【莫家強】鍾意留意一啲出完業績,表現唔錯

我仲有一個方法,今日想同大家分享。

我會鍾意留意一啲出完業績,表現唔錯,然後股價又能夠企穩嘅股票。通常,呢啲股票,往後會再升嘅機會較高,而風險亦會較低。

不過,等業績,有個唔好處,就係如果隻股業績好的話,股價已經飛天。例如,有啲朋友都知,我睇好一隻做胰島素泵嘅股票,就係呢個情況。

咁我會點做?

首先,我會喺低位部署Short Put,賺住時間值先。因為頭先講過,一啲業績又好,業績後股價又可以企穩嘅股票,小跌唔出奇,但大跌嘅機會較低,如果碰啱期權金水平偏高的話,做Short Put最好。

如果我係有心接貨,Short Put行使價可以唔使揀咁低。

Short Put嘅用途,就係攞嚟一邊收住息,一邊等機會低位接貨。如果你無能力接貨,風險當然大。但若然根本就係想低位買隻股票返嚟,咁我就覺得唔係啲咩風險。

收住錢先,然後再等隻股出現整固完再上嘅形勢時,我就會追貨。

但以下,有兩個要點要注意。

1) 你都可能會睇錯股,所以你都要有個位置,如果隻正股跌邊咗,都要走人。但當然,你用SP,個止蝕價可以比你玩股票時set遠少少,誤鳴嘅機會較細,呢個係你睇得玩期權有優勢嘅地方。
2) 唔好淨係睇一兩隻股票。做SP嘅竅門,係你會想分散啲。最好嘅情況,係有啲股票要接貨,有啲股票唔使接。

隻隻都接哂貨,風險會高,壓力會大。隻隻都無貨,一到升市,又會好空虛。

玩得期權,短線嘅股價弱勢,唔會傷到你。就算係你估錯咗少少市,你亦會照樣可以贏錢。只要,大勢唔好錯就可以。

而美股嘅大勢,簡單講,仲係升。

即係如果你揀啱股票,雞翼又升,瑜伽衫又升,納指又升,研究報告講過嘅醫療包裝股今日又破頂,即係對我嚟講,美國嘅走勢係非常正面。

有啲股票,我甚至係想佢跌一跌再升,但都唔知有無機會。

總括而言,用啱方法,分散好風險,暫時唔使有太多雜念,繼續睇升就可以。情況有變,我會再update大家。暫時繼續享受住個升浪先啦。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室