======下載附件=======
======下載附件=======
整體美股嘅大市，其實唔係十分好。能夠收復早前大跌時跌幅一半以上嘅股票，喺4258隻股票入面，只佔1170隻，比例上只佔27.5%。換言之，連一半跌幅都未收復到嘅股票，佔72.5%，屬大多數。
所以，唔好諗太多係咪牛市喇。反而，睇住有邊啲板塊同邊啲股票向上仲好。
今日，會分兩部份。第一部份，會用TOP 100列表同大家分析強勢股票。第二部份，係補充一啲係列表以外，都好有上升動力嘅股票。
從列表中，我會比較集中睇一啲喺過去一個月，以及過去一個星期都能夠上升嘅股票。而當中，表現最好嘅係Wingstop (WING)，一個月升幅為57.71%，其次為Shopify (SHOP)，一個月升幅為49.58%。
還有兩隻我認為值得大家留意嘅股票，包括Five (FIVN)，以及Freshpet (FRPT)，前者為客服雲端平台公司，好多大型企業都採用佢哋嘅服務；後者則從事寵物食品銷售，近年營業額迅速上升，產品亦有放於多個網上平台售賣，兩者同屬有潛質繼續發展嘅股票。
然而，四隻股票，近日升幅都較大。未有貨嘅朋友，可以趁下輪股價出現整固，再企穩再上後買入。
至於大股，Microsoft (MSFT)繼續係穩陣之選，Abbott (ABT)、MSCI (MSCI)都同屬強勢，要進一步提升贏面，可考慮先買入原本投資金額一半嘅股票，再喺現價一成以下部署Short Put買貨。
以於其餘強勢股票，大多都屬於以下三個類別：1) 醫療、藥物相關；2) 雲端；3) 網購。
近日升勢最誇張嘅，係Quidel (QDEL)。呢間公司，主要從事疾病診斷檢測，過去一週股價勁升24.78%，喺呢類股份繼續被熱炒之下，每次整固後再升，我係入市嘅機會，止蝕位為整固期間嘅低位，跌穿就走。
另外，Zynex Medical (ZYXI)近日表現都好好，過去一週股價亦升22.02%。呢隻股票，有兩樣嘢我好鍾意。第一，係佢嘅營業額近日急速上升。第二，佢好積極建構對病人嘅網上銷售同服務渠道。
不過，要留意呢隻股票嘅上落幅度頗大，現價約$15，止蝕價$12.02，有啲距離，我暫時未會建議買入，如有買入機會，往後再update。
至於醫療相關股，今日仲想大家留意多一隻Teledoc (TDOC)。呢隻股票，發展潛力好大，且已有頗穩陣嘅上升趨勢出現，惟現價頗高，我會建議等整固後再上先買入。
以上提及呢三個板塊，其實仲有唔少投資機會，會繼續同大家跟進。以下附上過去一個星期剛創一季新高股票，其中第五行嘅PTH，會係大家想揾邊啲醫療股值得留意嘅入門。星期三我會再詳細講，另外我亦想繼續講吓隻CLIX。
而如果大家睇中有邊啲大勢向上嘅強勢股，都可以電郵至 [email protected] 畀我，有潛質嘅，研究完我會再喺度同大家分享。