https://www.youtube.com/watch?v=NY2lC3gxqmg&feature=youtu.be
其中一個最多朋友問嘅問題，就係點樣決定幾時買入同沽出股票。
而首先，我哋要認清目標。
我個人係唔相信會有人可以永遠都贏，永遠都估中哂啲股票方向。就算強如股神畢菲特，又或者係全球首富Amazon 嘅老闆貝索斯，佢哋都會話做錯過一啲錯誤嘅投資決定。
事實上，做得投資，就無可能完全避免唔輸錢。但雖然係咁，但亦無阻有啲人嘅財富繼續增值。
相反，好多投資者，可能揀股票嘅功力唔錯，十次有七次都贏錢落袋，但偏偏就係長遠投資回報做得唔靚。原因，就係佢哋成日都係賺粒糖，輸間廠。呢個，亦係好多投資者嘅「命運」。
不過，要改變呢個命運，其實都唔係無可能。
第一，要做到「不對穩風險回報」。
由心態同投資理念開始，改變自己，贏嘅時候要令自己更有耐性，贏多啲，輸嘅時間要敢於止蝕，果斷啲。簡單講，就係英文有句說話，cut your losses and let your profits run。
第二，買處於上升趨勢的股票。
好多人都唔識點識止蝕位。但我想講，唔係你唔識set，而係你揀咗隻好難set止蝕位嘅股票嚟玩。
如果係一隻處於上升趨勢嘅股票，只要下穿上升通道，其實你一定會能夠察覺得到，只要你願意離場，就一定會走到。
但等趨勢，好慢。如果你每次都要等有趨勢出現先買入股票，你會走失好多投資機會。
另一個方法，喺近期嘅股市都會合用。
有一啲好嘅股票，股價已升到好高，的確亦唔適合再作高追。咁你可以等佢再出現調整時，企穩再上嘅機會入市。咁樣，你就會有一個比較近嘅水平作止蝕。
如果隻股票不旦無跌穿止蝕位，仲繼續向上升，你所賺得嘅回報就會係你風險嘅好多倍。
第三，要考慮隻股票是否適合自己。
RingCentral (RNG)、Shopify (SHOP)都係好好嘅股票，但問題係，佢哋嘅上落幅度都好大，你係咪可以承接得到。
如果唔得，可能人哋就賺大錢，但你就仍然要輸錢。
咁其實，你係可以揀一啲上落無咁大嘅股票嚟玩，例如係Microsoft (MSFT)或NextEra (NEE)等。
除咗諗隻股票好唔好之外，都要考慮係咪切合你嘅投資需要。好多投資者輸錢嘅原因，就係諗漏咗自己。
做好咗呢幾樣嘢，偶爾你仍然會要輸錢。但成件事就係，輸你會追得返，而喺你順利嘅時候，你係會賺到非常理想嘅回報。呢個，就係我認為要喺投資市場上長線獲利嘅不二法門。