睇大諗兄的舊文章”男女投資大不同”, 不禁即時想作出回應。
投資工具投資工具琳瑯滿目,每種工具都有人從中可以賺到錢或輸錢, 正如响滿街負資產，B哥哥都因為咁而破產喇, 嗰陣曾聽人講過, 如果你冇樓响手, 真係恭喜你,….時移世易, 上唔到車就好似世界人欠左佢咁。
有句說話叫做性格決定命運, 以我玩左約二十年股票既經驗, 以前都好似d c9 咁睇報紙或聽d財演俾冧把, 輸左又賴人, 以兩個人同時同價錢買入同一隻股票, 最後有人賺錢, 有人輸得比之前買入既仲多(因為佢不停咁溝貨), 呢d就係性格使然。
仲有一樣嘢, 就係未了解嗰樣產品點運作, 就要先去了解或交少少學費(參與買賣, 輸左當學費)試下, 適合自己及了解涉及的風險是否可以承担(借孖展去炒期指, 你預幾多錢去補倉先). 正如我都用左約兩年時間去了解樓市的運作(資質比較差), 先敢將層自住樓轉按套取現金, 存人仔賺息差, (前提係人仔不停升值, 但如倒返轉頭行, 仲唔識適時轉軚就PK), 我好相信, 如果我同父母講, 我咁做, 佢實反對, 因為佢哋唔了解。
文中提到阿JEAN靠炒牛熊證賺左錢, 最後又响牛熊證及未日輪輸返,當年推出牛熊證時我專登去聽佢相關講座, 原來呢樣嘢會隨時打把, 變廢報紙既速度仲快過買輪,即係要隨時地都要”目及”實個市, 動作仲要快過個市。我就覺得呢樣嘢唔啱我玩, 從未掂過, 反而輪有買過(記憶中賺過一兩次錢, 其餘都係輸), 此類衍生工具, 發行商都做哂對沖, 升跌佢哋都有得賺, 乜嘢引伸波幅,時間值, 都係用來”坤”你D錢, 我曾特登買左本教人炒輪既書, 可能又係資質問題, 睇極都唔知引伸波幅點計, 只知佢話即等同股票既PE咁上下, 數值越大代表越貴咁解。唔知阿JEAN買呢隻日牛熊證時知唔知有呢D打把條款, 又知唔知輪既時間值會蠶食佢既價值, 即使買啱方向, 隻輪都唔會郁, 甚至跌。仲有一樣有關發行商既賤招, 就係佢會搵D人做餌,响市場上”做賣買”, 引D散戶買。我有個朋友就係曾有人教佢點玩,作為發行商既餌, 升一兩個價位就走, 話一日可以賺到幾千蚊, 但最後佢埋單計數輸左幾十萬(不過佢輸得起), 唔知教佢玩既人又係唔係”餌上餌”呢?
