今日內容
五窮，Sell in May，信耶？
重溫貿易戰：上次咩股跑出？
中銀航租（2588）商機無限，但因住樹大招風
珠江船務（560）買嘢又關新世界百貨中國（825）事？
版務
五窮，Sell in May，信耶？
港股有講「五窮六絶七翻身」，大家都知埃汾個人不太迷信呢啲嘢。而家仲講咩「
聖誕鐘買匯豐」嘅，除咗出賣年紀，亦都出賣知識水平。不過同樣地，鬼佬一樣
講sell in May and go away．信耶？三人成虎，既然中西方都咁講，又好似可
信啲？
信學院派講「效率市場」嘅，呢啲東西根本唔應該出現（埃汾碩士論文就大約做
呢啲嘢，流得很）。正如「一月效應」之類，如果1月例升嘅，咁個個12月就已經
買，變咗12月升咗，1月冇得升。（可以參考「意想不到的老虎」）。
同樣地，如果5月跌，咁4月就應該跌啦，係咪？
不過，理論還理論。睇下統計數據，似乎好粗疏，但真係見到近十年，新與市場股市，十次跌咗八次，相當反常下。特別係考慮到，股票多數係升嘅。另外仲見到，本幣債，同埋新興市場貨幣，都係一齊跌。呢個亦係新興市場特色：股／債／匯係一齊跌的。成熟市場，例如英國澳洲，你就見到係貨幣跌股市升。不能一本通書睇到老。
港股？情況都係差不多。固然2009年個5月大升夠頂幾年，但整體都係跌多輸少，次數係，幅度都係。
美股呢？都差不多。5月回報係比較差嘅。
今年嘅5月，開局港股就跌夠1000點，夠晒驚嚇。雖然，其實只係補返假期間外圍跌幅，同其他股市比香港唔係特別多。另外，上篇專欄都提過，4月環球股市表現極好，金融海嘯後最好。如果美股直頭係33年最好。咁去到呢啲位回調下，幾合理。
當然，導火線係侵侵似乎又再想開打貿易戰。理解嘅，佢民望落後，唯有放手一搏。反正中國係一個好好嘅箭靶，當然係分散注意力落去中國。預料嚟緊幾個月，又會回復到好似2018年貿易戰開打時咁。
重溫貿易戰：上次咩股跑出？
侵侵對於加關稅有異常嘅迷戀，有理由相信真係佢本人偏好，其他幕僚叫佢用其他招佢都唔聽。點都好，個好處係，應該有啲路捉。因為關稅唔係第一次加。
埃汾好快咁整理咗，貿易戰1.0開打時（18年3月22號），直到嗰年年底，咩股票跑出，咩股票跑輸。只睇恒指同國企指數成份果。可以看圖識字了。
大約都估到，就係啲本地公用股，同埋中資非出口股。好合邏輯，因為唔做外地生意，唔受你關稅影響。香港就係領展（823），中電（2），煤氣（3）之類。大陸就中移動（941），中電信（728）之類。全部都算係有啲息派下（除咗煤氣較差），公用股，防守性高。唔好忘記而家美國基本上係零息。不過最勁嘅，係
粵海投資（270）
中銀航租（2588）商機無限，但因住樹大招風
篇幅關係，不細講。都係本欄唔止提過一次嘅股票。今日股價係大跌嘅。固然畢菲特將佢嘅航空股持倉全部清晒，但我唔認為關2588事。反而更加似係因為貿易戰。
重申返個睇法：你見航空公司雖然好大件事，但政府擺明會救，唔見有大公司破產，吊住命即係要繼續交租。相反係好多公司想賣機或者取消原本嘅計劃。之前有國泰，之後有美國聯合。呢兩間都係幫襯2588。而家你見星航都打算做。關唔關2588事唔知，但留意2588前身咪就係新加坡飛機租賃，星航係舊股東，甚至2588其實係新加坡公司，幫襯返應該幾合理。
咁驚乜？就係驚樹大招風。
你可以諗下，你係外國政客，公帑吊住嘅公司，但畀租金外國公司，會唔會有人炒作？仲要係萬惡嘅中資。雖然2588係新加坡公司，亦都只係租飛機，冇乜咩好戰略技術。但，始終母公司係中國銀行，實會畀人覺得係cheap funding不公平。
睇好，但小心啲睇住啲故事發展。
珠江船務（560）買嘢又關新世界百貨中國（825）事？
呢單仲有趣，公司小朋友唔講我都未必留意。珠江船務以約2.3億元收購新渡輪60%股權。中資當然又係敏感，但斷估唔係會當洗頭艇咁運你返大陸。
咁有乜看點？正所謂拎住槌仔乜都見到係釘。新渡輪背後係邊個？唔知嘅睇公告就知，新創建（659）嘛
唔止一次寫過，新世界系似有後著，一定有嘢重組。所以你見呢排隻新世界百貨中國（825）又升，繼續等私有化。中咗就you heard it first from Ivan
版務
首先致歉，星期五嘅收費專欄好遲先出。但明顯係我問題，寫完唔記得畀 homeblogger同事，唔係佢地遲。大家見諒。第時如果好夜都未見文，其實可以PM我的。
另外，完全冇公共性，但埃汾今日收到收費專欄嘅分帳。當然一早都知到大約幾多，但都係十分感動的。
大家嘅支持係我寫落去嘅動力。多謝。