【莫家強】成日都係升市就無份

有朋友問,佢啲timing 錯哂,成日都係升市就無份,跌市止蝕就吓吓中,想知可以點樣改善。

如果你都有呢個問題,我想問返你,你係咪嗰啲會喺升市就會諗個市幾時跌,跌時就會諗個市幾時升嘅人?

例如,近日個市升得咁靚,但你會唔會就係喺度諗,究竟個市幾時會跌?

如果你有呢個諗頭,當然你買貨就會有顧忌,自然就會令你升勢賺唔到錢。

又例如,喺跌市入面,你成日諗住撈底,博反彈,博得中當然無問題,但如果博早咗,記住一樣嘢,好多時候黎明來臨前都係最點黑暗,市況見底前都係最恐慌,撈底係好難玩嘅遊戲,要贏真係要有技術有運,缺少一樣,都好難贏。

但點樣先可以容易贏?

點解唔試吓,升市去睇升,跌市去睇跌,順返住個勢嚟行。

例如,個市升得咁好,你咪繼續享受住個升幅囉。到時啲股票跌,穿位,咪走囉。

唔知大家有無發覺,香港嘅投資者教育,往往會將啲嘢癲倒嚟講。

好似,如果你開間鋪頭,生意好好,你會唔會走去賣咗檔生意畀人先?梗係唔會知。

但如果你隻股票,生意好好,股價升咗,而你去睇啲財經節目,專家們可能就會話你知,隻股票風險漸高,應沽貨離場,轉去買啲落後嘅股票。

聽慣咗呢類投資建議,當然,大家可能會覺得無乜問題。但咁樣去投資,make sense嗎?

要可以把握到升市賺錢,首先,你要解毒,解咗喺你嘅投資理念入面,根深柢固嘅逆勢想法。唔好再係,喺升市就諗幾時跌,跌市就諗幾時升,做到的話,成件事就唔同。

然後,喺實行上有困難的話,就用期權幫你。

期權,有方法可以令你喺每一次買賣時,贏面都得到提升。贏嘅機會高啲,心理壓力細啲,會令你更容易做到改變。

但其實呢篇嘢,我除咗係寫畀嗰位朋友睇之外,我都係寫緊畀自己睇。好地地,順勢而行,過去兩年都keep住賺錢。一逆勢玩油,就輸。

做返順勢,又贏過。

今日啲網購股繼續強到癲。噚日大升完嗰兩隻股,今日都仲繼續升,講真,揸住佢哋,有咩好驚?只要到時轉跌,你識走,肯走,止賺,就唔會有問題。

今日忙足成日,又教完書,有啲攰,會早啲休息,但總之記住「順勢而行」。聽日再講。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室