======附件=======
======附件=======
上週初，我講過對市況唔係睇得太通，但今週情況就變得明朗好多，有啲行業係值得大家去留意，今日就同大家講吓。
首先，係一啲強勢股，如果走勢再轉強，就值得要密切留意。其中一隻，係我哋好多人都鍾意嘅EPAM。
EPAM，其實喺過去幾個月都升唔起。通常我嘅做法，就係喺呢啲時候，換碼至其他較強嘅股票。例如可能你走去買ARK 嘅ETF，回報已經會更好。但隨著EPAM 嘅股價上升，我哋又可以睇下自己倉位內嘅股票，會否有邊隻嘅走勢轉弱，係嘅話，我就會考慮換碼。
EPAM，止蝕位係$33.68，暫時稍遠少少，可以買但注碼要收細啲，待之後如有整固出現，再升之時就可買入。
另外，雲端行業嘅股票，都非常強勢。想分散風險嘅，可買入ETF，大家可留意SKYY。
同樣地，現時SKYY 嘅價格離止蝕位$92.19有啲遠，現價可買入但注碼宜收細一啲，待股價稍作回調然後再升嘅時候，可以加注。
可以承受較高風險嘅朋友，TDOC都大家都可以選擇。
考慮到TDOC嘅上落幅度，止蝕位$257.00，其實唔算遠。但當然，大家喺買呢隻股票之前，係要考慮自己會否坐得穩。如係想要啲穩定啲嘅股票的話，就未必係呢隻。
而除咗係雲端股票之外，Biotech 都係好強嘅板塊，但此板塊嘅個股幾乎隻隻上落都極大，絕對唔容易玩，但放喺隻ETF入面，就升得好平穩。XBI，止蝕位係$148.88，唔跌穿可以繼續揸。
另外，QQQ 嘅走勢都有所好轉，可以買入。QQQ係納指嘅ETF，止蝕位$312.76，唔算太遠，現價可以買入，唔跌穿可以繼續揸。
而或者大家都知道，我買股係鍾意喺調整企穩嘅時間買，現時美股嘅大市就正係處於呢個情況。
當然，其餘恒常大家正持有中嘅股票同ETF，走勢靚嘅都可以繼續揸。星期三再講。