你話美股今年有機會跌返四五千點（好多咩？十幾巴仙咋喎），絶對唔奇。但到時就係機會。當然，亦有可能你根本等唔到。係呀，可能發生，又可能唔發生。包生仔？
你睇幾多perma bear 2008年一路等等等，係咁話「印銀紙」解決唔到問題（但解決咗我好多問題）。鬧鬧鬧，好快股災。等足12年。你可以睇下中途 大家樂貴咗幾多，太古城貴咗幾多，上東莞（食米粉啩，聽朋友講，我從冇去過）貴咗幾多。
好啦，等到2020年，等到啦，又點？「死緊好多人呀」（事實）「經濟大衰退呀」（都係事實）。但，又點？
12月嘅「小非農」。街估升6萬個職位，結果跌12萬個。仲係4月嚟第一次跌。而11月係升30萬個。差到七彩
但，「即係冇得加息啦」。「又要撻返著印銀紙機」。你咪鬧聯儲局無良，但世界唔因你主觀意願改變。
再講白啲，你咪當可能2020咁重演咯，但小型啲咁解。講到好明啦？
事實喎，中國經濟講緊放慢（仲有人覺得舊年復蘇假嘅，咁你即係話Nike LV 愛瑪士全部講大話，全部都比中共收買呀可？慢慢）。英國再封城，已經估雙底衰退。美國再見到就業數字咁差。可能就2020重演咁咯。
