科技股抖氣，落後股發力
港紙好強
金管局接錢接到手軟
中銀航空租賃又升
大劉冇事嘛？
是日好圖
科技股抖氣，落後股發力
其實我今日想講嘅，好多好多。恒指升400點都唔係最重點，港匯升到爆都未係重點。
但講咗大圖畫先，睇上面個表，恒指最強，同最弱。見唔見到有乜特別？
先睇升幅，最勁嘅分別係，恒生（11），九倉（1997），太古（19），同埋新世界（17）。而貢獻點數最大嘅，係匯控（5），貢獻81點。
好啦，騰訊（700）呢？要跌喎。你話管理層減持。真係只係因為咁？咁你可以睇下，炒到甩碌嘅美團（3690），一樣大跌。
本欄自面世以來，差不多日日叫你買科技股。事實亦唔係咩好獨特嘅分析，一街都係咁講。美股FAAMG升到唔識停，Nasdaq 100 甚至創新高。港股呢，騰訊（700）係今年表現最好成份股之一
但呢幾日，開始逆轉。美股港股都係。你見啲「舊經濟股」開始接力，Facebook Amazon 創新高後都回軟，冇再一直上。原因不明，有人堅持話升到咩新世界呢啲就開到荼蘼，藍燈籠，派對就完。唔可以話冇道理，但我覺得係估值。科技股點勁點勁，無數咁多人寫過，我都寫過。但總有個價。呢個亦係股票最難嘅地方。2000蚊嘅Amazon你買，咁4000蚊值唔值？40000蚊呢？總有個價的。但唔係咁易話到你知邊個位先真係太貴
去到某個位，啲友就諗，喂，不如睇啲傳統股份啦。反正經濟第三四季會反彈，而呢啲公司又唔會死嘅。
呢個「舊經濟股」接力嘅現象，早一兩星期美股已見，而家港股都見。我暫時未敢講話已經係新趨勢，但大家可以密切留意。講過啦，到樣樣嘢都certain你先買，到蘋果日報（冇惡意）都講「舊經濟股」回歸，就可能要小心啲了。
港紙好強
同樣地，我好懷疑，其實啲講港紙爆煲論嘅人，係咪活在另一個時空的。
我甚至唔使同你拗過辯證過程。只係睇結果。出國安法嗰日（5月22），係呀，港匯「急跌」30點呀，7.7558，巧驚。然後呢？日日都相當強，今日直頭升穿埋強方保證！強到不得了。港紙點貶值呢請問？你去沽空你身家就貶值啦
金管局接錢接到手軟
接到手軟就略為誇張咗啲，但冇呃你，真係接錢。請睇。我唔呃人
因為港紙太強，觸及強方保證，所以金管局就沽港紙買美金。朝早9.8億，日頭再有38.8億。銀行體系結餘下星期一會去到996億 – 就快去到1000億。年頭講緊係676億，升咗50%咁滯。咁你話資金走，定流入？
而我今日見過最好笑嘅講法，話「金管局都唔要港紙，大難臨頭」。就唔知畀乜反應好了。即係如果港紙弱嘅，就係走資。如果港紙強金管局要沽港紙出嚟嘅，就係金管局走資。
諗諗下都啱，其實每一單交易，都有人買有人賣，咁總有一個人係走資喎。好似係。
無論如何，建議你睇啲友評論前，睇下佢到底識唔識匯繫匯率。唔識嘅，就可以唔使理佢。至於點知一條友係咪識嘢？就睇你功力了。但你訂得呢個專欄，已經畀其他人知多好多。
BTW，預之後拆息又會再跌，特別係網易同京東招股完成後。
中銀航空租賃又升
呢隻中銀航空租賃（2588），亦係埃汾在專欄寫過幾次嘅個股。其實唔係咁多，你見一般我都係叫你買大藍籌，一係就啲好悶嘅，等私有化呀，咩亞洲金融（662）之類。點解好少寫啲偏門啲嘅股？因為實在唔易，又港股又美股，你見都用咗我唔少時間。咁我呢啲負責任嘅，又總唔會就咁望住個圖叫你「現價32蚊你30蚊買40蚊目標價25蚊止蝕」。
2588今日升乜？我都唔知。同時間見到嘅新聞，當然係中國釋出善意，放返美國航班入中國。美國其實都對中國做同樣嘅嘢，唔知會唔會都解除，但已經夠令兩地嘅航空股炒上。唔止中資，就連美資，同埋國泰都係咁。
係咯，咁既然航空公司頂得住，就唔會拖累到飛機租賃公司吧。留意，2588之前一樣係有升有跌，之前個客債務重組，要收股份代債務添。去到6月又大反彈了
大劉冇事嘛？
今日好多落後股，價值股，新經濟股都跑出。本地地產股，最神經就係呢隻，升6成。咩事？
華置好快出咗嚟講，劉生好健康。真係呢。不過其實今日見咁升，好多人（包括我）都係咁估。
但會唔會無情情升6成？我就唔多信啦。私有化？賣盤？走人（大劉之前逃犯條例都講過下嘢）？分身家？睇下呢幾日有冇新消息。
其實香港大把呢啲股票。問題係，你有冇咁嘅耐性。
是日好圖
本人原創。可以諗下，呢四隻股票有乜共通點。有機會在Facebook Page開估。