港股市況甚靜，實在冇乜好寫，不過當然市靜時可以思考其他東西。你見早兩日先又話負油價，然後又話連鎖反應呀，負油價又死好多頁岩氣公司呀，爛帳呀，銀行又爆煲呀乜七。每一次啲口水淡友都可以講到世界末日，但每日一太陽都係照常升起（又，小心，羅素雞嘅故事）。幾日之後已經冇人理呢啲嘢。故事人人識講，任何公司都爆煲都可以講到金融危機。但關鍵係乜？係量化。呢啲就係識嘢嘅人（各位讀者），同唔識嘢嘅人最大分別。
你有幾多呢啲頁岩氣公司？我問啲友，叫佢講幾間嚟聽，多數都講唔出名。咁可以有幾大件事？講得出名嘅，我再問佢有幾多市值，借到銀行幾錢，銀行又有幾多貸款係同呢啲嘢相關？立即收皮。
講真，要驚嘅，不如驚航空公司，酒店之類—不過明顯政府會吊住條命。呢啲公司就真係唔救會破產。
另外，少講政治，但八掛一句。星期四晚十分有趣，千夫所指嘅世衞，忽然間出咗份（來自中國嘅）報告，指Remdesivir（瑞德西韋）醫死人，完全失敗。結果Gilead股價急跌，美股都急回—但之後世衞話唔小心登錯咗。成件事十分詭異。
阿里巴巴好弱
阿里巴巴（9988）今日（星期五）出奇地弱勢，跌3%，成交相當大，沽空都幾多。好可能係同美國證監主席出嚟警告少沾手中概股有關。咁樣講都幾唔尋常，加埋之前瑞幸呀之類嘅問題。有冇政治動機自己估，但我個人估點搞都唔會搞到去阿里巴巴。
Interactive Brokers，中國銀行，點解要識計數
講開要量化，呢個係好例子。負油價，除咗買期油ETF嘅出晒事外，仲有好多其他傷亡。呢啲先真係似「雷曼2.0」。香港都好多人用嘅Interactive Brokers （IB），同埋中國銀行（中行，3988），不約而同爆出事。
其實佢地自己應該唔坐盤，只係啲客出事。咁你話，客出事關我乜事？但，如果個客走咗數，唔補孖展，咁就可能間行自己上身了。
IB呢，講緊7億港紙，仲有人whatsapp話收得皮。中行仲勁，一度傳話輸300億人仔！嘩。問題係，300億，對你嚟講就好多，對我嚟講都好多。但對中行嚟講呢？股價話咗你知。
首先，一般真實損失都唔會有咁多，你總唔會所有戶都走晒數。況且，中行嘅數字後來都話係誇大。但即管就當IB輸7億港紙，中行輸300億人仔。咁有幾大鑊？邊個大鑊啲？
IB，講緊14.5億美金股本，大約110億港紙。7億，冇咗6%股本，甘甘地，但還可以。所以你見插9%，即係痛，打擊，但唔係災難級。
中行呢？勁咯，近18500億股本。人仔。300億？2%，拮一下咁（況且最後話根本損失只係幾億）。你見股價都跌少少，但真係唔覺咩回事。
所以你口講梗係可以講到客戶走佬然後銀行爆煲，但，冇量化嘅，只係廢話。
銀行體系結餘係咁升
冇呃你，真係兩日多咗成100億，因為港紙太強，去到7.75，金管局入市沽港紙出嚟。而仲未計減發Exchange fund bills．計埋就睇下面嘅圖。
寫過N次，不再重覆。但純係畀你睇到，真係有錢到，結餘真係升了，而拆息又真係跌緊。咁就可以睇埋下一單嘢：
樓價反彈到兩個月新高
係咪巧合？可能係吧，照計唔係因為拆息跌，或銀行體系結餘多咗，就多人買樓。但真係見到冇乜人急住要賣（傳說中嘅多人失業會賣樓供唔起樓唔會買樓呢？），而承接力亦都勁。咁低拆息，至少係令人覺得冇咗後顧之憂嘅。
版務（重貼）
埃汾星期六開始，放假九天（其實下星期拎三日補假啫）。當然專欄會繼續。另外，收到讀者意見，可能抽獎都係只換讀者，等我得閒啲再搞。
同時，都見到大家有在homeblogger留言，我覺得好事，啲留言嘅質素都比較高。大家同時都可以在Facebook Page PM我，其實有咩故事有咩想我寫都可以講。另外，其實都歡迎直接whatsapp 本人，9809 8494，都半公開，冇乜所謂。