課程編號：CC002
================================
大市無力，續炒落後股
美國就業數據遠超預期，但真的嗎？
標普指數50日升四成，史上最強
金管局繼續接錢接到手軟
今日主力講大市同外圍，星期三會講多啲個股
大市無力，續炒落後股
先講今日（星期一）大市，唔知算唔算馬後炮，但在美股星期五晚大升千點（陣間會再講）後，已經覺得個市差不多。特別係見到星期五港股沽空比率跌到1年低位。之前啲專欄都寫過，逆向指標嘛，沽空低你先驚，因為要夾嘅都夾晒。果然今日個市係冇力嘅。
睇啲升跌板塊，亦都幾難睇。你見龍頭嘅ATMX，全部冇晒力。反而係啲本地消費股，莎莎大家樂大快活之類就跑出。類似情況上星期五都見到。似乎繼續短期都係睇落後股。另外數碼通同亞洲金融其實唔關事，但呢度提過，順便貼埋。
美國就業數據遠超預期，但真的嗎？
上星期五晚美股急升，原因明顯係因為就業報告數字極強。原本預非農就業減少830萬人，結果係增加250萬！差大共地，當然夾到笑。
我在Facebook Page 上寫過，不再重覆。但都建議大家去睇多次。冇錯，後來話個數出錯，其實失業率冇咁低。都幾亂嚟。不過話其實趨勢不變，四月原本應該仲高一大截，咁所以五月雖然應該要高啲，但都係大改善。
市場信唔信服呢個解釋？唔知。但我覺得呢個點都或多或少影響到今日（星期一）港股嘅升幅。原本以為美股會回，港股會跑贏，但見到呢刻（星期一黃昏）好似美股期貨仲升緊。
無論如何，Facebook Page篇文都係要睇的，對你思考有幫助。
標普指數50日升四成，史上最強
再之前Facebook Page 寫咗兩篇文，第一篇其實係上兩期收費專欄（星期三）提過嘅嘢，港股收復國安法跌幅，唔再呢度重覆講。第二篇呢度冇寫過，睇上面個圖，美股標普指數過去50日嘅表現，係史上最好。更重要嘅係，歷史見到，打後6個月或12個月，再升機會極大。
點解仲要叫大家睇Facebook 兩篇文？因為看似離題，但我分享咗好多我嘅世界觀。你亦都發現其實我對好多網上嘅評論相當鄙視，特別係啲日日話爆煲嘅人。事實係點？
事實亦係，呢個專欄，正係3月股災下出現的，當時仲有人覺得我燈添，叫人買股票啲人鬧我添。結果又如何？
正面啲睇，你可以睇返，恒指又好，美股又好，一樣照升不誤。並唔會不停咁只係日日講：嘩香港國安法呀日日跌兩千。嘩美股失業率高呀又死人呀GDP倒退呀示威呀。嘩等疫情過去先買。嘩等平啲先買。
世界唔係咁運作的。等平啲先買？3月咪就係「平啲」。近乎史上最急最勁嘅調整。但跌落嚟一樣係唔敢買，係咪？
而呢度我甚至都未計上星期五美股升1000點添。
金管局繼續接錢接到手軟
不用多講啦？事實係港紙一直貼近7.75強方。坊間啲乜乜陰謀論，根本就係腦殘。銀行體系結餘升破1000億添！
但，恥笑完，就講返，其實我多次講，咁樣唔代表大市會升。銀行體系結餘跌，唔代表股市會跌，反之亦然。並唔係因為資金流入你就要睇好股市。
亦都有人話，近期港紙強只係因為IPO。有些少道理，始終時間上吻合，亦都解得通。但我係有啲懷疑。今次兩隻IPO，其實集資額唔算太大，京東同網都講緊不過係每隻集200億港紙。固然反應幾好，所以凍結金額遠超集資額。但印象中之前有更大嘅招股，好似冇見港紙特強？
另一證據係，見到啲拆息，都冇乜點夾上。港紙強真係因為招股？定係因為港美息差？我估係後者居多。應該到京東都招完股就見到。