最近幾單會影響地產既新聞, 想响度同各位齋噏下。
1. 由獅子銀子銀行帶頭加新做按揭息率,其實都係由2.15加到2.45啫, 唔明點解報紙講到成三厘以上, 又幫你計埋加左息後, 每月供多幾多。記者大佬呀, 有冇Sense呀, 大家個basis都唔同, 點可以話”供多左”呀(例如我之前供開一萬, 依家供一萬零一蚊, 咁叫供多左; 但新做既根據當時息率計, 佢之前都冇供開, 點叫”供多左”呢?) 話明係針對近做按揭, 舊有既冇受影響, 條數點計呀, 大家睇報紙真係要打醒十二分精神, 唔好人云亦云。呢個算係提醒各位, 低息環境唔可以持續, 唔好以為美國佬到2015後先至會加息, 港息都係享受多2年底息, 依家證明左唔係喇, P rate或會不變, 但P – 都隨時會變, 以前一直做緊 P + 喇, 大家上車時要預鬆少少, 唔好借到咁盡, 等得到既唔急於買住。
2. 正苦連環推出辣及上述加新做按息影響, 樓市再次冰封, 據說慘過沙士(都係報紙講,沙士有幾慘(指交投量, 唔係指樓價), 我當時冇留意 冇得比較, 姑且信住先), 又睇到一D劈價既消息，如果個業主叫價高過市價好多, 減返價至同市價差唔多, 呢D就唔可以話”劈”, 只能叫開天殺價, 落地還錢, 要證實是否真的”劈”, 睇返成交記錄就最準確。總之官府要樓價跌(佢話平穏發展), 同官府鬥冇好結果。 順便提一提CY响天津話, 希望港人下一代可以住得寛敞, 佢係唔係以為自己仲同唐唐竞選緊呀? 噏得出就噏, 幾多人住緊劏房呀, 唔好話寛敞, 最基本安全都冇保障, 花園街單嘢啱啱審完, 佢攞景定贈興呢?
3. 有新樓陸續交樓, 二手交投又冰封, 加上雙辣招, 唔係買來自住既, 唯有放租, 大量租盤湧現, 租金自然下跌, 同最近市場上租金上升成好大反差, 想租樓人仕, 不妨去新交樓既樓盤行個圈, 或有筍盤。
4. 正苦推出最後一批居屋貨尾單位, 即係賣剩蔗, 籮底橙既短樁天頌苑, 正如前面文章菜市場的智慧提到,”東西要最便宜的時候才是最好吃的”, 响樓價升至天價時先至推出市場(放左十幾年既次貨等升至天價先賣, 高達又唔話佢屯積居奇), 同李+x分拆酒店扼人有乜分別。
5. 劏房局長公布維港以外填海五幅地, 其中最引起我興趣既係屯門龍鼓灘填海, 面積約200至300公頃(大家知唔知一公頃有幾大呢? 我都開頭都唔知, 但上網可以幫到你, 1公頃等於一萬平方米, 即100m x 100m), 咁二三百公傾又有幾大呢, 維園約19公頃,即十至十五個維園咁大, 以200公頃作標準，用慣常的3倍至4倍的地積比率計算，假設每個單位建築面積約700方呎，可建單位大約為8,600伙至11,400伙。(正苦資料)。呢度涉及環保人士關心既中華白海豚棲息地, 我留意到龍鼓灘過少少就係前海發展區, 嗰度正如火如荼, 過多幾年又一番景像, 記得以前傾港珠澳大橋時, 香港正苦以大佬姿態, 愛理不理, 要阿爺出聲先至做, 錯失良機, 依家先怕俾人邊緣化, 急起直追, 又被公文袋玩嘢, 搵左個朱婆婆玩司法覆核,嘥左一年時間仲嘥左56億(以每間公屋建築成本45萬計, 可起12,444個公屋單位)。 再嘈多幾年, 到時候人哋發展左, D人又賴地硬。
對於前海發展, 時有報導, 但唔清楚係乜東東, 花左少少時間搵資料, 原來前海响2007年己開始規畫, 2008年國務院正比准建立第九個保稅區, 2010年國務院批覆《前海深港現代服務業合作區總體發展規劃》, 佔地十五平方公里, 要成為中國曼哈頓,深圳的中環(很多口號), 預計到2020年成為亞太地區重要的生產性服務業中心和世界服務貿易重要基地， 屆時前海地區本地生產總值將達到1,500億元人民幣，即每平方公里產生10 0億元人民幣的本地生產總值。(能否達到拭目以待)。對於前海發展, 對香港樓市之互動關係, 再用少少時時整理向各位報告。