教書請病假，有人代課，但搵邊個代？
TLDR：我位教書舊同事，40日請18日病假。見埋報。但講真，又點呢？其實我原本唔想寫，但唔止一個人點唱，咁咪寫。
1. 應該好多人知道埃汾教過書，私校教過，津校亦教過。梗係教數學，唔通教經濟咩。咁我教嗰間學校呢，有位舊同事見咗報，我費事貼出嚟，亦唔建議大家咁做。當然我阻止唔到你在comment貼，一般我都唔會刪（但可能成個post delete），但最好唔好。因為我唔係想討論佢．我同佢冇聯絡，但當年亦有幾句，冇乜咩交情，但絶無私怨（＊），純講事。「真係好想知嘅，咪PM」。我唔想影響當事人，亦唔想失焦，亦唔想變成起底或講是非大會。
2. 話說我舊同事（女仔，但唔係我追嗰個，放心）做乜見報？唔太好嘅嘢啦。講佢請病假破晒紀錄，幾百堂，勁過卓伯棠，勁過百味堂。40個上學日，請咗18日。咁但，病就要請假架啦，我亦唔打算去研究人地嘅健康狀況。再講一次，我唔係想討論佢，係想討論「老師請病假」呢件事。
3. 我係到教咗書先真係了解，到底老師請病假會點安排，其實一早應該諗同諗到。
4. 教書嘅，如非必要都唔會請病假，因為真係好煩。煩有幾重意思。首先教得書嘅，都真係對學生有啲良心，唔會亂射波。另外，教書嘅嘢，唔存在你啲嘢會有人幫你做，你啲學生進度落後咗，你咪自己搞返掂，薄未改，咪你自己改返，俄羅斯方塊咁（＊＊）。三來，可能係本校特有，但請病假，要親自打畀老校（當年未有whatsapp），都係有啲壓力的（我點知？因為我都請過），因為呀校長都真係比較……有霸氣（此人亦經常見報，不過去咗第間了）。四來，你會累到啲同事！呢點先重要
5. 咁大家做過學生都知，老師請假，總要有條友嚟睇住你地。但搵邊個？當時我都冇諗呢個問題。咁當然，係搵吉堂嘅老師，但往往都唔止一個，咁搵邊個？一般冇人會自願。
6. 當年，小弟做「教務組」，其中一個功能就係安排呢啲嘢。但亦講真，你去點人，實有問題。特別係我只係一個第一年教書嘅小薯。咁我校係新校，已經比較好，冇啲千年老屎忽擺款或者太極神功。但始終，一間教員室幾個吉堂老師，你點邊個都會有問題。呢個又話上次都係我，嗰個又會話自己唔舒服。更唔好講會有人借尿遁，索性吉堂唔留在教員室。
7. 所以，我地係將成件事制度化嘅，好事，唔使拗。制度唔係我諗出嚟，之前有人諗落，我只係執行，大家亦都well known，冇人異議。異議嘅自己同老校解釋，老校必然屌到你上天花板（＊＊＊）
8. 機制好簡單，就係用者自付，你要人代課咪代返人地課。人必自侮然後侯姆斯。
9. 實際上是咁的，你嗰日病假（其實唔一定病假，其他嘢都係），當你有三堂要搵人代，你個Balance咪負3．你代咗人地3堂呢，你嘅Balance咪正3。咁但凡有人缺課要搵人代課，咪在吉堂嗰堆人之中，搵個負數最勁嘅去咯！咁你之後會加返上去，咪唔會一路都係你代。同時間成日缺課嘅又會要填返數。
10. 係咪完美先！而有咗呢個制度後，同事吉堂係不能走開的。你去咗洗手間或者小食部都好，都會call你。2004年人人有手提啦。唔接機？咁參考返樓上，自己同老校解釋
