上回講到小玲比其他人更需理財，如老黎自住樓同收租樓搞唔掂真係只可望個仔照顧佢。須知永遠唔駛求人最舒服，睇下小玲個case可以點搞。
居屋不能按出套現
天水圍居屋應不能按出套現(因為售價1.1mil應該係未補地價價錢，要加按除非有社工證明到等錢洗)，此乃未補價居屋缺憾。建議補埋地價名正言順將呢間樓都租出埋，但諗樣認為賣出佢後買入元朗屯門一帶居屋、私樓更好但要自己補約五十萬。當然新買私樓面積會細過你而家間屋好多，如買居屋如兆軒苑可令觀感相近，呎價不足三千而百六萬還有選擇。咁樣做係要令自己手握私樓，而私樓第時加按出售都方便好多，起碼唔使房署批。新買間私樓她好快手租出去，趁你出面仲有宿舍住，等得私樓收番四五年租黎當初補五十萬買樓既借貸已還清。
如果公司宿舍冇得住，就用收番黎既租去租樓，等住約完先收番間樓自住。
「等」到唔駛補地價
另外元朗同屯門將有大型商場出現，帶旺人流，天水圍未見有此優勢，居屋好應該善價而沽。如買入好順景三百幾呎既單位，都係百五六萬，小玲租出去比你都收租六千蚊租，我當佢1.1mil賣出天水圍，再問銀行借五十萬買私樓或自由市場居屋，分十年還每月都係四千六蚊，根本對你生活質素無影響，另一借力打力。但該區租霸不少，小玲務必小心翼翼。
小玲問題相信係現時居屋業主所面對的: 居屋升埋都唔夠買私樓，買左私樓都比現時居所細好多。是的! 你而家住咁大就係政府比你既補貼。如手頭鬆動請就咁比首期買樓投資，住返係居屋為上策，始終政府福利唔要就笨。再唔係居屋比小朋友住，自己買私樓搬出去。如冇咩現金係身都建議你都要賣居屋，再買新西旺區私樓為上。梁生猛咁起居屋，你唔好聽agent講居屋一味會升，始終生雞係變唔到鳳凰。
小玲儲多兩年錢後可買多間放租，比六十萬首期及借七成上會。由於借得多今次要租客幫你還十幾年先將按揭全清。咁做係要得出你必需既結果: 手握至少兩間屋仔退休。例如用現金買入屯門市中心兩房收租，做七成上會月供六千元已足，收租可達$7500，收突左既千五蚊加上還本既幾千蚊，令你六十萬既首期支出每年得到每年七萬幾蚊回報。當然呢個假設係幾年後樓價同而家一樣。
前文已有數據證明用樓房收租可成功抵押通賬帶黎既貶值，至少過往三十年有效。小玲先要將手上件貨執靚佢，再買多間完成退休計劃。根據諗樣所見四十餘歲既單身女教師、護士係最熱衷去儲錢既，因為開始見到自己將老無所依，請莫怪諗樣實話實說! 小玲如快人一步趁仲年青去投資樓房，部署退休，絕對比他人早著先機，修成更好結果。讀者如看完本文有啟發，實在令諗樣不勝欣喜。