【莫家強】我所講嘅期權方法

昨晚,我已經開始補貨,用嘅係我所講嘅期權方法。

呢個方法,如果揀得中隻上升股票,當然會有錢賺。但就算隻股票唔升,甚至係微跌,我都仍然會有利潤。總之,唔係大跌就可以喇。

而睇到美股嘅表現,基本上只要你唔好自己走去買啲最受疫情打擊嘅弱勢股,並做好分散投資,大跌嘅機會我睇唔高。

雞翼,好靚。配合埋期權去玩,贏面更高。仲有好多股票,都升得好靚。我講過,有三個行業我特別睇好。1) 雲端;2) 醫療相關;3) 網購。

網購,唔一定要係有貨品銷售嘅網店,例如NFLX,都係包括喺一啲網購指數入面,近日都升得好靚。

揀網購股,記住,唔係純粹去揀啲有網購概股票,因為呢個行業有一個特性,係winners-take-all,贏家會贏到好盡,輸家係可以少少利潤都分唔到,所以一定要識揀強勢股。

另外,唔識揀股,可以玩指數。

但同樣地,要揀強勢指數。美股三大指數,以納指最強、道指最弱。

納指嘅原因,係佢嗰五隻最大權重股,表現都好好。道指弱嘅原因,係佢嘅成份股好多都係一啲舊經濟兼受疫情打擊嘅股票,唔少表現都好差。

例如廸廸尼,唔係掛,仲買?

有朋友問,美國經濟會唔會衰退?我會覺得,大家可以轉一轉個諗法。

今次唔係衰退,係「冰河時期」,係物競天擇,係適者生存。

恐龍將會絕種,但同時亦會有好多其他嘅物種,會因此而得到更大嘅生存空間。

大家會唔會見到,好多股份已經破頂?

唔識揀股,就玩納指ETF。識揀股,就揀強勢股,配合期權,贏面更高。今晚美股開市後,我哋再講。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室