【莫家強】呢兩日,美股有市

呢兩日,美股有市,我會繼續同大家update市況。

首先,由板塊開始。

之前都講,有三大板塊,我自己睇好。第一,雲端。第二,網購。第三,醫療相關股。

雲端股,你可以揀兩隻巨企。Microsoft 個人持有,唔講太多。另一隻係Amazon。至於規模較細嘅科技股,好多都有雲端概念,加上股價走勢向上的話,都可以買。

網購股,可以買ETF。有兩隻大家可以留意。簡單啲就IBUY,鍾意佢嘅理念可以考慮CLIX。前者呢排強啲,後者拗返上去又可以買。但記住,網購股有一個特性,係winner-takes-all。

即係,例如以前超級市場再大,都唔能夠奪取哂樓下士多嘅生意。商場食店再旺,都唔能夠搶走所有樓下茶記嘅食客。因為,始終有個location因素。

但網購,係完全無呢樣嘢。

網購嘅贏家,係可以贏得好盡。而喺一個贏家可以贏盡嘅市場入面,謹記,唔好追落後。

當然,IBUY 同CLIX入面,都會有一啲較弱勢嘅股票。如果可以自己揀股的話,效果會更好。

至於醫療相關股嘅範疇,超闊。

最大路,可留意三個類別,肺炎藥、肺炎疫苗、肺炎病毒檢測,有從事緊呢啲工作嘅股票,值博率會高好多。

當然,醫療相關股仲有好多類別,有啲潛力股從事嘅業務,甚至可能係大家無諗過,有機會再同大家分享。

另外,雞翼同瑜伽衫,我都仲好鍾意。特別係前者,好似打咗針咁,破哂頂後升勢都無停下嚟嘅跡象。止賺位暫時100蚊,若升勢持續,會一路調高,唔破位要繼續揸。今晚開市後再講。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室