【李聲揚】王維基最開心吧。但，買股票會唔會畀人鬧？

TLDR：1137今日有冇得升？小小吧，一個消息點炒兩次？同場加映Michael Sandel式兩千字討論買疫情受惠股係咪人血饅頭

1. 大家當然會講跳老舞群組，以及啲年紀分佈，同埋君臨天下。呢啲交畀友版 新田飛地講啦 （不過佢呢排好似好忙）。本人呢，都係關心 王維基隻HKTV Mall 1137多啲。

2. 忽然醒起日本311地震時，本人都係叫訓身買落去。當時都畀中學師奶質疑我冷血。我不知道呢個係讚定彈，是但。反正最後互噴一輪口水，都係誰也說服不了誰。而當然可以話「嘩死咁多人你仲掛住呢啲」，不過，首先我（當時）嘅工作就係提供意見提供分析，你放工寫返幾萬字悼念，兩者並無矛盾。二來，再諗下，市場點都係有人買，否則就唔係跌10% 跌20%，係跌到冇成交。咁難道買嗰啲又冷血？好多都係日本人本身吧。當然再誇張啲嘅，可以講到你買落去先係支持日本人，又好似啱喎。

3. 講到尾，我覺得係WFC的。再睇另一個情況，美國911，當時我都仲在英國讀書。但你可以睇返，美股大跌後，媒體又好，投行又好，都係叫買。並不存在咩人血饅頭，唔好用得咁濫。

4. 我諗個關鍵係，你唔係「bet on other’s lives」嘛。掉轉頭，賣保險買保險嘅，都知有insurable interest，你不能幫個陌生人買人壽，佢死咗你有錢分。除咗係防止你去搵人斬死佢外，亦因為「拎人地條命嚟賭」，本質上就好多人不能接受。Michael Sandel在《Justice》之中有講（點會少得佢呢），仲有講Death Pool—例如我開個盤去買啲名人（成龍？江澤民？Morgan Freeman？）邊個死先。似乎唔會令你謀害佢，但本質上都係有啲問題。

5. 但，what about 有啲公司，幫自己嘅員工買保險（美國有的）？你死咗，公司有錢分。會唔會令佢疏忽啲？可能唔會，但，你係員工，會唔會唔多自在？

6. What about 所謂嘅prediction markets？政治期貨，林鄭幾時落台固然有得賭，但曾幾何時，連恐怖襲擊都有得賭，仲要係睇死幾多人派彩，就大有問題了

7. 咁以上種種涉及人命，爭議應該冇咁多，絶大多數人都覺得唔應該拎嚟做注碼。正如之前貼過個網，Election betting odds（https://bityl.co/4YO0），有得賭侵侵會唔唔會做晒成個任期。做唔晒嘅，whatever reason，都派彩。咁除咗自己辭職外，當然仲有猝死或其他意外。但唯獨係唔賠行刺，相信都係類似原因。

8. 但，如果唔涉及人命呢？只係在他人嘅mishap或痛苦身上獲利，有冇問題？似乎係冇的。

9. 首先，人命是人命，但痛苦就好難去量度。如果在他人嘅痛苦身上獲利有問題，咁即係，唔使打牌，唔使賭波，甚至唔使踢波了—你入波人地好傷心，可能人地啲球迷跳樓喎。但應該冇乜人覺得，我要對你嘅不幸負責。

10. 如果你講金融市場（留意我特登唔用「投資」），唔少遊戲，根本係 zero sum（但股票唔係！呢個真係常見謬誤）。你炒期貨嘅，你贏錢就有人輸錢架啦。

11. 但留意返，股票唔係呢回事，係positive sum game所以同賭錢或炒期指唔同。你3蚊買1137，渣到上12蚊，係冇人有損失的。當然我聽過有人話，冇買股票嘅會眼紅，生活水準會不如你 — 個龍門搬到咁濶嘅，就真係唔掂，即係我去食餐米芝蓮都會有人唔開心咁咯。

12. 界線，永遠都係唔多清。又睇下另一個例子，唔少人都有睇The Big Shot套戲，網友梗係覺得好睇，因為個個都係口水put，日日以為爆煲嘛，眾人皆醉我獨醒喎，全世界仆街得自己睇啱，幾咁開心。但故事主人翁真金白銀買落去，唔係上網出post。

13. 但留意嘅係，主人翁最後卒之等到爆煲，十分開心，跳老舞yeah．賺錢其次，證明自己啱先緊要。但呀廢老畢彼特制止佢地，叫佢地Don’t fucking dance（https://ytube.io/3BYc）。點解？因為佢地贏錢，代表美國仆街，大把人流離失所要訓街，妻離子散。

