大市有回調壓力
BATX今次未入到恒指，但可能下次得
阿里健康，平安好醫生
恒指季檢
國泰
呢個原因，美股今年一定升
大市有回調壓力
昨晚（星期二）美股大跌，港股今日（星期三）算係企得較硬，但其實之前反彈亦都少，變咗升又少過人，跌又少過人嘅格局。
不過後市係值得擔心下嘅。問我當然覺得今年見咗底，但你跌返一兩千點有幾出奇？最大問題係見到疫情開始反覆，之前好似控制得幾成功嘅地方，重啟經濟後就有啲疫情反彈。吉林又封城，韓國又反彈，美國嗰邊醫生亦都警告太早重啟會令疫情再失控。
再加上，之前都寫過下，黃金比例。美股標普指數就真係反彈到嗰啲位就冇力再上。同時間美國又好似想禁止聯邦退休金買中資股，種種蹟象表示，大市應該抖下氣。當然唔係叫你而家清倉，但預備定調整都好嘅
BATX今次未入到恒指，但可能下次得
美團（3690）升夠5%，創新高。小米（1810）都強，但有排未破頂。阿里巴巴（9988）繼續都係受壓。不過留意返，呢三隻都係同股不同權，所以星期五季檢唔會入到恒指。
但又同時間，恒指公司下星期一會公佈同股不同權入恒指嘅諮詢結果。我個人估計，應該唔會一刀切限死晒。可能係要耐啲，或者計個比重有折讓，或者要市值好大。但應該唔會完全唔畀入。所以可能星期一又有得玩
騰訊（700）走勢亦都差，創新高後倒跌。市後出咗業績，暫時望落算不錯，但近年呢隻股票績後走勢都未必只係睇個利潤得唔得，有時啲友會睇開支，有時又睇收入，十分難預測。你問我就估之後會跌，因為股價早已經炒上晒，除非個業績好到遠超預期先會升—而出嚟嘅業績只係算係去到上限。
阿里健康，平安好醫生
另一方面，亦見到阿里健康（241）又創新高，2600億市值了，大過長和長實，不過應該未入到恒指，同個free float 有關—有啲股票不流通。平安好醫生（1833）亦都十日新高，但未破頂。
恒指季檢
恒指星期五就季檢，所以今日寫定。其實對上幾次都冇變動，今次大家都估有變，值得留意。先講新成員，之前有估同股不同權嗰堆股票有得入，樓上已講咗應冇機會。新貴可能係百威（1876）同安踏（2020），見到兩隻股價都明顯砘跑出。至於被剔除嘅，好可能係太古（19）同旺旺（151），股價就照升的。
國泰
開關無期，航空股仲係好大鑊。當然你見中資嗰幾間好啲，因為有國內線。國泰（293）就成績飛機晒太陽，雖然根底比其他公司厚，但都未必頂到好耐—當然如果開返國內線已經好好多。
同時間，又見到卡塔爾航空話如果國泰要錢，佢地願意注資。但都唔使太認真，首先卡塔爾係咪無限錢都係疑問，有錢亦未必要益你，願意注資亦睇咩條件。而反正我估最後卡塔爾呢舊嘢都係返返中資手上。
呢個原因，美股今年一定升
係喎，明明仲跌緊。
之前GoBear嘅文都寫過。美股回報同總統選舉乎係有啲關係。以標普指數為例，由1928年計起，總統任期第一/第二/第三/第四年嘅回報，分別係5.7/4.5/12.8/5.7%。
四個都係正數，不出奇，美股近N年都係長升。比較特別係，你見第三年回報明顯係高過其他年份，升市百份比亦係最高，似乎唔係偶然？一個解釋係總統連任，之前一年就要諗盡方法谷高股市。舊年亦見到係咁
好啦，今年第四年，又如何？做乜又話升？就睇另一個圖。左邊半截，同我樓上講嘅同一回事，只係時間計1950年至而家，有少少唔同。但右邊先最具啟發性
右邊，佢將第四年，分做競續連任嘅總統，同埋唔連任嘅跛腳鴨。哈，果然分別好大。唔連任嘅，話知你死，升幅極低，平均得2.4%。
但競續連任嘅呢？勁咯，平均升幅有11.7%！更正嘅係，只要總統係競續連任，股市係必定升！冇試過跌。
當然，sample size並不太大，況且凡事總有第一次。不過，而家標普指數，年初至今，只係跌10%。要收復晒失地，好似唔係太難。留意Nasdaq 指數已經返返去年頭嘅位，死未。