【莫家強】期權有一種特性

先講一講我嘅期權部署。

期權有一種特性,就係佢唔係每一個位嘅開價,都係fair price。有一啲位嘅價格係會開高咗,有一啲位又會開低咗,識得點樣利用,就會有著數。

我喺期權賺到嘅回報,好多都係因為呢個特性而賺返嚟。

上星期嘅期權新手班,教咗一個方法,就係最簡單你可以運用呢個特性去take advantage。

呢度,我可以講多少少,報咗名嘅同學,你可以重睇嗰個部份,咁我相信你會對呢個方法嘅認識更深。
1) 只揀啲處於上升趨勢嘅優質股票嚟做。貴啲唔緊要,重點係隻股要優勢,同股價走勢要向上。
2) 做一個遠啲嘅Short Put。咩叫做遠啲,聽得明白嘅朋友,我會建議Delta係0.1至0.2。
3) 分散最少三隻股票投資,唔好做死一隻。
4) Short Put嘅數量,唔可以多於你能夠同願意接貨嘅金額。即係,隻股你本身又覺得優質,你又要接得起貨,又願意接,先至好做。
5) 再每隻買入少量股票。
唔使玩得大,亦唔好玩得大。呢個策略嘅好處,就係可以畀你喺無乜壓力之下,一直持股兼賺高息,贏面比就咁持有股票好好多,因為升又會贏,唔升唔跌又會贏,有秩序地緩慢下跌,只要你有少少技術,都會贏。總之,有跡象個市會失控地下跌嘅時候,你肯止盡早止蝕就已經可以。
另外,呢個策略本身一啲唔複雜,初學者都會好易上手。仲有一啲竅門,上堂再講。
至於揀股,其中一樣最穩膽嘅選擇,係QQQ,即納指ETF。三大指數,以納指最強,道指最弱,當你比較過啲持股,你就會明白點解。
今日,美股下跌嘅股票數目唔少,但一啲唔少雲端股,醫療相關股,加IBUY 同CLIX,都有得升。睇到呢個表現,我唔覺得個市似會失控下跌,用剛才提及嘅方法,我已經買咗少量貨,再升再加。
唔好再用道指做美股嘅指標喇。粗俗啲講,道指嘅成份股,其實都幾九唔搭八,同埋太多舊派股票,唔係好能夠反映美國嘅未來。

呢次疫情對經濟嘅最大影響,與其話係會帶來衰退,倒不如話係一次物競天擇嘅過程。

分別係,有好多唔適合嘅企業,唔係會賺少咗錢,而係會被完全毁滅。但同時間,唔係每一間企業都會遇到經營困難,唔少甚至會比疫情出現前賺得更多。

優勢嘅醫藥、雲端、網上消費股,都係受惠者。

雞翼已倒升,視像睇醫生又OK,唔怕波幅大,SHOP 同RNG又係好嘢,NFLX又正。

即係,只要你肯避開嗰啲老牌道指成份股,例如廸廸尼、通用汽車、Caterpillar,你會受到美國經濟衰退打撃嘅影響,就會細好多。
加埋期權,優勢會更大。最後,順勢而行,真係喺有跡象出現大調整時你肯走貨,咁就唔會有太大問題㗎喇。

今日講到呢度,聽日再講。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室