大家好。香港剛經歷了多事之秋，小弟的思緒也有啲凌亂，一時提不起筆，先同各位講聲唔好意思。
先講一講之前提及過的KHC。高盛早排出咗個報告，指KHC的EBITDA仲未見底，而且有機會削減派息，將目標價降至29美元，評級由Neutral轉Sell。小弟文中都認為，KHC未來派息會否削減，係好視乎EBITDA表現，所以派息係吸引但唔穩陣。報告公布後，目前股價都係揩住但冇跌穿200天線（目前在30.15水平），各位亦可睇睇住呢個指標作決定。
至於港股，藥業板塊（及物管板塊）作為唔太受中美貿戰影響的板塊，吸引唔少資金泊錢作避風港，近月表現強勢。今次想寫的，就係近一年升到吧吧聲的製藥股中國生物製藥（1177）。小弟唔係藥業professional，對各類藥物的了解甚為皮毛，卻也冒昩試下分析，希望各位師兄師姐不吝賜教，小弟感激萬二分。
中生製藥19H1收入125.27億人仔，按年升28.8%；毛利100.75億，按年升28%，毛利率80.4%，與上年同期差唔多；純利14.44億，按年僅微升5.8%，EPS為11.47分，主要係收購咗北京泰德24%股權，產生咗無形資產攤銷費用影響，若撇除則應佔基本盈利16.74億，按年增長20.5%，EPS為13.3分。
從藥品分類睇，肝病用藥為主要類別，佔19H1總收入26.3%，但佔比呈下降趨勢；第二係抗腫瘤用藥，佔20.5%，已超越心腦血管用藥所佔的13.5%。呢三類藥佔咗中生製藥超過六成收入。治療乙肝的恩替卡韋（Entecavir，藥名潤眾）由中生製藥旗下南京正大天晴研製，亦係目前臨床使用效果最掂的抗乙肝病藥物之一，19H1銷售額1.6億。抗腫瘤用藥方面，塞維健注射液銷售額3.43億，增長54%。心腦血管用藥方面，天晴寧注射液為血液容量擴充劑，可以代替血液，所以市場非常龐大，19H1銷售額7135萬。
以趨勢分析，腫瘤用藥未來有機會成為中生製藥的主力藥類，副總裁謝炘話，腫瘤科醫藥的研發佔比逾四成，比目前整體銷售佔比20.5%為高，加上好多項目都係大project、創新藥及PD-1產品（PD-1係一種免疫療法，小弟在此就唔詳細解釋，由於副作用比化療低，而且療效更持久，所以藥企都渴望盡快分一杯羮），未來發展將會更快。相反，肝病用藥面對降價問題，銷售比重會相應下跌。佢估計，腫瘤科用藥佔比今明年起將超過肝病用藥。
腫瘤科用藥中，最矚目的旗艦產品就係正大天晴自主研發的鹽酸安羅替尼(Anlotinib Hydrochloride)，主要用嚟治療小細胞肺癌。安羅替尼能有效抑制癌腫瘤的血管生成，變相「餓死」癌細胞，成為咗許多晚期癌症病人的新希望。因此，據分析報告，管理層估安羅替尼2019年銷售可接近30億元人仔，2020年再有40%增長，似乎非常睇好。此外，中生製藥亦獲批咗中國版「偉哥」(他達拉非片Tadalafil)，係國內同品種藥物第二家，我國的男兒有福了！
分析藥企，好難唔了解一下醫藥政策。2018年底，內地發布咗《4+7城市藥品集中採購文件》，規定化學藥品新註冊分類批准的仿製藥目錄，傾掂之後，就可確定的品種及約定數量，招標採購；開始時共有11個試點地區，之後接近擴展至全國。呢條政策的目的，就係想藥商捨價取量，等人民可以用較平的價錢用到質量較好的藥。喺呢個政策下，藥品確實降價，原研藥同仿製藥開始競爭搶客，的而且確係有利病人。而公立醫院以往要「帶金銷售」，即係藥商要靠sales介紹藥物俾醫生揀（當中梗係涉及唔少回佣甚至賄賂），喺呢條政策下亦斷咗有關財路，真真正正視乎藥品的質素去為病人配藥。
咁係咪皆大歡喜？藥商又如何？政策開始傳出的時候，市場未知係乜東東，淨係知道會降藥價，心底已經騰騰震，事關突然之間一個政策，便足以令整個行業由賺變蝕，並唔係冇先例，此乃國情。到2018年12月，國家醫保局的帶量採購試點預中標結果出爐，中選藥品如乙肝藥物恩替卡韋以0.62元人民幣的價格預中選，較之前最低中標價6.72元人仔，最激降價幅度達90%！至於由北京泰德研發生產、另一中選的鎮痛藥物凱紛（Kaifen，氟比洛芬酯flurbiprofen），則降價65%；整體中選藥品平均降價52%。聽到呢個消息，芬佬當然九秒九先沽為敬，醫藥股即爆股災，能醫不自醫如食瀉藥，龍頭藥股如中生製藥由7蚊水平插到最低近5蚊，兩日冇咗兩成幾；石藥（1093）就由16元水平短短一個月最低隊穿10蚊，蒸發近四成；當然仲有其他醫藥股苦主，恕小弟未能盡錄。