14. 呢班人明顯係bet on other’s mishap．唔覺當年有乜人話有問題喎。退一萬步，個撚個都話買支爆 買聯匯爆煲 當 Kyle Bass 係偶像 係呀 美國加息呀 香港樓市崩潰呀 你班供樓嘅燒炭啦。又如何？好似冇人話不道德喎。

15. 返返去買保險個例，我諗其中一個好大嘅關鍵，就係你有冇份「引起」或者「加速」人地嘅不幸同痛苦。冇嘅，似乎冇乜問題。有嘅，就比較有問題。（＊）

16. 例如講過CDS，Credit default Swap，買國家或公司爆煲，佢爆煲你有錢賠，都幾有爭議。本質上就同保險差不多，你都冇insurable interest。當然公司唔係人命。不過問題係，你買落去，有機會加速咗個過程喎。個CDS spared大升，人人覺得個國家或間嘢唔掂，融資成本更加，最後就self fulfilling．呢個亦係好多國家有時禁沽空嘅理據，你不停質低個價，兼且好可能去散播謠言，間公司就冇事都變有事。同你去周圍唱話銀行唔掂去擠提差不多。

17. 講返，311又好，911又好。你冇令到呢件事發生嘛，甚至冇加速呢件事發生。所以你事後去叫人買，我覺得係絶冇問題的。

18. 不過都加返句，但凡涉及人命嘅，標準都係高好多。例如之前嘅例子，買總統下台唔包遇刺，因為真係怕有啲友為咗贏錢去殺人（國定殺戳日？）。你不能幫個陌生人買保險，原因亦一樣。但Death Pool呢？我去買 成龍/江澤民 釘蓋，唔會加速咗有人去隊冧佢下話？但一樣被視為不道德

19. 以上種種講嘅係人命，但如果去到疫情，又好似唔係同一回事。唔少公司嘅股價同生意都大升，你總不人話人地發死人財，甚至你無限上綱嘅，藥廠由頭到尾都係做呢啲生意架啦，「殯儀館都係」「你唔病醫生邊有生意做」。咁你去買Zoom 買Netflix，又係咪人血饅頭？似乎唔係

20. 講咗咁多，都失晒焦。但我都係想講，喂，1137呀！第四波疫情，今日有冇得大升？為咗避免畀人批判，同埋都真係自己反省下，我諗咗以上嘅嘢。

21. 其實之前寫過好多，好多，好多次。再重覆一次。每次啲確診數字爆上去呢，1137就勁升的。你甚至唔使睇政府記者會（再講多次，股票一定炒將來，所以 fuck that 股市同實體經濟脫節）。朝早某啲傳媒，總會早早爆確診數字

22. 咁，今日隻1137有冇得大升？我就覺得有啲保留。因為，「今次係星期日出嘅數字」，「可能今日（星期一）跌返呢」。況且都係的，市場都有抗藥性，上星期五先升完十幾巴仙（圖中下半），今日又係咪照升多次？同樣道理，你見第一次輝瑞話有疫苗時，道指升1600點。到一星期後Moderna再講，反應已經細好多。

23. 哲學啲講，「你不能跨過同一條河兩次」。但又同樣地，「一個消息」點炒兩次？星期五個數字已經咁，咁去到星期日爆得更多，係咪完全意外？係咪「新資訊」？記住股票只反映「新資訊」。

（＊）不過話說回頭，了解「人血饅頭」典故嘅，都知道群眾都冇份害死人，對不？所以魯迅係批評佢地（亦即係中國人as a whole）嘅愚眛，似乎唔係批評佢地係賤格。

============

了解更多：股市漁夫系統 免費試用

股市漁夫是一套高績效的選股系統，系統運用技術分析配合統計學製作出不同指標顯示短、中、長線的港股表現；較一般指數更能反映真實市況，對分析後市走勢有絕對的優勢。股市漁夫選股系統透過精密的方程式去找出股票強弱勢頭，全天侯自動分析個股走勢、突破股、大市評論及視頻等功能。莊博士獨家的運算方程用 「破勢」、「止賺」把機會向用戶展示。漁夫選股系統更有不同種類之篩選股票準則來提高勝算。

 

莊志雄博士為股市漁夫創辦人及香港大學專業進修學院客席講師，並在Now 財經台合作主持《名家給力場》。
股市漁夫是香港財經媒體，而股市漁夫選股系統由莊志雄博士及成家博客Homeblogger團隊共同研發，2018年 11 月11日正式推出，此前莊志雄博士曾任職《信報》研究部主管，並先後於和記黃埔、AXA安盛、永泰地產有限公司、永道管理顧問有限公司（Coopers & Lybrand）等不同類型企業及上市集團擔任管理顧問、財務及市場分析工作，涉及範疇包括資產管理、地產、電訊及電子商貿等。