=======附件========
=======附件========
今日，想轉少少更貼市嘅內容，希望可以令大家更清楚現時環球股市嘅情況。
先係環球不同國家MSCI指數ETF嘅表現比較。為方便大家做研究，附件會有excel 檔案。
雖然，肺災係由中國開始擴散，但奇怪嘅係，中國嘅MSCI指數跌幅係全球最少。
想知原因，我哋可以睇吓佢有啲咩成份股。以下為相關連結：
https://etfdb.com/etf/MCHI/#holdings
唔怪得啦，最大成份股係阿里巴巴同騰訊，合共已佔成個指數嘅3成份額。即係話，只要可以令呢兩隻股票唔跌，甚至上升，個指數嘅表現就唔會太差。
呢兩間公司，對中國嘅重要性，唔使我多講。暫時去睇，都叫做仲保得住。如果他日連呢兩間公司嘅股價都失控下跌，代表股市下跌嘅風險，會再提升至下一個水平。
另一個我想講嘅，係台灣。
台灣嘅MSCI指數，主要成份係晶片產業。講晶片，唔可以唔講人工智能。簡單講就係，啲晶片股點解咁勁，其中一個最大機遇，就係AI人工智能發展。將來好多唔同產品，就算係冷氣機、雪櫃、電視機，都會有晶片。
有報道指，台灣嘅晶片技術，領先中國最少4年。近日疫情，對呢個產業嘅打擊唔算好大。
但我最擔心嘅，係歐洲。
過去一個月，MSCI指數跌幅最大嘅國家，係希臘。而意大利，都唔係好得太多，令我會擔心，如果疫情繼續失控，影響歐洲經濟，歐債危機可能會重演。
另外就係，我哋會睇到，武漢肺炎對股市嘅打擊，係全球性。我嘅睇法係，如果只係某一個國家出招救市，好容易就係個市一反彈咗上去，好快就會被其他國家拖返落嚟。
除非各國係合力去一齊救市，好似金融海嘯咁樣，否則升幅都只會係短暫。
另外，如果你覺得環球股價係被低估，我想講，真正被短估嘅係油價。
短線，全球對石油嘅需求必然大減，但長線，跌到呢啲位，企穩回升嘅機會好高。
你要把握呢個機會，有以下兩樣嘢會幫到手。
- 一隻可以畀你好容易控制注碼嘅優質ETF。
- 一套有效嘅期權策略。
雖然，呢度本身唔係唔包講期權，但既然我又見到個機會喺度，無所謂啦。
我嘅策略，就係自製接近20厘息嘅揸油策略。
首先，大家要留意全球最活躍嘅石油ETF，ticker為USO。
油價，大家唔好睇升，要長升唔係咁易。但如果只係「唔跌」就有錢賺，難度就會低好多。
升先有錢賺，同唔跌就有錢賺，係兩個完全唔同嘅概念，大家要分清楚。
油價嘅走勢係，一跌到某個範圍企穩咗，就會喺一個區間入面上落。如果你要捕捉區間，對於初學者最好嘅方法，係分注做。
USO 現價7蚊，每100股，港紙計約$5460，我相信對於所有人嚟講，你都會好容易可以分配到注碼。
今日講到呢度，聽日講埋期權。
有任何問題，歡迎電郵 [email protected]。