【 莫家強 】恒指繼續睇31712點

美股弱勢,但港股都可以有呢個表現,我認為絕對交到功課。暫時,恒指我仍會繼續睇向上回補裂口,目標31712點。至於往後點做,到時睇盤路再決定。   另外,昨晚上堂,有朋友問港股成交低而大升,係咩原因?我既理解係,兩個字─「默契」。如果唔係淡友讓路,無人沽貨,根本就無可能咁少成交升咁多點。但我哋都要諗,咁樣做,後著係咩?   但無論如何,市況回穩咗,只要唔係高追股票,將來就算真係大戶喺高位散貨,大市轉向,我哋仍會有好大機會賺住錢走。識得用埋期權,一直收住時間值,贏面更高。   風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【潘家榮】有耐性同時要有遠見

前日抽升,尋日又跌,到今日又升返晒上黎,如果睇得太過緊,太著重短線波幅,就好容易俾個市chok死。投資唔同去賭場賭搏,賭場就話你今舖買完大,到下一舖你又估佢開乜而去買,舖舖清,但係投資者如果都係咁樣做,其實唔係做緊投資,佢地只不過係賭緊佢地眼光,贏唔贏到錢都唔太重要,最重要係有得過吓手癮,估中左有成功感,所以好多散戶明明喺股市炒左咁多年都係輸錢,但係仍然繼續炒,就係呢個原因,佢地買股票唔係真係為左賺錢架。如果你真係想學賺錢,而唔係為左貪過癮既,咁你就要接受投資係一件好悶既一件事,有乜野好過你揸住隻股王,而佢又係咁升,令你副身家不斷有增長?但係當你已經揸住左最好既野,你唯一可以做既野就係等,大部份時間都係無乜野好做,就算最靚既股票,都唔會一日就升晒俾你嘛,所以大家需要既係耐性。 有耐性,同時亦都要有遠見,睇既野唔係睇今日跌輸幾多,聽日升又賺幾多,而係要睇晒成個大picture,諗點樣可以坐大浪之餘,賺到最多既錢,同時間又可以確保到自己安全。要安全,首先就唔好十上十落,覺得升就瞓身買,覺得跌就清晒啲貨佢,咁樣不斷估升跌,到頭來同去賭場賭大細無分別。要知道呢個世界無一個方法,可以確定到個市一定係會跟你希望既方向去行,當你瞓左身落去,會唔會果次就錯左呢?所以,我做既野,從來都會考慮睇啱會點,睇錯會點,再按返市場既發展再逐步調整倉位,你見我點都唔會企錯大方向就係咁解,所以我寧願逐步去加貨,贏左錢先繼續加,就算買完個市跌左,都唔會有太大心理壓力,總之如果個市有個大升浪,我就一定可以買齊晒貨又坐到啦,如果係跌,我實一定越縮越無貨,避開大跌浪啦。 呢一刻揸住五成多貨,我覺得好comfortable,雖然最近見到有啲股已經好返晒,可以買得,但係我都係等埋下個星期,出埋新既好淡分界線先啦。 好彩尋日無減868,今日升4%。 記住,喺投資市場上面,你能唔能夠賺錢,能唔能夠成功,心態重要過技巧、分析,其實做人都係。 筆者為證監會持牌人,其全權委託帳戶的客戶持有信義玻璃(868)

Read more

【Jack Sir 操作日誌0223】細倉怡情

連續四日港股日升日跌,而且高低波幅都不少,相信不少人都眼花撩亂,模不清方向。 A股昨天開盤,升幅與預期相若,港股前天卻已經偷步並有些「炒過龍」味道,加上前晚美股高開低收,指數昨天幾乎跌回前日升幅,而且剛好4點收市時是美指期貨全日最低位置,使得昨天港股接近收在全日最低,但昨晚美股倒升高收,峰迴路轉,加上今早A股再上,港股今日自然高開高走。 走勢反覆, 暫時可以升破20或跌破50天線來作好淡警戒線。尤其時下方的50天線,再失守必然是美股急跌才會造成。 外圍市況難測,小賭怡情策略應對。 個別股份方面,騰訊連續3日,收市不是全日最高就是全日最低,昨天Na指跑輸,壓制今日騰訊表現,目前持有少量500 short call 3月。 匯控除淨後偏軟在80元之下,回測去年4次除淨後走勢均弱,持有淡倉。 友邦本以為會步匯控步伐,先炒上業績後再跌,這是根據去年一次業績前後的走勢而部署,但前天只炒升一日,大行昨天提前唱淡,好倉只好減半,今日也未有明顯強弱表現。 中移動是自72.85回升當日,難得出陽燭才開始持續部署好倉,這星期已經分段平部分保本,繼續持好倉,今早見可能又玩陰燭,止賺位提高至74元。 中人壽連日似升還回,「不懂爆升的股票」,仍然受魔咒纏繞,前日開始建立少量好倉,憧憬有破咒機會,止蝕位在23.1。 1號長和,嚴重跑輸指數,今日稍微有好表現,不大跟隨大市方向的股份更容易部署,今日若能收市前在99.50之上,可能會建立好倉。 地產板塊一路未有太明顯走勢,新世界今日AO低位上10日高,有轉身好倉。 恆地同樣情況,下午若貼頂行的話,也會轉身追些好倉。 新地是最早走勢較佳的板塊股份,但此股經常整數關受壓,目前無倉。 舜宇人追我沽,昨天AO全日高,有建立了少量short call 等位保本,升穿昨天高位止蝕。 內銀走勢不錯,應該會繼續上落市,持有中行 short put ,建行short strangle 等時間值平倉。   [frameid=2]