11. 好啦，但執行上仲有啲小問題。「如果同分呢？」。即係，比較文明地呢，會有人自願的。但真係試過有一鑊，大家唔肯，咁本人話「咁抽啤牌啦！」。何來有啤牌？「唔記得話你知我係帶橋牌學會嘅」「所以同事一切賭局都會搵我帶」。
12. 而嗰鑊，兩個賴皮嘅阿蛇，居然有一個問我：計階磚大定梅花大（＊＊＊＊＊）？好嘢！好撚嘢！我真係好似朗尼對住球證拍手咁話，「呀乜SIR你好嘢，我錯，我去代，你兩位唔好爭」。
13. 仲有，有人留意到，呢個機制其實係防君子防唔到小人。實情好多機制都係。咁你話，有啲人根本係鐵人嚟架喎，從來唔會請病假，數字只會一路正上去。是的，咁但尤幸，唔一定係病假，有時老師要帶隊呀，或者各樣奇難雜症，都會缺課。
14. 另一樣嘢，就係好似我舊同事咁，係無底深洞嚟的。係呀，佢係長期負數，到有人請病假咪佢代— 但根本，好多時佢本人都同時病假，冇得代。再加上，佢代得人一兩堂，之後兩日又請返十堂八堂，咪俄羅斯方塊。
15. 再講一次，唔好以為我批判佢，真係唔關我事，況且十幾廿年前嘅事了。我只係奇怪，原來到而家都係咁情況啫。同埋旨在講解下個機制，以及各種往事。
16. 講真，咁佢請得咁多病假嘅，總不能篤手指嘛。討論可以，但我唔想變成人身攻擊或講事非。畢竟，佢請得咁多病假，會唔會情緒病，或其他嘢？咁我當然唔去猜度人地私隱啦。留點口德好。
（＊）OK，彩蛋。話時有套戲叫做《四仔旅行團》（Road Trip）（https://bityl.co/4WEB）．公路電影，幾好笑。當時另一同事算係影迷，睇完覺得好正，就拎咗隻VCD返嚟大家輪住睇，當然拎返屋企睇，我地未痴線到在教員室睇（雖然後來我地在禮堂開projector打機）。我睇緊嗰時，呀主角就跟機，叫我睇完畀佢，佢仲煞有介事咁在個位度貼住張memo提自己「記得問李Sir拎四仔」。咁然後你估到了，有次老校上嚟教員室（老校在地下，我地在六樓定七樓），見到呢張memo．都搞到我解釋咗一陣
（＊＊）當年我地改薄改卷，我真會係哼俄羅斯方塊嘅主題曲的。特別係一堆又一堆新薄堆上嚟嗰時。
（＊＊＊）是真的，所有人都畀佢狂炳過，我都不例外（＊＊＊＊），當然佢唔會講粗口，講都係講英文，而差不多每一個搣時都畀佢鬧喊過，唯獨係當年我追嗰個冇（即係，我整Tiramisu嗰個，呼，青春）。可能就係鍾意佢呢種外柔內剛，同埋倔強。
（＊＊＊＊）埃汾畀佢狂炳嗰鑊就正咯，當然唔係因為我上堂講粗口（呼，青春）。而係因為……煲燶湯！係，就係煲燶湯！Technically唔係我煲燶，但幾個一齊，就集體一齊炳。我仲記得嗰兜係蘋果瘦肉湯。點解我記得？因為我搞架咯！點解係蘋果瘦肉湯？因為易搞！而老校當然唔會容許滾湯。聽聞早一年有人整過「牛丸湯」，「之後就冇續約啦」，而老校知道我搞呢個蘋果瘦肉湯（係！要事先話佢知！micro manage之極致！），話「簡直突破人類文明底線，不過理科老師係咁上下」。我心諗，挑，我識寫情信寫整Tiramisu又要話你知？
（＊＊＊＊＊）拿，你地就有所不知啦。一般香港打啤，都係階磚最細，鋤大dee都係階磚3出先。但打橋牌呢，就梅花最後， 順字母，clubs diamond hearts spade嘛。都話我帶橋牌學會！你估呃你？