Bossini 強中自有強中手
就業報告
恒指季檢
國指季檢
版務
Bossini 強中自有強中手
今朝居然唔只一個讀者問Bossini （592）呢單刁，原本係3億市值都唔夠。但的確過癮，不妨講下。份嘢唔難明，個刁都唔太複雜。就係賣盤。賣盤，睇幾樣嘢，作價，買方，賣方，形式。
賣方，簡單啲，而家股東，羅家聖。買方，一間新公司。八成係非凡中國（8032）持有，兩成係羅正杰。介紹返，羅正杰係羅家聖侄仔。而非凡中國，大股東係李寧及其家人，非凡中國寧外又渣住上市嘅李寧（2331）13.5%。
買嘅，就係羅家聖渣住嘅股592股權，66.6%。
出價就型咯！係4662萬！買起大半間上市公司，真係一個單位咁價錢。每股計呢？係0.043。你冇睇錯，4仙3—而明明公司之前都仲係毫子股，昨日（星期四）收0.148
係咪夠晒奇怪？隻嘢明明0.148，有人出0.043嘅侮辱價買，已經夠鬼。更加鬼係居然大股東肯賣？咩事？星期四隻嘢都仲有2.4億市值，羅家聖堆貨都值1.6億，做乜4千萬畀人？
另外仲要留意，其實 Bossini 呢，5.6億book，2.6億net cash，冇債的。當然呢個係舊年12月尾嘅事，公司舊年下半年都蝕成億，咁今年頭半年蝕多幾億唔出奇，可能因為咁被迫要賣。解釋之一
另一解釋係，估仲有嘢會唧入嚟，甚至成為李寧嘅小號（但已經兩間上市公司，2331同8032，使唔使再搵多間？）。
呢度要講個關鍵，留意返，唔係諗住除牌，係諗住維持返個上市地位。咁就爭好遠。事實係收購方要向小股東用同樣價錢（0.043）提出收購，但你唔會睬佢。所以就係轉咗手，羅家聖退出，新股東（非凡八成羅正杰兩成）頂上，對你冇乜影響，
頭先都話，Bossini截到舊年年尾為止，一個仙債都冇，入股嘅其實冇乜嘢要孭起，摺晒啲現有業務都仲得。
話「憧憬bossini控股權交到羅氏集團話事的家族年輕一代成員手上，bossini或有更佳的發展。」，我就真係唔信。朋友話頭呢啲品牌邊有價值？況且，話咩事呢？轉莊後，渣住Bossini間嘢，羅正杰只係佔兩成，話乜事？明顯拱手讓畀大陸佬了
大陸可以當潮牌咁賣返大陸（FILA ?）定可能估大陸佬會有新發展？有嘢唧入嚟？好似啲乜乜母公司注入資產咁？我就唔係太樂觀。但，即係，升完都只係3.7億市值，仲好似係冇乜債嘅，師奶話頭，「殼價都唔止」。去到呢啲位，乜都可以炒一餐。
就業報告
想講一講美國嘅首次申領失業救濟人數，係昨晚（星期四）出嘅。好同壞睇你點睇。話壞嘅，最新一星期仲有近300萬人首次申領失業救濟，比預期嘅270萬多唔少。但如果向好方面睇嘅，你見個數字一路跌緊，6連跌了。
另一方面，可以留意埋持續申領失業救濟嘅人數。當然仲係升緊，但最新數字係2283萬人，比再上星期嘅2238萬人只係多咗四十幾萬—三月以嚟最低嘅數字，亦畀首次申領失業救濟嘅300萬少（好多申請嘅未必會成功，亦有啲之前領開嘅搵到工）
所以你見美股星期四文係V型反彈—其實對上咁多次出首次申領失業救濟數據，美股好似次次都升的。
恒指季檢
夠晒反高潮，之前以為恒指今次季檢會有嘢睇，結果連續第N次（好似連續四次）冇事發生。之前原本一路以為太古（19）會被踢出藍籌，結果有驚無險又可以吊多一季命—你見我咁寫，都估到，我認為太古被踢出應該只係時間問題。頂多今季未必頂到下一季，除非業務有極大改善，但機會不大。而只係國泰（293）已經夠拖低佢。國泰2017年尾被踢出恒指，母公司太古應該都會好快跟返。
留意，下星期一恒生指數公司會再有嘢宣佈，亦係大家要期待嘅。就係宣佈同股不同權嘅公司係咪可以入恒指。影響嘅係阿里巴巴（9988），美團（3690）同埋小米（1810）嘅命運。而我相信無論如何，都會或多或少納入呢啲公司，最多可能市值有要求，上市歷史要有一定長，或者個比重有限制之類。
有人歡喜有人愁，有新成員的話，太古讓位更加就迫切。不過你見之前股價咁差，唔多唔少都係因為估佢會踢走。可能短期會反彈返嘅。而如果只講價值，我認為太古都係吸引。藍唔藍籌，虛名嚟啫
國指季檢
快手講下，國企指數有執位，三入三山。入嘅係聯通（762），世茂（813）、蒙牛（2319），出嘅係新華保險（1336），中交建（1800），海通證券（6837）。6月8號生效，即係6月5日星期五收市後執位，嗰日就會有異動。
亦有可能，根本星期一就會異動，有效市場嘛。炒升嘅，應該睇隻蒙牛。跌嘅，睇中交建同海通。當然計過數，下星期一詳解。但今日寫定費事你錯失機會。
版務
今日難得超過一個讀者都直接PM我問我Bossini 呢單嘢，畀到靈感我。我當然有留意呢單嘢，但因為市值太細，唔係有人問我未必會寫。其實最好就係咁，話我知你地想睇乜，大家好。可以直接whatsapp 我 9809 8494，在Faceook Inbox我又得，再唔係email [email protected] 都可以。