兩隻網購ETF，CLIX同IBUY，繼續睇好。
網購呢個行業，可以話係受惠於今次嘅疫情。如果大家睇睇兩隻ETF嘅走勢，其實你就會睇到，喺今年之前佢哋其實都唔係升得咁靚。
無錯，網購係大勢所趨，但若非有疫情出現，消費者就於實體店消費嘅慣性，並不會於短期內轉變，賺購係唔會發展得咁快。
好喇，因為疫情，令呢個行業正式起動，我嘅睇法係，一開車，個勢頭就唔會停，整個網購行業將有望迎來一個長達幾年以上嘅高速增長期，但有一點大家要注意，喺可見嘅將來，網購業將會出現一個大整合，強勢嘅「網店」，由於無咗地域限制，嚟緊啲生意可以變得好「霸道」，搶佔哂喺佢所屬性行業其他網店嘅生意。
所以，呢個行業，更加要記住，投資重點係「強者愈者」，特別係如果你要買個別股票的話，一定要揀一啲大勢向上嘅股票。
例如係Groupon (GRPN)，縱然有網購概念，但係無用，佢係完全唔會能夠受惠，股價再跌嘅機會好高。
反而，大家嘅著眼點，應該放喺一啲升嘅時候就升多多，跌嘅時候就跌好少嘅股身上，當呢啲股票喺小調整後有企穩再上嘅跡象，就可以買入。
至於其餘兩個板塊，雲端同醫療，都繼續睇好。
有玩開雲端股嘅朋友，應該都知，佢哋單一股票嘅升跌幅有時都幾大，而喺呢啲情況，如果想降低風險，買ETF正正係一個好好嘅選擇。
WCLD，會係一隻唔錯嘅ETF。
佢哋持股入面，有Zoom (ZM)、Twilio (TWLO)，兩隻其實都係升得相當好，但上落波幅幾大，單一投資風險相當高嘅股票。以ETF投資，正好可以解決呢個問題。
同樣情況，係醫療股都係一樣。Quidel (QDEL)、Moderna (MRNA)呢啲股票，波幅唔細，但又係有潛質大升嘅股票，用ETF作買賣，所面對嘅壓力會細好多。
當然，如果你肯定自己可以承受到啲波幅，咁買股票絕對無問題。
最後，呢兩個星期我做咗好多研究，寫咗好耐程式，改良咗TOP 100列表內嘅止賺、止蝕機制，希望可以喺揀股上，又或者喺買賣時，會有一個更完善、系統化嘅機制可以跟從。
Stop，就係止蝕位。Stop%，就係股價距離止蝕位嘅距離。距離太遠嘅股票，通常都係最近急升過嘅股票。而想風險減低，可以揀一啲止蝕位置較近，而過去一週股價又能夠上升嘅股票。
而Ichimoku，繼續揀雲上就可以。
改善咗之後，我相信整份列表會更加易用。星期五，我會用文字以及影片講解用法。另附上一份簡易版嘅列表畀大家參考。我希望做到，有邊啲股票可以買，有邊啲股票要再等時機，成件事會更加清晰。
後日再詳細講。