ATMX入恒指攻略
移卡IPO
中銀航空租賃逆市跌
平安好醫生又有北水追
3個月拆息 連跌25日！
Best thing I read today
ATMX入恒指攻略
星期一同大家講過初步，而家可以再深入睇。首先見到，市場明顯係炒呢堆嘢入恒指。由上星期五到而家（星期三），呢四隻嘢明顯跑贏大市。仲要見到新入嘅三隻（AMX）係跑贏原本已經係成份股嘅騰訊。
上次有講，因為仲要計流通市值之類，咁留返畀大行分析員計。你見到AMX三隻都應該會入恒指，但佔幾多都有不同估法。暫時用住高盛嘅估法，比較方便。留意返，呢三隻嘢有可能同時入埋國企指數。
我最想講係最尾嘅column。其實點計？就係睇返有幾多錢係追縱恒指同國企指數（例如盈富基金，同部份強積金指數基金，恒指公司會有呢啲數），例如恒指大約係1450億港紙，咁你阿里巴巴，新加入佔5%，咪會有1450 * 5 % ＝ 72.5億資金追入。咁點解個表寫101.8億？因為仲有國企指數
但，如果真係炒，炒邊隻？唔只係睇有幾多資金流入。仲要睇埋，隻嘢本身成交幾多嘛。唔計數都估到，同樣係101.8億，但美團成交冇阿里咁多，所以對美團影響大啲。
計出嚟，就係以上呢個表。計到啲被動資金買盤，等於平時幾多日嘅成交。而被動資金好多時係最尾一日先飛入去，所以到時有機會短炒下。再睇。見到，影響最大係美團。其實平時睇啲指數變動都係咁玩法。
移卡IPO
其實好似好少講新股，畢菲特都教你唔好抽新股，當然我抽過好多（以前），賺過啲亦輸過唔少。新股嘅嘢，可惡在呢，任佢玩，定價上下限極闊，上下限爭三四成都有 — 你諗下牛市熊市都係講緊兩成咋喎。隻嘢一蚊我覺得抵買，唔代表個四我覺得抵買嘛！但你抽嗰時根本唔知會點定。任佢玩
不過可愛在，新股呢啲嘢呢，就真係唔使點分析。好多分析都係嘥氣，齋炒sentiment．我覺得而家係好時機，剛剛開始啲氣氛熱返啲，新股有錢賺—但又未去到人人借盡孖展你抽唔到而家價又太狠嘅地步。而家剛好。
隻移卡，我估抽得過。當然輸咗錢唔好鬧我。純講sentiment，招股書我望都冇望過。但有騰訊兩隻字，夠照了，呢排都係當炒呢啲嘢。
中銀航空租賃逆市跌
都跟進下先，隻2588今日逆市跌3%，走勢都難睇。睇返原來有單新聞，香港唔多覺有報。故事係講Norwegian Air Shuttle 債務重組，明顯係爭2588錢，但而家債變股。你可以當原本啲爭落嘅錢就找唔到數了。講緊8億美金債？2588應該佔13%，即係1億美金左右。如果當完全輸晒（當然實際唔會），都甘甘地，但食得起—公司嘅book value 46億美金咁滯。有啲影響，但唔會好大件事。睇下嚟緊幾日有冇新消息。
平安好醫生又有北水追
亦係跟進返，之前叫過大家小心啲，可以take 啲profit．結果話咁快股價就反彈，見到其實好多北水買緊，但去到呢啲位我就麻麻地了。
3個月拆息 連跌25日！
好一排冇寫，又再寫下拆息。如題亦如圖，3個月拆息係連跌25日嘅。其實之前寫過幾次，美國減息後LIBOR低息過香港，港紙偏強，掂到強方保證7.75，最後就有套息活動，金管局又會接錢。結果銀行體系多咗唔少錢，簡單供求，多咗錢，利息自然平。
其實都幾顯著，你見到3個月拆息，由差不多2厘，跌到1厘。你問我的話，其實仲有大把下跌空間，可以跌到0.5厘，甚至去到接近0。
Best thing I read today
同大家分享下，就係呢個。十分簡單，好多公司搞埋一大堆嘢，又開會又派代表研究點令啲員工快樂啲。根本答案就十分顯然—就係唔好開呢啲無聊會。但，人在江湖，就柏木由紀。希望大家早日達成財務自由。共勉之。