聯儲局話差你又覺得好差？全世界得聯儲局先知經濟好定唔好？都係借勢啫。但點避免中招？答案係，避唔到的。點解道指兩萬五唔跌兩萬六唔跌要兩萬七先跌？唯一方法，就係好老套嗰句，分段入市咯。
睇拆息就知港股企得硬
但另一方面，你見港股又企得相當硬喎。原本以為美股跌1900點，香港點都千幾甚至更多？結果冇喎。其中一個原因係，睇美股期貨，今晚（星期五）美股已經會強勁反彈。但其實埃汾朝早已經大約估到。
點解？我唔係勁到知道道指咁快反彈，但估到最多只係一個大啲嘅調整（拿，講緊兩三千點呀下），但唔會話咩下試3月低位。因為見到市場唔係恐慌拋售。
你話，跌1900點都唔恐慌？咁就要睇另一啲嘢啦。你見銀行拆息，就見到。星期五朝早嘅港元拆息，繼續跌，一個月拆息連跌11日。
咁你話，關股市乜事？正路係唔係好關事。但，如果係極恐慌時期，例如3月中嗰次跌浪咁，你見拆息係不停扯上去，代表係大家驚系統性風險，銀行出問題。同樣地，國安法消息出嘅一日（5月29日），一樣見到拆息抽升。
就係睇呢啲嘢，去判斷到底個市場只係獲利回吐（哪怕係好急，1900點嘅獲利盤），定真係恐慌。
又學到嘢啦大家。
聯儲局未年兩年半都唔加息，銀行股冇運行
Facebook Page 講過，呢度亦不再重覆。有興趣可以睇返聯儲局自己嘅projections。但我想講，對投資市場嘅啟示。
你話，唔係喎，議息會議之後照跌，到星期四晚直頭大跌。市場覺得聯儲局咁鬆手，即係對經濟冇信心喎。係，跌市你咪咁演繹咯，但我都係嗰句，你睇幾長先？唔好話去到第三季，我保證去到下星期，已經唔會有人講聯儲局睇淡經濟呢樣嘢，反正又唔係得佢地會睇好睇淡。
重要嘅，反而係未來兩年半都唔加息。當然，要改隨時可以医，但你睇上一個週期，講足幾多年先加到息？所以你話未來一兩年唔加息，我估都幾穩陣。
咁，正面嘅，首先當然係地產股，同樓價。固然低息唔代表必升，只係其中一個因素，甚至未心係最重要嘅因為。但，至少你唔使再去擔心咩加息供樓負擔重咗之類。
任何派到一定息嘅股票，理論上都受惠。傳統啲公用股之類。問題係，其實既然講公用股，長期收息，咁你息口應該同長債比，唔係聯儲局嘅聯邦基金利率（即係你成日講加息減息嗰個息，係短息嚟的）。咁而長債息，一早跌晒落嚟，冇因為今次呢樣嘢好大郁到。
而幾大打擊嘅，會係銀行股。十分簡單，息差一路都收窄，嚟緊幾年，美資港資銀行都冇乜運行。除咗等賣盤嘅東亞（23）大新（2356）之類。你買匯控（5）恒生（11）中銀（2388）收息嘅，我勸你諗其他公用股算了。
版務
好多人都問，到底呢個專欄到6月22日後會點。其實係好事，證明唔少讀者都鍾意睇，否則有得佢自然死亡就得，使乜問我。
暫時可以答嘅係，收費專欄應該會繼續，亦都應該唔會大加價，但有可能轉另一個平台。
另外，我同homeblogger之後會有另一啲嘅合作，好快會宣佈。
所以都係，如果想知道最新情況嘅，可以Facebook PM我，或者email我：ivankirsten@gmail，或者whatsapp我:98098494。話我知你想再收到，咁我可以第一時間通知你。