Read more

中年投資部署 #1527

諗Sir 您好,睇咗好多你嘅文章,獲益良多。 本人亦為收息101 TEDV48 的學生, 也報讀了收息101 TEDP36, 很期待再上課跟你學野。 理財目標:希望每個月多加現金收入, 在五年內不用上班, 在家照顧小孩。 上左收息101堂,運用課堂上知識, 於1月初買了兩隻債基金 1) E餐 2) Emerging Markets Debt 基金 (諗Sir, 你對這個基金有什麼意見? LTV跟 E餐一樣。 各買   HKD100萬槓桿一倍, 預期年收益 11%  (融資成本 H+1%) 即2000000*11% / 12, 每個月收HKD18300。 家庭情況如下: 本身有一自住物業,只有我個人名,市值港幣1130萬,按揭欠HKD400 萬。 老公有一澳洲房產 市值約AUD1.2 Million ,按揭欠AUD250,000 (給家人住, 沒有租金收入) 本人 38歲 入息:每月HKD60,000(沒有計花紅在內) 老公 38歲 入息:每月HKD100,500 (沒有計花紅在內) 每月固定可儲蓄 HKD60,000有一幾個月大小孩,不確定往後需要每月花多少     有現金 […]

Read more

【聶Sir】恆生銀行之基本面分析及目標價預測

踏入2月下旬,又到不少藍籌股公佈去年全年業績的時期,截至2月23日,已發表全年業績的有金沙中國 (1928)、匯豐銀行 (0005)、恆生銀行 (0011) 和東亞銀行 (0023),下周一還有中電控股 (0002),以及下周二有友邦保險 (1299),並有新鴻基地產 (0016) 和新世界發展 (0017) 公佈2017/18年度中期業績。而在已公佈全年業績的四隻股份,於2017年分別升幅為19.73%、28.43%、34.44%和13.97%,反映恆生股價表現最好,但以每股盈利增長率而言,卻不是十分標青,只有24.10%,至於金沙、匯控和東亞則分別為30.92%、5.86倍和1.65倍,可見恆生的增長率為四股之中最低,故此值得探討為何去年股價表現優於其餘三股,以及從基本面研究今年的目標價。   盈利分析不能只看一年 論到每股盈利增長率與股價表現之關係,單靠一年的增長率參考性不大;但若以三年的數據作觀察,則另作別論。恆指於2014年至2017年的每股盈利分別是7.91、14.22、8.30和10.30港元,即2017年為四年中第二高的數值,但較最高值是倒退逾27%,猶幸三年均值為增長9.20%。從不足一成來看,表面上每股盈利走勢平平,不過只要持續有此增長率,大概八年每股盈利累計可翻一倍。而自從港交所有恆生的年報記錄以來,於1999年開始股數一直維持不變,至今已超過18年,可見當每股盈利倍增時,股價很大可能全然反映此因素,屆時亦會倍升,可見分析此股的基本面對未來股價走勢有很大的參考價值。   每股盈利與股價之關係 回看其餘三股,金沙、匯控和東亞於過去三年的每股盈利平均增長率分別為-14.33%、-11.39%和5.68%,表示恆生已是最好業績表現的股份。至於此三股從2014年底至2017年底三年的累積股價表現,為5.77%、8.04%和8.32%,但恆生同期則錄得56.70%,亦是四股中表現最好的,這正是藍籌股的投資價值,只要業績有好表現,自然會逐漸反映到股價上。不但如此,只要盈利維持增加,股價升幅更會跑贏每股盈利增長率,就如上述的恆生,股價累積升幅56.70% (123.80 → 194.00元) 較累計每股盈利增長30.21%顯著為高,若連同期內派發累計股息20.70元,賬面回報率是73.42%,較累計每股盈利增長率高出1.43倍。   利用放大比例預測股價 最後分析恆生今年的目標價,為了降低每股盈利的波動性,所以筆者改為參考每股資產淨產,從2013年至2017年,可以計出四個累計增長率的數值,分別是29.15%、31.73%、30.48%和41.06%,相對的累計股價變動為2.91%、18.12%、19.95%和61.26%,即累計股價變動與每股資產淨產之累計增長率產生的放大比例為0.10、0.57、0.65和1.49倍。以上述的年均每股盈利增長為9.20%計算,預期2018年每股資產淨值為90.7676港元,相應的五年累計增長率為61.01%。按股價放大比例為1.49倍計算,預期今年目標價為230元,相對2月22日收報194.90元,潛在回報率不足兩成。當然,筆者未有計入期內可得的四次股息,以及每股盈利增長率可高於9.20%,故此潛在升幅理應超過兩成。不過也值得留意上述1.49倍的放大比率,顯然是去年大市氣氛暢旺所造就,倘若今年氣氛不如去年的,大有可能放大比率會低於1.00倍,參考四年的平均值僅為0.70倍,暗示除非今年恆生業績再為市場帶來驚喜,否則股價可能在230元,甚至是200元,便會出現阻力。     聶振邦 (聶Sir) 證監會持牌人   筆者確認本人及其有聯繫者均沒有出現以下兩種情況,其一是在執筆前三十天內曾交易上述分析股票;其二在文章發出後三個營業日內交易上述的股票。此外,筆者現時也並未持有上述股份。   以上純屬個人研究分享,並不代表任何第三方機構立場,亦非任何投資建議或勸誘。讀者務請運用個人獨立思考能力自行作出投資決定。

