事先張揚 20200522 — 國安法港股急跌後點算

本日內容

國安法,港股

上次政治市乜嘢跑出?

版務

國安法,港股

雖則本人唔多鍾意講政治,講咗又未必大家啱聽,況且我唔多鍾意只係聚焦一兩日嘅郁動。但無可避免地,今日(星期五)講乜,啲人都係問返去國安法。

市況當然慘烈,大家都知埃汾唔係啲跌三百點又話股災嘅人。但今日(星期五)呢1350點嘅跌幅(記住,計百份點,5.6%),5年最大。史上都係1% event,一百日都冇一次,50隻藍籌全數跌

留意下「贏家」(即係跌得冇咁多)同「輸家」。其實「贏家」幾正路,你見中資股相對地係跌得少啲,雖然我其實唔係好明香港國安法關中移動乜事。跌得最少係美國業務多嘅創科(669)

不過留意返一樣嘢,人民幣今日(星期五)都急跌,原因不明。呢個亦係點解中資股都跌得幾勁(但都冇香港股咁勁)嘅原因。國企指數都跌4.3%

重災區,係香港地產股。咁似乎係驚舊年社運之類嘅嘢重臨?或者樓價會急跌之類?

 

你問我,我覺得似乎係過度反應。但由21000點左右反彈上嚟,都升咗近4000點,遇到不明朗因素,即時走人,幾合理。

 

而家仲未見到美國會有乜「激烈反應」,但我傾向認為,今年21000個低位,應該唔會再穿。又睇下點?

 

至於樓市云云,我都係嗰個睇法。樓市跌,其實好多人樂見,甚至香港政府大陸政府都樂見。會唔會失控?大把法寶。直接講句,拎走晒啲咩印花稅呀首罝呀之類,大陸佬唔仆到嚟買?

 

有人話,香港變到同大陸一樣,咁大陸佬仲使嚟?但,冷靜諗下,即使在最壞嘅情況,香港都仲未係變到「同大陸一樣」。可能個溢價消失緊。可能你認為香港以前係80分,大陸以前係20分。後來香港退步到50分—你覺得好差,但上面仲有一大堆生活在20分嘅人。就算我當大陸進步咗去到30分(應該好多人唔同意),都仲係爭一截。

 

上次政治市乜嘢跑出?

月頭嗰時驚貿易戰2.0,咁我地專欄有寫過,當時貿易戰1.0,係乜股跑出。當時係計2018年3月22號,至到2018年年尾。就係下面兩張圖

當時寫過:跑出就係啲本地公用股,同埋中資非出口股。好合邏輯,因為唔做外地生意,唔受你關稅影響。香港就係領展(823),中電(2),煤氣(3)之類。大陸就中移動(941),中電信(728)之類。全部都算係有啲息派下(除咗煤氣較差),公用股,防守性高。唔好忘記而家美國基本上係零息。不過最勁嘅,係粵海投資(270)

 

同時,下面兩個圖,就講埋由2018年3月22號,至到2020年1月16日,乜嘢股票跑出跑輸。點解係2020年1月16日?因為中美貿易協議。有人問,我就呢度貼

好啦,但你睇今日(星期五)嘅恒指成份股走勢,似乎似係擔心香港局勢,多過中美關係惡化2.0。咁我地即管睇下,舊年社運時個小跌浪,有乜股跑出,乜股跑輸

 

不過當中有少少難度。舊年(2019)恒指其實5月高位開始跌,跌到5月尾反彈,然後6月開始爆出社運,7月又急跌到8月中嘅低位先定。都有啲難計邊段先係。簡單起見,我預備晒兩個情況,四張圖。5至7月,5至8月,恒指國指。自己睇圖。週末我可能會在Facebook 解多幾句

版務

循例講返,我其實會耐唔耐上去Homeblogger嘅Page回文,大家有問題可以留言。但我見近幾篇冇乜人留言,唔知係讀者少咗睇文定點。記住我係有睇留言,會回的,當然未必係即日。

 

當然其實都講過,歡迎直接PM我。最初都諗會唔會公開電話(98098494)同email ([email protected])唔多好,但結果證明呢度啲讀者係高質嘅,問啲問題都幾有建設性,甚至觸發到我寫啲好文。呢個係我一路想做到嘅效果。

 

另外,其實都冇人話我知,5月1日同5月6日,「亞馬遜個圖令你十分痛心」個圖,出咗兩次,我都唔記得。不過今日我再在Facebook 貼過,又有啲新諗法。大家可以再睇。但我嘅承諾當然係呢度嘅讀者優先,至少過一兩日先會貼上Facebook Page —但正係因為咁所以有時貼過都唔記得。會慢慢研究點樣有系統啲。

使用諗Sir獨家按揭進階計算機,Powerteam成交實例請到:https://buyhouse.com.hk

wtsapp icon top