港交所（388）—今天應該很高興
坡倫港之夢—十年河東 十年河西
In KS we trust, yet again
中銀租賃（2588）又有生意
另類收租股新意網（1686）
美國失業率將會升到你未見過嘅水平
正如上次專欄提到，凡事樂觀。或者睇少啲新聞都好。唔係咩？星期一都仲插成千點，又覺得中美打仗呀，我見我啲網友講到八國聯軍呀，全部向中國要賠錢呀咁。而的確你見美國亦相當唔友善，當時仲話加關稅。但結果幾日之後，又立即雙方收火，忽然間又有計傾。所以你太過短視只係睇住啲新聞炒上炒落，好難唔輸錢。
港交所（388）—今天應該很高興
講返，今日大市冇乜好講。比較值得講係港交所，李小加宣佈下年唔玩。有趣係股價連跌兩日，成交都幾大。今日仲係最弱藍籌。一個演繹係李小加做得唔錯，所以佢走市場反應負面。同之前麥當勞個CEO因為搞同事起身差不多，股價負面，因為佢之前真係做得好。而的確有時有啲CEO起身，股價即升，就係對個CEO最無情嘅批評：你收工大家開香檳慶祝！邊位？例如微軟之前個CEO，Steve Ballmer．
當然有個政治啲嘅講法，李小加雖則係大陸佬，但真係放過洋，私人機構做起，冇嗰種完全嘅大陸味，講嘢亦似乎幾啱香港人聽。但，係咪會換過新人嚟呢？換個更加大陸嘅大陸佬，斷送江山呢？就大家諗下了。
坡倫港之夢—十年河東 十年河西
另一方面，講乜都假。李小加做得好唔好？唔知。但股價唔呃人。呢篇係我會在明報出嘅稿，星期一你可以睇全文，但快講幾句。
首先你見到，李小加任內11年，港交所股價升81%，遠遠跑贏恒指三成左右嘅回報。如果年均就大約5.5%，計埋派息，唔太差，還可以—直到你同倫交所比。人地同期股價，升10倍。當然，即使我們錯，不比他們多，想搵更差嘅比，新加坡交易所，股價11年差不多係原地踏步嘅。
但如果唔同人地比，同自己比又如何？你見到，李小加年代前（可以叫做BC），港交所股價就升10倍，就到倫交所得七成。果然風水輪流轉
而股價長期唔呃人，港交所在李小加年代，升81%，純利就升86%，好均真。反而係BC年代，港交所純利升750%。倫交所呢？掉轉，近十年先嚟料。
原因？我都未必知。但倫交所食國際大茶飯，基本上唔多受政府監管，有錢就賺。港交所呢？都係私人公司，但始終唔同。加上獨市生意冇競爭，但又唔係完全自由喎。
In KS we trust, yet again
投資嘅嘢根本就好簡單，有啲人往績極好，仲要自己有skin in the game，自己錢買自己公司，咁你都唔跟？梗係講李嘉誠，又增持了。
中銀租賃（2588）又有生意
今次到匈牙利公司，Wizz Air．今次金額唔太大，6隻 Air Bus A321neo 啫。純粹畀你睇到公司業務幾咁多元化，股價反應正面的。但好可能唔止係因為呢單deal，仲因為中美關係冇咁緊張。雖然我估真係有乜事都唔會咁快搞到2588呢類公司。不過，歐美航空公司，拎政府同納稅人嘅錢，去交租畀中國（其實係新加坡）公司，聽落幾適合煽動民粹的。
另類收租股新意網（1686）
Facebook Page 出咗個Post講新意網，不再重覆。想睇背景資料嘅，睇我舊同事嘅報告，寫得相當好，勁過我（你有幾可見我讚人？）。其實幾句講完，母公司新地實力厚，而data center 行業有一定入場門檻。仲有供應不足，而需求一路升。最重要係，成個行業得呢隻股票獨立上市—當然有人會買美股的。
美國失業率將會升到你未見過嘅水平
今晚（星期五）美國會公佈最新失業率，應該會去到16%，甚至更高。但對市場應唔會有乜大影響。之前都話，你見出親首次申領失業救濟人數，美股都仲要升。
另外，留意個首次申領失業救濟人數，同今日嘅失業率，未必計得啱。因為當中都有啲麻煩嘢，例如失業救濟未必實批，或者有啲人極速再就業之類。
倒不如留意下今晚八點鐘，Donald Trump講乜。