Read more

【潘家榮】繼續汰弱留強

尋日係威係勢升五百幾點,期指又企得返31100之上,令我都加多兩成貨去到五成幾,不過轉頭美股臨尾市又由升三百變成倒跌,令到港股又跌返近四百點落黎,感覺有啲中左伏,不過又未衰得晒既,起碼尋日加既586海螺創業今日都仲係升,所以識揀股真係好重要。 如果今日期指收低返31100以下,快KSI又會由好轉返向淡,理論上係要減返exposure,揾返啲近期較為弱既股票減返,但係睇返實際情況,原本諗住下一隻減既對象868信義玻璃,今日又升左上黎,所以都係收手唔減住,睇埋聽日先。 筆者為證監會持牌人,其全權委託帳戶的客戶持有海螺創業(586)、信義玻璃(868)  

Read more

月入120K夾心爸爸苦況 #1526

諗 Sir你好, 之前已讀完收息101及103,剛開始進行債基疊增,及剛報了ETF班,希望可進一步做好理財。   本人現年43歲,月入12萬,太太現為全職主婦,有一名6歲兒子,需供養長輩。夫婦二人以往靠努力工作儲錢,雖然現時工資不錯,但隨著步入中年,兒子還細,未來教育及醫療的開支只會有增無減,加上現只得本人一個收入,更覺單靠雙手搵錢是不足夠,的確需要好好理財才能做好退休安排。因此,想請教諗 Sir如何優化整體資產配置,為退休生活打好基礎。現時資產情況如下: 1)現自住九龍新樓,本人名下,市價估計約1250萬(未過3年SDD),600萬貸款,月供2.3萬。 2)已補地價荃灣居屋,25年樓齡,太太名下,估值580萬,200萬貸款,月供1.2萬,月收租金1.7萬。 3)現金儲蓄220 萬(大部分放在兩個mortgage link戶口收2.1% p.a.) 4) 股票及基金120萬 5) 剛開始執行債基疊增,自資70萬加杠杆,淨回報約14%p.a.。 6) 純儲蓄term saving 保險50萬,保證回報3.2%p.a., 3-4年後取回。 7)每月支出約9萬(包括2筆mortgage供款) 問題: 1)應否購入第3個物業(因夫婦各已有樓,需要借用長輩名購入),及從那類型物業入手為佳 (因本人只可為擔保人,相關LTV及DSR會收緊). 2)或將居屋單位換碼至一個私人大型屋苑單位(但現時居屋貸款是太太以前有工作時申請,所以換碼等於放棄了現存200萬的借貸力),加上換碼後的單位需要本人作為擔保人,所以如未來在再想增添第3個單位收租,又再要以本人做擔保,恐怕很難計到數) 3)或一動不如一靜,暫時什麼都不做,先以債基疊增收息,靜候樓市回調才考慮添置第3個物業。 謝謝   ANSWER: 現夫婦只有讀者一人工作,家庭借貸力減為120K/10000*50%*2.59 = 1554萬。已用借貸力為600+200 = 800萬,用掉800/1554 = 51%。基於借貸力在旺市最多只用7成,建議讀者最多運用1554*70% = 1087萬借貸力,亦即再借都唔好超過1087-800 = 287萬。咁計讀者就當要買第三宅,係不想用高首期及用途多報為出租之情下,最多買市值500-550萬的樓。此價碼唔係冇選擇,但以讀者資產淨值達1500萬而言,再買幾百萬樓對於大局改善不多。