續講國安法後港股
港交所受惠中美交惡
群眾智慧，就係冇乜智慧。
版務：貿易戰乜股跑出？反送中乜股跑出？
續講國安法後港股
好似話有人幾詫異，本人居然講國安法。一般都係唔講政治，亦都唔鍾意講，好多時亦冇需要講。但更重要嘅係，讀者是對的，你地關心乜我就寫乜。加上呢份唔係公開嘅東西，寫乜都唔怕（所以唔好周圍傳畀人）
好啦，周末一過，唔見咩歐美有乜好大反應。固然口頭上有啲人係幾強硬，但真係走出嚟嘅嘢未有。不過反正人地放緊假，可能都未有咁快討論，始終唔係第三次世界大戰，唔使周末開會。
唯一比較值得睇嘅，係英國好似講到會畀香港人居留權，定做難民，之類。有幾大機會，會畀幾多人，乜嘢形式，當然我有我估計，但無謂強加在讀者身上（真係想知可以PM我），大家自己去估。但如果真係有不少人走嘅，咁可能啲樓市之類又再計過數啦喎。雖然，我幾懷疑有幾多人真係會賣樓走去。
今日見港股明顯係中資股反彈，但香港股，特別係銀行地產就弱。市場睇乜，就都幾清楚了。
至於講指數，今日好似跌定。但正如上文所講，都未見歐美會有乜反擊措施（或者最後冇）。咁現水平嘅指數，其實點都稱唔上好吸引。固然我唔係乜都諗到「最壞情況」嘅核爆朋友。但純憑直覺感覺，星期五嗰1350點，似乎未反映晒潛在嘅風險吧？純粹主觀，但而家唔太值搏。
港交所受惠中美交惡
都唔止寫過一次，中美交惡，似乎真係有利港交所（388），今日升夠6%。一隻貢獻咗恒指60點升幅。其實見到AMX又會入恒指（騰訊一早入咗），科技股成份多咗，照計令恒指更加吸引。另外，Nasdaq提高門檻，基本上就係針對中資公司。同時間瑞幸亦都話要除牌。之前都寫過，呢啲事情，變相對港交所有利。而應該都係同一原因，本身在美國上市嘅京東，同埋網易，都打算返嚟香港上。所以你見今年港交所股價，遠遠跑贏恒指。不過我就認為去到呢刻差不多了，首先嗰堆中概股回歸，頂多係京東網易百度，其他都係細公司，對成交幫助唔太大。另外如果中美關係真係急劇惡化，港交所照計都好難獨善其身。
群眾智慧，就係冇乜智慧。
非常簡單，Ramp Capital 在3月24日，在twitter做嘅poll．都成萬幾人，而且follow得呢個戶口嘅，應該唔係混吉花生友。未必好醒，但應該係有接觸開投資資訊嘅人。問題好簡單，問昨日（3月23日），係咪大市見底？八成人都話唔係。
咁你估到，結果就係見底。當然你可以話而家先5月，有機會跌到500點嘅，隨你。
但想講嘅係，投資者永遠受短期情緒影響。升嗰時覺得可以不停升，三萬點就估四萬，五萬點就估十萬。跌嗰時又以為不停咁跌。當時美股大跌大家就只係諗會死幾多人，等於上星期五港股大跌大家就以為世界末日。
版務：貿易戰乜股跑出？反送中乜股跑出？
其實上星期五專欄貼過，但篇幅所限只係貼咗圖。我週末有在自己Facebook Page詳細講返，請睇呢度，同呢度。加埋今日啲股票走勢，結論好似都係買中資內需股最好？