不過，製藥股並未就此玩完，唔少股價已從去年底的低位大幅回升。小弟試以漁夫系統中的「醫療保健」分類、「製藥與生物科技」行業分析，中生製藥於5月16日率先出突破訊號，係板塊內最早出突破訊號的股份；突破後至今升咗35.66%，亦係突破醫藥股中累積升幅最大。不過，能量依家只餘2格，20日能量計只有50%，似乎正處於回氣階段。
何解藥品減價，唔少藥股年內仍然咁強？小弟認為，主要係投資者慢慢了解到，即使個別藥品降價，如果製藥股的產品夠多元化，有關影響仍然可控；而且帶量採購的確可大幅提高產品銷量，例如潤眾19H1的銷量便較去年同期急飆，部分抵銷了產品售價下降的影響。即使係咁，潤眾19H1銷售額為15.99億元，按年減少7.82%；凱紛的銷售額為5.97億元，按年減少33.42%。換言之，負面影響係存在的，好在如今中生製藥已發展成一家覆蓋肝病、抗腫瘤、心腦血管、鎮痛、骨科、消化系統、呼吸系統、抗感染、腸外營養、糖尿病等十大治療領域的綜合型製藥企業，藥物組合多元化分散了風險，個別藥物對總體影響有限。
一年容易又中秋，就喺今年9月，第二次帶量採購結果出爐，今次整體藥品平均降幅59%，仲多過上次，製藥股股價又應聲插咗一浸。至於中生製藥，喺呢次的擬中標結果中，旗下的瑞舒伐他汀(Rosuvastatin)、厄貝沙坦/氫氯噻嗪(hydrochlorothiazide)、伊馬替尼(imatinib)、吉非替尼(Gefitinib)及凱紛5款藥品入列中標候選，而恩替卡韋則落選。
其實，仿製藥不斷降價，變相亦逼使製藥企業進行創新研發，而收購北京泰德，醉翁之意也應在此。揭揭中生製藥年報，19H1的研發開支達16.2億，按年升22%，更指出研發進入新一輪收穫期。副總裁謝炘亦打晒開口牌，話未來三年集團合共有72種新產品上市，預期其中有大約60種新產品銷售有機會過億元。難怪中生製藥股價好快又拗腰升過，11月頭再逼近12.24元的一年高位，反映市場看法樂觀。
講少少花邊嘢，10月底中生製藥公布，主要股東謝炳夫婦將其持有的大部分股權（折合逾27億股，持股比例約21.45%，以市價11.26港元計，市值逾300億！），無償贈送俾佢哋個仔謝承潤，謝公子亦因此成為一夜間多咗幾百億身家的95後。謝公子並唔係紈絝子弟，不但持有沃頓商學院及清華大學的學位，更係「全美十大傑出華人青年」。不過，謝公子唔算係富二代，因為佢乃泰國正大集團謝氏家族的第四代成員，所以嚴格嚟講佢係富四代至真！
再睇番中生製藥估值，須留意2018年有出售聯營公司利潤65.98億入賬，distorted咗基本盈利。摩通認為中生製藥今年將有多於17種新藥獲批，以現金流折現法（DCF）計算後，給予「Overweight」評級，目標價14.5港元。麥格理則把中生製藥早前目標價6.5元一下子調高至13.34元（似轉軚多啲），並將2019/20/21/22年adjusted EPS調高，分別至0.27、0.33、0.43、0.57人仔，估計未來三年都有20%以上增長。以此計算，中生製藥2019預測EPS市盈率約36倍，2020約29倍，週息率0.72厘。未來幾年前景，將視乎腫瘤用藥安羅替尼的表現。
政策風險始終係投資藥業股以至中資股的一大考慮。冇耐之前，總理又開聲要擴大集中採購和使用藥品品種的範圍，唔多唔少又會對藥股產生心理以至實質影響。同業龍頭如石藥（1093）上星期公布首3季盈利增長24%，預測市盈率約30倍，大行們似乎對其未來增長的穩定性看高一線，紛紛唱好。中生製藥將於11月26日（禮拜二）公布Q3成績單，各位師兄師姐不妨拭目以待。
漁勝