【莫家強】我啱啱全部平倉。淨計股票,有賺。

先講股市,我手頭上嘅Short Put,以及股票,我啱啱全部平倉。淨計股票,有賺。

清倉嘅原因有兩個。第一,個市轉差咗。第二,自己嘅心情有啲亂,要盡快恢復,對我嚟講,清倉抽離股市一陣,係最有效嘅方法。

但油產品,我仍然有倉位。

做呢行,自己嘅買賣贏輸,經過咁多年之後,當然都會有開心同唔開心,但情緒波伏唔會太大。但如果因為自己嘅投資建議,而有人輸錢,我係覺得仲難接受。

我嘅USO倉位,以百份比計都輸好多,因為我有兩注貨,第一注成本5.8,第二注成本3.6,大家都可以計到數。用咗期權技巧對沖,損失減近一半,加上有做好分散風險,輸五位數字。

事實上,知道理論上期油係會可以跌到負數,但無諗過佢會出現。亦知道會有contango問題,但無諗過每月期油嘅差價會可以去到呢個幅度。之前諗,同一個underlying,唔同月份嘅期貨,應該點都會同上同落。原來即月期貨跌到負數,下月期貨都大跌,但下年到期嘅期貨可以唔使跌,再下年嘅仲會有得升。

第一注跟我做Short Put嘅朋友,成本價大概都係5.8。我講過只要隻ETF一年跌幅少過四成,我都可以令大家唔輸。但呢次USO跌得太勁,我要同知道我做法而跟咗入市嘅朋友講聲唔好意思。

Short Put,做好風險管理,係唔會輸到破產,但今次USO股價跌成咁,我知道就算只係接少少貨,都會好傷。

USO仲會繼續跌。一日contango問題仲係咁嚴重,呢隻ETF係會一直有得跌。USO我做咗大量Debit Put Spread,啱啱仲再加咗淡倉。

而股市,亦都睇到風險增加咗,都要小心。

市況,我會繼續update大家。多謝留過言畀我嘅朋友。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室