======附件=======
======附件=======
首先，我想坦白同大家講，對於美股現時嘅情況，我都唔係太睇得通。但睇唔通還睇唔通，做法亦可以同大家分享。所以，今日我會想集中同大家講，即使睇唔通個市況，但部署可以點樣做。
美股，未來走向，我暫時真係掌握唔到，但大家要好小心一種形態，就係如果個市喺反彈出現後好快再穿底，咁個市真係有機會轉入跌勢。
通常，當個市由高位第一次下跌之時，市場都會有資金被吸引進場，股市就會有反彈。但若於反彈後，市況好快再度轉差，之前已入市嘅資金都變成要輸錢，能再入市嘅買入力量就會減少，市況就會變得更易跌難升，呢樣就係我哋要擔心嘅事。
反彈係會有嘅，但我嘅觀察重點係呢次反彈後，市況會從此好轉，定係再跌。而現時，情況難以預測，所以亦係我話暫時嘅市況唔係太睇得通嘅原因。
至於做法，我自己減持咗手上大部份嘅股票，再喺低位部署Short Put，如股票唔大跌，就會一直有時間值收入，例如股價大跌，就會喺現價低兩至三成的位置，回購已沽出嘅股票。現時，普遍美股期權嘅引伸波幅都好高，做Short Put嘅回報都相當唔錯。但有一點要同大家講，做Short Put要穩陣，就要有能力去接貨。萬一股價大跌，咁樣你最多都係要喺低位買啲股票返嚟。但如果Short Put倉位做得太大，一旦股價跌得太深，風險就會好高。
再講一講個市，上星期，基本上啲股票係跌得好全面。而通常喺呢啲咁全面嘅跌市出現後，係點都會有一啲反彈出現，但正如以上所講，要留意嘅係反彈後市況嘅變化。如情況好轉，今週稍後時間我有機會再度入市買貨。但若情況轉差，就反會轉手開淡倉。我會繼續留意住個情況，星期三再講。