前面講過以前睇報紙跟財演買股, 或許跟風會有賺(帳面上), 但長線埋單計數, 都係蝕,因為就算財演推介既股百發百中, 但佢唔會有跟進, 叫你上個月推介某一隻股今日應該走左佢, 最後都因為你唔識落車而由賺變蝕(何況佢哋唔準)。故呢排都係只集中買自己心中目的幾隻股, 長期觀察的股隻, 你對呢d股一定熟過d財演多多聲, 唔使打電話問, 反過來可以教返佢哋。至於買邊幾隻, 每個人既喜好唔同, 即等同問人哋應買邊一區既樓一樣, 標準答案應該係你熟悉的地區/屋苑(要睇過一百間樓先好去買樓, 我呢兩年只睇左幾十間, 未有資格住), 只要你選的股票(公司)唔執笠, 長期一定有起有跌, 設定某一升幅(例如10%)沽出手持某一部份,趺左再入返, 採取既策略係, 永遠手上持有相當比例的現金/持股量, 及不賺不走(唔好選D會執笠既股囉, 同佢鬥長命).一隻股票响一年之中總有一兩次升/跌超過10%,只要嚴守紀律及唔貪, 一年只做一兩次, 响組合中, 平均一年有10%以上回報(加上收息), 應不難做到。
同各位分享個人觀察買賣差價, 同股價走勢都有關係(特別係0.25呢個區間最好玩, 如你中意炒細價股), 大家睇下表:
股價買賣差價
股價(元) 上升 / 下跌價位(元)
0.01-0.25 0.001
0.25-0.50 0.005
0.50-10.00 0.010
10.00-20.00 0.020
20.00-100.00 0.050
100.00-200.00 0.100
200.00-500.00 0.200
响0.25前, 一個價位係0.001, 過左0.25, 一個價位差價就差左五倍, 當股價响0.249前, 升/跌一個價位, 升/跌幅係0. 4%(0.001 / 0.249 X 100),而當响0.25之上, 升/跌幅係2% (0.005/0.25 X 100), 兩者相差五倍, 你話好唔好玩, 一個價位有2%回報(如升既話), 好過做定存, 而據觀察, 响呢D臨界點之前都係一個支持位, 即當股價由0.27下跌, 跌到0.25都會有好大支持(或上升阻力), 回報差五倍喎, 死都頂住先啦。至於點操作, 自己決定. 我最近以少量資金(一萬元度)長期操作一隻股票, 每日响0.25掛入三萬股, 曾成功入到, 有一日急升至0.32, 我走左三分二(21,000股), 等下次機會回到0.25又入多三萬股(即現持有三萬九千股), 等下次升至上次個位(0.3或以上), 同樣走21,000股, 變相令該股成本接近零, 買呢隻股既原因係, 佢有機會被人借殼由B股响香港上市, 即使唔成事, 都籨炒波幅中賺到錢。
基於本篇文開頭所述的原因(費事累人輸錢), 本來唔打算推介股隻, 惟以相比諗兄所推介的高息基金(本人一向對基金冇乜好感, 原因請參閱本人以前既POST
投資股票定基金好?(問) http://www.homebloggerhk.com/?p=5006), 仍覺得應俾各位參考下, 就係3988中國銀行, 佢既股價長期响3.0至4.0上落, 加上派高息, 當股價接近4.0時, 息率係4厘接近5厘, 當股價响3.0時, 息率有六厘幾, 己計算己扣左國內收10%股息稅, 佢仲有一樣好, 就係一年只派一次息, 即一唔使分兩次收, 慳左手續費同唔使持股咁耐, 有派息嗰次公布業績係每月三月下旬, 至六月先至除淨, 而通常五六月好大機會係一年日市場走勢較差既月份(五窮六絶七翻身呀麻), 响除淨前再睇位入(通常計息比率, 即派息除以股價) , 如買入後升幅己接近派息率, 就唔好貪佢D息, 走左佢算, 相反買入後跌左咪等收息囉, 我依家都係等緊。
後以別人的研究”猴子擲飛鏢”作為結語, 以上分析種種, 或以技術圖表派分析, 以千萬個理由去支持某隻(些)股票值得投資, 只是找些東西去支持你的看法是正確而已, 股票市場長線都會上升(貨幣長線貶值, 每三十年貨幣會蒸發90%), 所以只要你選的組合公司不倒閉, 任何組合(是組合不是個股, 因為如不幸選中老千股就好快不見99.99%, 但組合就不會)都會賺錢, 年薪百萬既分析員同馬騮掟飛標選股, 長線來講分別唔大。巴菲特(第一次寫這個名字, 因為我從不視他為偶像), 現時為股神, 只是因為他錢多, 這裡輸了, 別處可以補回來, 而且他買的股票曝光後, 人人都跟風, 跟著炒高幾倍, 佢就散貨, 連”搭棚”都唔使, 賺錢對於佢來講是輕而易舉事。