不如好好搞定產出現金流,為每月九萬銀的洗費作打算。   留意太太借貸力可作塑造,利用買樓003借貸力由無變有之法門,冇做野既太太都可合規齊文件變回受聘,至於佢點返工係太太同佢老闆之間既事,銀行冇得干涉,不過對答流暢一定有幫助。另可由數字計出讀者的憂心何在,雖工資達12萬但月支出已達9萬,計佢一個月真儲起3萬(未計交稅),工作一年才能累起4個月支出,那工作10年才可累起約4年支出,而流動資金計為約400餘萬之下,再咁落去讀者要大大降低生活質素才可退休,仲未計阿仔讀書又或置業上的支出,12萬月入爸爸其實都唔易捱。   最困讀者的無疑是兩間樓壓死了讀者(1250-600)+(580-200) = 1030萬的錢。加上樓市一跌,呢1030萬便「見財化水」,膽大者可將兩樓逐間賣,然後再換入市值約500萬的屋苑兩房收租,5成上會,而自己反租九龍三房黎住。兩間收租兩房如偷偷地八成上會,首期為100萬而月供約16K,大致同租金睇齊,咁做好處係讀者只用了200萬就槓起成1000萬樓房,而自己套到[(1250-600)+(580-200)] – 200 = 830萬。呢舊錢就當保守點收10%年息,已產83萬一年,夠讀者三季的支出總和。更何況讀者已試買70萬債基收緊14%一年息,在債基買多定少都享同一派息率之下,讀者可由70萬進一步擴展債基疊增的投入銀碼,分不同時間買入,安全系數有一定保障。然而咁做令成家人流動資金水平急升至1200萬,往後仍有極大發揮空間,唔方便既只係要月付約30K租樓,小朋友要將就一下。由於夫婦賣樓再換只付正常印花稅率,讀者可在SSD期過後考慮下上述方案。   當然行保守唔賣樓,好處是唔使煩搬屋搵樓,這個筆者明白。讀者自住樓已按盡,冇得搞。惟太太的樓可在準備好借貸力之後,搵家人個名行一拆二按爆八成,即係將580萬的80% ~ 430萬套出,減除尚欠銀行的200萬,讀者仍可多揸230萬現金係手,連同原有之400萬,有成600-700萬去收息或預備已佔一定先機。一拆二後可太太及其親人各揸一層,變成讀者實質控有三間樓(雖名義上不是),在45歲完成一生三住,等租客慢慢幫手供甩樓仍層不錯選擇。至於手上六百萬餘可用收息101之債基疊增收息12-15%或ETF收息,14%一年等於月收$70K/月,大大降低讀者負擔壓力。 […]

Read more

【潘家榮】尾市守得穩再加貨

趕緊稿,3點鐘又要做電話訪問,所以都係簡簡單單講策略點樣做,至於背後既理據,成個大picture我諗緊啲乜,都係日後先至解釋返。 尋日估到美股會再落,但就估唔到喺美期仲係低過我地尋日收市時既點數既情況之下,我地可以高開返,而且仲要越升越有,如無意外,今日期指都應該會收高過31100以上,亦都初步有第一個訊號轉返好,所以你見我頭先都有話再加貨,加到去倉位既四成多,如果去到尾市個市都無跌返落去的話,我會再加貨去到五成幾,之前果兩隻無特別講係邊隻啦,雖然我覺得第一隻係好易估既,而一陣準備加既第三隻就公開啦,就係一直都坐緊既586,之前跌落黎時減左一半,黎緊準備尾市補返原先果半之餘,亦都on top再加注,止蝕位定喺21.1。 筆者為證監會持牌人,其全權委託帳戶的客戶持有海螺創業(586)

