80後買樓記(11)
>>按此到上回:港版大富翁
入行做地產真係唔容易，我之前群埋班保險agent，到而家做左地產agent，係香港黎講，唔算
係「高尚」之行業，除左成日周街跑之外，唔客易之處係要受人「白眼」。做保險係2008年經過雷曼之後，個客見份單有咩唔合佢心意又話你誤導，做地產仲大鑊! 九成以上生意都係一個agent代表哂買賣雙方，咁即係買賣雙方是但一個會賣平左或買貴左啦! 衰到註定要比是但一邊鬧添。但我睇過諗樣網，知道專才庸才通才之道，明白世間九成既人都可列入以上三個類別，作為一個朝氣勃勃80後之香港仔，我不甘於做庸才，亦讀唔成書做專才，而家把心一橫，將自己訓練做通才。
專才與否其實廿二歲前都知，因為人既思考同吸收能力係該歲數之後走下坡，我知本人學識不多所以好決定不向專才之路進發。當然唔排除我晚有所成，到幾十歲學懂易經之術數做番風水師傅，成為專才而利用兩者知識不對稱而賺錢。
相反通才利用頭腦靈活，找出世界需和求去賺錢。專才可是有人走上門比生意佢做的，通才者有如老闆、政客、政府官員，都係靠自己代表雙方利益而從中搵食的! 我而家搵份(sales)銷售工作，就想試下訓練自己可成通才與否。其實香港十幾年既教育係「零考核」一個人之通才能力的，所以大家無講讀唔讀得成書，都可以奮鬥試做通才。 既然要表雙方利益去搵食，訓練梗係由做sales開始啦! 講句野都唔掂點可令人乖乖地將手上既錢交比你?
超市老闆介紹我去佢御用地產鋪學野，同maria cordero似到twins咁既肥嬸，就係我開山師傅。師傅即係師傅，返工第一日就帶我去買樓。肥嬸知道有間唐樓可租可賣，見我生面口去扮宅男買樓。我同agent行入業主門口前，肥嬸打比我話家陣係角色扮演，佢做阿媽我做仔，一路睇一路傾計。
業主係一個咩都唔識既阿婆，同埋個樣似「元氣sushi」logo咁炆既阿伯。我行入去經紀當然唔比我同業主講野啦。佢驚老人家唔醒目講漏風聲。我上黎之前已同肥嬸熟讀背景: 一個單親家庭長大既後生仔，想自己一個搬出黎住但又冇錢，唯有睇唐樓仲要頂樓冇lift ! 我行入去，終於知識點解香港仲有一百萬既樓，原來間樓細到得個房同廁所，廚房係極之開放的，就係屋中唯一既窗邊有罐石油氣加個爐。
講到呢度，同九十後之年青人講，如果你唔知咩係石油氣，請番睇劉華既「天若有情」，曾幾何時，石油氣同電單車呢兩樣無關係既野，係劉華「響朵」既象徵。
講返買樓，我為左墮入角色，好天真咁問agent點解間屋咁x細? Agent哥哥話呢間係拆契樓，即係原本一個單位但已將契改做ABC，每個unit可獨立買賣，就因咁所以你仲搵到一百萬以下既盤。Well，肥嬸叫我只要扮有興趣買，跟手出門口同agent講好想間但唔夠錢，天真嬌咁問佢有咩辦法。我當然照做啦，而agent哥哥心裡一句:「x !!唔買就梗係租架啦!」之後好sincere咁同我講:「你可以租住先架! 還掂大家行左六層樓，無謂令我空手而回啦。」我用左肥嬸比我既12張冇mark number既一千蚊港紙，遞左比agent，簽個名之後，Deal!
相知肥嬸有咩部署，請看下回分解。
>>80後買樓記: 12回
