=======附件========
=======附件========
美股好強。但的確，好多強勢股嘅股價都升咗上去，想買貨，都要等等時機。以下，會講講策略部署。
首先，講吓隻Insulet (PODD)。
呢隻股，上星期出完業績，表現唔錯，股價亦造好，我相信後市中線能夠再上嘅機會好大。然而，短線會否有調整，我唔肯定。以下想大家睇吓幅股票圖。
PODD，股價上星期剛破頂，而通常喺呢啲位置，沽壓都會較大。我有一招買入法，就係會吼住呢啲剛破頂嘅股票，如果佢喺短暫回落之後，股價再升，我就會買入。當然，亦有可能隻股票回都唔回就直上，所以現價亦可買入少許，待跌後回穩再加注。止蝕價暫可用$190.69。
喺TOP 100 列表入面，仲有幾隻股票我留意緊。
Five9 (FIVN)，上星期出完業績，優於預期，但由於管理層下調盈利展望，股價最初低開。然而，明顯地，佢嘅股價喺低位有強勁承接，股價好快就回升。呢啲喺壞消息入面仍能企穩上升嘅股票，我一向都會睇高一線，當然，風險唔會太低，但現價有一定值博率，唔跌穿$89.00可繼續睇好。
Freshpet (FRPT)會係另一隻我有期望嘅股票。短線股價走勢未算太過理想，但如其後有跡象發力向上，將可跟進。
Wingstop (WING)，揸住貨嘅要繼續揸，止賺位調高至$113.89。
Lululemon (LULU)，亦係我最近幾鍾意嘅股票，唔跌穿$213.97可繼續好。
至於唔喺TOP 100列表內，West Pharmaceutical Services (WST)，最近股價破頂，唔跌穿$185.09可繼續睇好。
Seattle Genetics (SGEN)，短期股價回調，可能造就買入機會。如企穩再上，可買入，會再跟進。
以上股票，如可配合期權作部署，可令股價短期上落嘅影響減低，贏面更高。我嘅做法，係會分散喺低位部署Short Put，先賺時間值，待這些股票嘅股價出現企穩再上嘅形態，就會買入正股。
亦講講三大指數。
道指，雖然都上升，就其實走勢以及升幅都不及其餘兩個指數。
S&P 500 與納指，最大5隻成份股都係Microsoft (MSFT)、Apple (AAPL)、Amazon (AMZN)、Alphabet (GOOG/GOOGL)、Facebook (FB)，而佢哋全部嘅走勢都好強。
兩者嘅分別，只係呢5隻股票嘅比重，喺S&P 500佔不足兩成，但喺納指就佔超過4成，造就納指表現較佳。
以現時走勢去睇，以上5隻巨企應該仍會有上升空間，我個人認為，如果想分散一啲風險，大家可以考慮真接投資於納指ETF (QQQ)。
最後，留意到喺急升市況後，用Ichimoku 作止賺止蝕位，距離會較遠。我亦留意到呢個情況，正著手編寫程式，希望可以做出更貼近市況，更實用嘅離場參考位置。喺程式編寫過程中，我喺推介股票時，都已加上止蝕位。如大家有持有其他股票，我未有提及，都歡迎電郵至 [email protected] 畀我，星期三我會再補上相關資訊。
最後，總括而言，美股走勢好靚，持有股票如繼續上升，應繼續持有。如出現突發情況，要走貨，我會再通知大家。想買貨嘅朋友，可等往後市況出現回調後企穩向上時入市。
星期三，講ETF嘅時候，再同大家分享更多值得留意嘅板塊。