其中一隻比較新型，而近日又破頂嘅ETF，包括以下呢隻IDNA。
淨係睇個ticker，我諗大家多少都應該估到呢隻ETF投資嘅公司，係同DNA有關。
從ETF嘅簡介，佢係會揀一啲從事genomics and immunology innovation 嘅公司，前者解作基因組學，後者解作免疫學，我唔係醫療專家，再問深入啲我已經唔識，但嚟緊我會講一講呢個行業嘅機遇。
上圖，係講做一個完整嘅DNA排序嘅價錢。喺2000年初，要做呢樣嘢，價錢係一億美金，價錢極昂貴，用作商業用途，並不划算，因為就算畀你咁樣研究到隻藥，就算賣到好貴，你都好難賺返個成本，所以當年嘅藥廠，好難以基因排序嘅方法去研發藥物。
但隨著sequencing cost大幅下降，今日做同樣嘅嘢，只要一千美金，而且價錢都繼續下降，根據一啲研究，一方面佢會令我哋醫療技術嚟緊會出現大突破，另一方面，會有一啲從事基因免疫相關技術嘅公司，能夠賺到錢，而呢個就係我哋可以望到嘅投資機遇。
相關呢個範疇，我會睇多啲資料，增進知識，但今日，我會集中從投資者角度去揾股票。
第一隻喺IDNA入面，我想大家留意嘅持股，係Seattle Genetics (SGEN)。
上過我股票班嘅同學，一定會知道我好重視兩樣嘢，第一樣係股價嘅上升趨勢，第二樣係間公司嘅業務係受惠於一啲不能逆轉嘅大勢。
佢嘅股價處於長線上升趨勢呢樣嘢，我相信都唔使太多解釋。一隻處於上升趨勢嘅股票，某程度上係呢間公司嘅質素同盈利前景嘅反映。
但另一樣嘢係，幾好嘅公司，賺唔賺到錢，都要睇身處嘅行業，係咪有前景。SGEN從事嘅範疇，係癌症標靶治療，而從佢嘅營業額增長數字去睇，我對呢隻股票嘅睇法都相當樂觀。下星期一，會再講多少少呢隻股票。
至於IDNA內嘅其他持股，都有唔少大勢向上嘅選擇，但似乎同SGEN比較都有所不及。所以，呢隻SGEN，我又未必會公開講。
另外，我講過，有三個板塊我係睇好。第一係醫療相關，第二係雲端，第三係網購。而噚日，隻IBUY上升4.69%，又再有發力嘅勢頭。
IBUY之所以大升，原因係有兩隻持票於業績後大升，一隻係CHGG，升32.39%，另一隻係W，升24.52%。
要揀中呢啲個別嘅大升股票，當然唔易，較容易嘅做法，係成個行業買哂，而ETF就係可以好簡單咁畀你做到呢樣嘢。IBUY，繼續順勢而行，跌要走，但繼續升的話，要敢坐貨，網購行業仲有超大嘅發展空間，情況順利的話，有排升。另一隻CLIX，表現都唔錯，噚日都升到4.20%，同樣我認為都相當有前景。
至於雲端股票，最簡單，你買QQQ，即納指ETF已經可以。三大指數，以納指表現最好，道指表現最差，兩者造成分別嘅原因，係股票質素嘅差距。唔想煩，QQQ係一隻質素好好嘅ETF，期權開價又靚，值得玩。
最後，有問題歡迎電郵至 [email protected] 畀我。我會繼續努力去發掘更多嘅股票投資機會。星期五再講。