【莫家強】USO嘅前景,好差

USO嘅前景,好差,之後應該仲會再跌。有幾樣嘢,大家可以特別留意。

第一, 不同月份期油價格嘅差距有幾大?

現時嘅情況,係愈近到期日嘅期油,價格愈低。例如睇 NYMEX WTI Crude Oil futures,今年6月合約大概係$17;7月貴兩成幾,大概係$21.6;8月再貴約一成幾,大概係$24.3。

呢個差距,如果若喺短期內能夠收窄,對USO係好事。否則,每到轉倉時期,隻USO都好大件事。

USO比中銀原油寶好嘅地方,係佢有制定幾時幫期油合約轉倉。下月期油結算日係5月19號,但USO嘅轉倉日期係5月5號至8號,即係佢會喺結算日期早個幾星期就已經完成轉倉。以上資料,喺佢哋官網可以揾到。

由佢轉倉前幾日開始睇,如果即月期油同往後月份嘅期油價格差距愈大,USO喺轉倉期間遭受嘅資產減值影響就愈大。除非奇蹟地,去5月頭啲差價就大幅收窄,否則你預USO到時又會再大跌。

另外,USO 截至昨日收市,NAV為$2.43,但佢嘅股價就係$2.65,換言之,有啲水份嘅入面,溢價百份比去到9.05%。未來,如果有啲壞消息出現,呢個都係會令USO跌得更深嘅因素。

不過,要部署嘅朋友,要小心多樣嘢。下星期,USO將會8合1,啲期權會點樣安排,通告我覺得寫得唔夠詳盡,再睇網上唔同嘅source,好似唔同人嘅理解都有啲出入。

但如果以我現時嘅理解,現有嘅USO期權將會有個新編碼叫USO1,期權行使價會乘大8倍,但每月期權嘅代表股票就會變成1/8。而呢張USO1,將來未必會有太多人買賣,成交量可能會好少,開價可能會好差,有倉嘅朋友要留意返。

至於USO嘅前景,最大機會係被慢慢陰乾。由於佢會喺期油合約同期前個幾星期就完成轉倉,又未必會受期油合約負數影響到,但每月轉倉佢都有機會輸兩成以上嘅資產值,如情況喺未來仍無改善,隻USO輸到除牌,都未必會係太遠嘅事。

USO嘅睇法,寫到呢度。但呢個時期,無論你係睇邊個方向,所有油產品都一定係好難玩,同風險會好高,無十足把握,離場會係更好嘅選擇。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室