【價勢黨】王榮昆：H股退市潮 – 點解？

今個星期出咗單新聞，指恒大地產(3333)將以借殼上市方式回歸A股。 其實3333已經係呢排第7、8間有意放棄H股的公司了。除此之外，仲有861，917，1025，1333，3386，3699 – 呢批公司一係已經退H，一係表達咗意向要退。點解會有咁多公司想要回歸A股呢？ 港股市場有咩問題？
眾所周知，香港的IPO市場比較user friendly，而本港上市的公司在發行債券方面亦有優勢。但相比A股市場，H股在二級市場的股本融資（即配股、發股等運作）的效果就反而好唔理想。首先，港股整體市場情緒差，市場參與者反應差，H股想籌錢分分鐘未必籌到。其次，就算融資成功，但因為H股估值低，所以配股的價位又未必靚。呢兩條原因，已經令港股整體二級市場融資規模大幅減少了。
下圖為港交所2015年第一季及2016年第一季的港股市場融資數據。

將「集資總額」減去「首次上市集資總額」後， 我哋可以得到港股二級市場融資的總數。計算如下：
2015 1Q配股集資額 = 84,163 – 20,280 = 63,883 （單位為百萬港元）
2016 1Q配股集資額 = 80,235 – 27,965 = 52,270
由此可輕易發現，港股配股集資總額其實按年下降了18%。

相反，大陸A股係二級市場籌錢會易好多。由下圖的A股市場融資圖可見，A股在2014到2015年間，一級市場融資（IPO）與二級市場融資（增發或配股）的量皆大增。若只計二級市場融資的話，則2015年總額有近1萬3千億，按年增長差唔多成倍！可見大陸二級市場股本融資係幾咁旺。若冇其他途徑，則一間公司通過印股票去融資，雖然唔一定對股東最好，但成本一定較低。同時間，用A股批股的估值又高，籌到的錢定會多過位於本港的H股二級市場。如此一來，自然會有公司對「退H返A」呢種操作產生興趣與動機。

更有甚者，在A股市場，以定向增發(private placement)呢種模式籌錢的話，股價仲有大幾率得再彪。2015年A股有1,094次定向增發預案公佈，從預案公告日至今跑贏同期市場平均水平的有760次，佔7成。對有優質項目揸手，又有融資需要的老細們來說，A股的二級市場實在是個理想的遊樂場，暫時比H股好玩好多。

所以，當要解釋「點解H股要回歸A股？」呢條問題的時候，我唸最重要的原因始終都係：在A股市場籌錢易過係港股融資。而大陸公司建立境內的股權融資平台，亦有助於其提高境內融資渠道的多樣性，降低債務融資的風險。其二，H股估值较低，而A股市盈率普普通通都高過20倍，個別情況更高至50倍。公司可以用較高的估值發售股票，籌集到更多資金，今後也可以更高的價格減持套現股份，讓公司股東的利益實現最大化。好似拉夏貝爾（6116）呢間公司，當初A股IPO停擺，係大陸上唔到市，就轉咗過嚟香港上，而最近就正正因為上述兩個原因而再投A股的。

講到港股好似一棟都冇，咁是否大多數中資股都會籌備緊集體退出H股？咁我哋仲玩乜？係咪需要好驚港股市場被A股淘汰？請留意我們這個系列的第二篇拆局文章。

王榮昆【勇者鬥鱷龍，有危有冇機？】WK02（NEW）