【股海崢嶸】潘家榮：個市幾時見底？ (2016/12/23)　

嘩，又21450、又20637，跟住又21300同20600，咁即係點呀？乜都你講晒啦……無錯係架，但係呢一個思考模式偏偏唔少散戶用左好多年。喺每次跌市既時候，好多人都會嘗試去估個底出黎，希望其他所謂專家可以俾到呢個答案你，但係你跟左咁耐，又有幾何真係中，結果只係得個估字，穿21450，就睇21300，穿左21300，跟住又睇20600，結果不斷撈底，不斷唔止蝕，越輸越多，咁樣真係有意思咩？

其實點解係都要估底？估高左，你太早買，之後仲有一大浸跌，就會傷亡慘重，你試下喺上年年中兩萬八跌落黎既時候，就當你忍到頭四千點唔買，到兩萬四先開始撈底，結果仲可以跌到萬八，到而家都未返到家鄉。相反，如果估得太低，好似上年啲人估要見萬四，結果等極都等唔到，咁又有意思咩？除非你好肯定你次次都估得好準，否則估底真係無意思，只會害左你。

「咁唔估底，又點知幾時買呀？」其實唔駛咁複雜架，到時個市自然會話俾我地知，我上年四月頭上節目既時候，話當時行緊牛三，結果喺短短半個月內由24000升到上28500，去到上年六月27800，當時人人話大時代係咁買，但係我同啲客戶就偏偏喺呢個時候不斷沽貨，避開左之後既股災；去到今年二月，當索羅斯話要沽空中國，人人睇淡既時候，我喺報紙專欄偏偏寫大市見底，叫大家買貨，由19100揸上黎，直至十月尾失守23400之後，就不斷叫大家減貨，唔好撈底。

能夠做到呢啲成績，並唔係我估得準，因為我從來都無估過，而係識得點樣觀察個市，等市場話俾我地知幾時可以買，幾時要避。

跌市莫估底，大家如果想學識賺錢的話，就真係要戒喇。至於幾時可以睇返好啲，就密切留意住我既文章喇。

————————————————————————————
想隨時收睇其他投資心法、港股策略，
請讚好 潘家榮 Kevin Poon facebook專頁。
www.facebook.com/kevinpoonkawing
————————————————————————————