課程編號：CC002
================================
睇實美匯指數就大約估到股市點行
Matt Levine on「股市脫離實體經濟」
我地崇基人，唔係東亞逸夫
睇實美匯指數就大約估到股市點行
其實原本都仲係想講港紙（又在強方），銀行體系結餘（又升）同埋拆息（又再跌）。不過，為免大家覺得呃稿費，不如講下美金。
樓上係美金，美匯指數嘅一年圖。十分重要，你見3月嗰浸，美金就由低位狂升，股市大跌。之後3月尾就嘔返一半升幅出嚟，股市大升。然後到近來又係美金大跌，股市大升。
話美金同股市係逆向關係，應該冇乜人反對啦可？
咁港股係咪？答案都係。你見我成日恥笑啲咩外資撤尼呀，港紙呀，拆息呀，銀行體系結餘呀，沽空呀乜鬼，根本就唔係好多人諗嘅嗰回事。邊個話你知港紙跌就資金流出股市會跌？邊個話沽空多之後會跌？
但，美匯指數，就真係一個好好嘅指標（另一個係企業盈利增長，有機會分享）。樓上呢組圖（我整嘅）我好鍾意。一個係美匯指數按年升跌，另一個係恒指按年升跌，兩個都係百份比。明顯見到，差不多係完全負相關，一個升一個跌。
但，難在邊？難在，我點估美匯指數點行？答案係：其實唔係好估到。否則發咗達。兩者近乎係同步嘅。事後解釋易，事前估難。而根本都唔係好知係乜推郁美匯。但幾肯定唔係聯儲局加息減息（再講一次！思考唔好咁單方咁表面咁線性）
我嘅理論（其實唔係咩好特別嘅嘢，好多人都知）好簡單，美匯指數，港股，當然係呈負相關嘅關係。因為兩者都係受同一樣嘢影響，就係風險胃納。
人人都驚到賴屎時，梗係買美金。中東佬南美佬大陸佬點反美都照買美金，或美債。打得嘛，安全嘛。咁梗係股票跌。到貪心時，就唔要美債啦，丁屎咁多回報，買股票啦。個相關性係咁嚟
所以，以上呢堆嘢，未必幫到你好易賺錢（其實冇乜方法可以好易賺錢，有嘅介紹我知）。但至少令你知個世界點運作。
Matt Levine on「股市脫離實體經濟」
關於股市脫離實體經濟云云，講左好多，今次專欄唔再講。但畀篇文你睇，好過再聽我講。雖然
好似都講過，Bloomberg嘅Matt Levine，口水多過茶，但我好鍾意睇佢寫文。而且佢本身之前做高盛，唔係紙上談會。留意佢都有講點解「股市脫離實體經濟」。我就唔譯篇文了，自己睇，應該免費的。
但一句，如果有學院派背景嘅，咁你知道金融資產，價值就係discounted cash flow。咁所以，一季盈利大跌又如何？只係你個Excel幾百個column冇咗一個（股票suppose係perpetual，無限遠嘅cash flow），真係會對股價咁大影響？
你話點解會彈三四成，我一樣可以話，最初點解要跌三四成？
Oh by the way，個discounted cash flow嘅分母，你個interest rate，仲要跌咗好多。
根本，本來無一物，何處惹塵埃。好多人嘅諗法，由第一刻已經係錯。有機會我再講更多。但，話「股市脫離實體經濟」，何解你會覺得，股市係反映實體經濟？邊個教你？講嗰個買過股票未？
頂多，股市只係反映，上市嘅嗰堆公司，未來幾十年嘅盈利。堅持股市要反映實體經濟嘅，咁做乜咁多股票之前會跌四五成？未來幾十年嘅盈利，每一年（留意係每一年）都冇咗四五成？甚至乎你有冇計埋資金成本平咗幾多？
我地崇基人，唔係東亞逸夫
OK，埃汾唔係崇基人，甚至唔係中大人。但講返，真係早兩日先在王冠一網台講過隻東亞（23）。我覺得係搏得過的。今日再升後都諗得過。賣盤重組賣資產之類，應該成定局，爭在點賣。咁當然可能最後乜都冇。但，由爆出有進展，到而家，只係升咗25%左右。如果最後真係成間賣，或者賣香港銀行/大陸銀行業務，應該仲有水位的。當然，如果最後只係求其賣咩保險業務，甚至乜都唔賣，咪打回原型— 但，Elliot 唔會放過佢吧？
但當然，呢啲只係相當event-driven，短期嘅玩法。長遠啲嚟睇，東亞呢啲公司，投資價值，近乎係冇。只有被收購嘅價值。