港交所可能係中美交惡贏家
本日內容
阿里巴巴搞乜鬼？
之前都寫過類似嘅東西。呢排美國又好港股又好，都仲係科技股強勢。騰訊（700）一路不錯，美團（3690）都強。但阿里巴巴（9988）特別差，十分奇怪。仲要呢排嘅沽空率好似幾高下。係今日股價先叫好返啲。
個人理解，就都係同中美交惡有關。騰訊同美團冇在美國上市，阿里巴巴有。早排瑞幸出事後，美國證監點名講中概股風險，幾不尋常。可能驚阿里巴巴畀人搞，甚至嚟緊有鑊爆？但我暫時係仲相信呢隻股票嘅。
港交所（388）可能係中美交惡贏家
甚麼加關稅呀，取消國債呀，病毒實驗室嘅口水噴咗一輪，市場好似只係驚咗一日。星期二已經冇事，今日（星期三）仲反彈。但，中美交惡應該係大方向，唔會點好轉，爭在係咩形式。而你見人民幣在岸價早段曾跌逾400點子，唔多唔少就係中國嘅應對。你加我關稅我就貶值。
承接樓上講中概股。阿里巴巴已回歸香港，日日幾十億成交，幫港交所印銀紙。之前就傳百度都可能會嚟香港上市，而家話網易都要「秘密」申請，唔知有乜秘密。
但當然呢啲舉動同中美交惡係有關的。呢啲新股回歸都會有利港交所。當然，其實百度網易之後，差不多最大嘅中概股都返晒嚟了。
凡事樂觀
凡事樂觀嘛。雖然係咁情況，但我依然唔建議大家賣貨。但，睇圖，錯過升市嘅後果，係好大的。20年，5000個交易日左右。你錯過十個，已經走晒樣。除非日日炒上炒落，或者借太多錢。否則，正路應該係stay in market．最多你就做60-40 股票／債券配置之類。但清晒倉嘅，多數都後悔。
仲有唔好忘記你嘅心理。萬一一個唔該5月升多一兩成（機會不大，但唔係冇可能，對不？），你仲敢唔敢追？十個有九個都覺得蝕，唔會敢再買。既然係咁，不如唔好搞咁多嘢。
舊圖，重貼。標普指數一個月升得10%後，之後會點？當然，股票長遠係升嘅。但總有人覺得今次唔同。但最緊要睇長遠啲。
新圖。歷年嘅熊市。你見到而家條軌蹟，係似2008/9呢段嘅。淺藍色係09嗰次大反彈，黑色係而家。嘩，如果真係跟足劇本？當然歷史唔會咁簡單重覆。
有人話係熊市反彈，其實真係唔好執著於點解跌20%就熊 19%就唔係。你睇今次「反彈」，美股標普指數低位已升31%。從來冇試過有「熊市反彈」有咁勁。31%，你估好少？你不如問下自己，就算牛市，你有冇執到31%？成副身家喎，唔係你買一皮嘢執返一個開（咁你買場波贏十倍都得添）
另一好圖。灰色線係歷嚟熊市嘅走勢，咁多次夾埋平均。啡色線係所謂嘅「大熊市」。今次係紅色。有話今次嘅反彈唔正常，脫離經濟基本因素云云。但又諗下，其實今次嘅調整一樣又深又急。你叫我解釋，就只係因為而家資訊流通快咗，又多咗程式買賣，發現價格嘅過程快咗好多。
亞馬遜呢個表必定令你痛心之極
去到呢刻，今年Amazon已經升22%。股災？咩股災？剛剛業績後其實跌過差不多10%，你又敢唔敢買？
發達幾咁易？唔係叫你買bitcoin喎，大名鼎鼎Amazon喎。當然事後講就易。
亦都證明，真金白銀買，同得個講字，爭好遠。就當我係彼德林治式嘅生活投資法。而家睇返，我第一次在Amazon買書，2007年吧。再早啲？我居然幫襯過「博學堂」，檔嘢被譽為「香港Amazon」，2000年已經執埋。但即係明顯2000年之前我已經聽過Amazon
拿，唔好當你97年買咁屈機，冇可能。當你02年科網爆煲後先買，06年照計都take 晒profit 打晒靶，08年更加冇可能唔走。
當然個問題係，你點知呢隻股票唔會變柯達Nokia？係唔知的。但更重要係，應該到10年前，FAANG（或FAAMG或其他變種），已經無人不識咁滯，Steve Jobs過身都差不多十年 – 但你估唔到，超級巨企，仲可以年年升兩三成（起碼）。
貴？Amazon幾時有平過？（有嘅，02年嗰時）。蝕錢？其實由頭到尾間公司都唔多賺錢。到有錢賺時已升咗唔知幾多倍。
當然仲有就係老掉牙嘅，複利的威利。一年升36%，廿年就1000倍了。唔好話1000倍，你渣過升10倍嘅股票未？就算渣到，你用咗你身家幾多買？
不過，係咪一定要好high tech？其實唔係。2004年，Domino Pizza 同 Google 一齊IPO。呢刻，Domino Pizza仲要跑贏。其實一路都係跑贏
版務
都話我地幾時都精益求精（其實係邊做邊補）。今次大家見到有internal link了，希望方便大家閱讀。笠定頭盔，如果有時我太晏交稿，Homeblogger同事在街度upload就可能冇咗呢個feature．如果有呢個問題當然係本人嘅錯。