Read more

八百萬投資策略 #1525

諗Sir ,   早晨,本人 女 已婚 年54  家庭主婦。 與丈夫联名擁有已供完九龍三房,現值大概1600萬。 自己有儲蓄共600 萬(今次投資不動用丈夫及女兒儲蓄,所以省卻)。 投資目標: 做啃息族5 年,扣除還款及支出,希望每月有6-8% 回報。 想法如下: step 1 – 轉按層樓,得800 萬,加上自己所儲600 萬, 共1400 萬。 step2 – 開設私人銀行户口 step3 – 400 萬存Mortgage link , 600 萬買直債, 400 萬買債基。 以上方法可行嗎?請諗sir 賜教並提供適當的直债和债基組合。 另外,本人在8月2017年,用300萬買了一份恒生[悦°享連連]II 年金人壽,當中有些選項可改,想諗sir 指點下怎樣可提早斷單賠少些。   謝謝。   answer: 本案讀者對投資認知很少,咁講係想幫佢,想聽客氣說話可到銀行買「悦°享連連」,做個「免費理財分析」! 本blog不敢白花看倌寶貴時間。   有關認知很少之看法: 原因一: 讀者「600 萬買直債, 400 萬買債基」之配置說法說明了對投資無經驗。始終一千萬不是小數目,加上今年環球市場風高浪急,將錢分段投入是必然,而此等銀碼可除債外,多元化一點投在股票、ETF市場。 […]

Read more

【聶Sir】追逐利潤前 勿忘狗年波動大

今日是踏入狗年第一次撰文,祝各位讀者新一年萬事勝意、一本萬利、萬象更新,與家人一團和氣,大家都身體健康!   於農曆年假期間,美股道指於三個交易日均高收,重上25,000點,加上上周五恆指ADR折合升413點,本周一亞太區股市除了紐西蘭、印度和巴基斯坦均見上揚,其中日本、印尼、新加坡、菲律賓和馬來西亞更升逾1%,大行紛紛預期恆指狗年首個交易日會開紅盤。然而,當日僅高開49點後下跌,於上午10時許低見30,720點,跌近400點,才見止跌回升,未到上午11時高見31,319點,倒升逾200點,不足一小時波幅竟近600點,可能是預示狗年恆指波動大。其實也有資深投資專家認為今年恆指波幅可能達8,000點,介乎27,000至35,000點,若此推斷正確,暗示2月上旬錄得的低位29,129點仍未見底。另外,從1970年計起,恆指已經歷四個狗年,全年變幅均逾三成 (如下圖),其中兩次更是跌逾三成,分別是八十年代和九十年代那兩次。而最近一次狗年見於2006年2月1日至2007年2月16日,恆指則累升逾三成,但之後卻遇上金融海嘯,於2008年10月一度低見10,676點,較當時狗年收爐日報20,567點,下跌近9,900點,可見歷來狗年均見恆指波幅大,投資者需多加留意。 狗年潛在十大風險 此外,綜合不同投資專家意見,暫時狗年金融市場有潛在十大風險 (如下圖),包括1)全球央行「收水」,令資本市場的資金流動性收緊;2)美國通脹升溫以致加息步伐加快;3)美國稅改刺激資金回流美國;4)美債息率抽升及美匯短線轉強均不利股市;5)特朗普在2017年5月10日在橢圓形辦公室中與俄羅斯外長謝爾蓋‧V‧拉夫羅夫和駐美國大使謝爾蓋‧克里斯利亞克會面的過程中,向對方提供了可以揭露出情報來源和獲取的手段的細節信息 (簡稱「通俄門」事件),此事有持續發酵跡象;6)中國加強去槓桿及收緊金監管;7)憂慮中國經濟及企業盈利增長放緩;8)中美貿易摩擦升級;9)比特幣及以太幣等虛擬貨幣爆煲,以及10)意大利大選及北韓等地緣政治風險。相信讀者們會留意到,這潛在十大風險的焦點落在美國和中國之上,撇除全球央行「收水」和中美貿易摩擦升級,源於美國和中國的風險分別有四項和兩項,故此恆指今年走向,投資者應主要關注中美政經發展,在進場前作好防範風險的心理準備。 聶振邦 (聶Sir) 證監會持牌人   筆者確認本人及其有聯繫者均沒有出現以下兩種情況,其一是在執筆前三十天內曾交易上述分析股票;其二在文章發出後三個營業日內交易上述的股票。此外,筆者現時也並未持有上述股份。   以上純屬個人研究分享,並不代表任何第三方機構立場,亦非任何投資建議或勸誘。讀者務請運用個人獨立思考能力自行作出投資決定。

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室