歡迎大家加入新開設「美股研究報告」會員專用 Facebook 群組
https://www.facebook.com/groups/386563215606501/
===============
星期一講過，如果昨晚個市有得升，咁就可以揾嘢買。相反，就要忍手，唔好買嘢住。而最後，若然大家有睇市的話，就會知除咗喺開市無耐嘅時候，個市叫做有少少上升力度之外，之後就開始轉差。而今早我用Metastock 掃ETF嘅時候，根本就連一隻值得買入嘅ETF都無。所以，暫時都係唔好買嘢住。
但呢個暫時，未必太耐，如市況有好轉，兩三日後，成件事可能已經唔同哂。我都知，喺呢度，我未必可以做到最即時嘅提點，所以，我決定將一個我自己都會用嘅方法，教畀大家。
先click 入以下網站。
finviz嘅map 功能，好用得嚟，仲要只要你唔使real time 數據，就係免費。而我最鍾意嘅，就係將佢個map 嘅時期，調校成一個星期，我認為咁樣，我喺呢個map 睇到嘅嘢會係最多。
過去一個星期，除咗一啲個別板塊之外，大部份行業的股票，表現都好差。
咁呢啲個別板塊嘅股票，值唔值得買？
我覺得，都係唔好喇。因為喺呢啲市況中，只係表現稍好嘅板塊，表現都未必可以持續造好。反而，我會等個市好返先再買嘢。
但放心，只要市況好轉，兩三個交易日之後，呢個map 上面嘅形勢，就已經可以有好大分別。
然後，下步點做？
Keep 住今日嘅呢張map，再每隔一兩日睇一睇市況究竟有咩變化，睇吓有咩板塊明顯轉做強勢，咁嗰啲，就係我哋嚟緊揾嘢買嘅主力範圍。但暫時，我真係睇唔到有邊啲行業或ETF，值得我哋去買，所以，唔好博住。
最後，要留意一樣嘢，就算美股再次造好，升嘅股票都可能會有唔同，所以唔好一定要買返上一浪嘅強勢股票，要細心留意股市嘅變化。當然，有任何發現，我會再update大家。