今日多圖，亦都多字
昨晚（星期二），美股亮點當然係寶潔P&G，同埋強生（Johnson & Johnson）嘅業績，你睇股價強到不得了，差不多返返年頭水平。
更搞笑嘅係瑞典廁紙股，盈利升七成。我今朝正想貼，就見維達（3331）出埋盈喜。所以你見恒安（1044）股價今年強得有理。
其實以上種種，你大約都估到。當然有埋數據更好，睇到消費者嘅習慣點改變（BTW，因為機票跌，所以美國嘅消費物價指數下跌—但夠晒搞笑，因為根本都用唔到，平咗關我鬼事）
而我諗到嘅，就係美股卡夫。之前公司相當濕滯，但你見今年股價唔算太差，但又落後P&G同埋Johnson & Johnson唔少。應該疫情係有助銷售的。
In KS We Trust, again
不用多講，睇表。叫咗你架啦，叫咗幾次架啦。如果呢個世界仲有乜係好穩陣嘅，就係跟李嘉誠買。佢都一把年紀，都唔知仲有冇下次熊市有跟佢買。
大陸醫療科技股
呢輪炒阿里巴巴（9988）同騰訊（700）就不用講。但更強勢嘅係平安好醫生（1833）同阿里健康（241）。信momentum就一定要睇。你睇隻平安好醫生，低位升返7成咁滯，差不多紅底股，市值過1000億。同樣地，阿里健康直頭2000億，年初至今升8成，去到長和（1）銀娛（27）咁大！
坦白講，你問我，我係唔多信的。不過我之前都睇錯隻美團（3690）。所以大家自己睇路啦下。
基金經理個個渣現水，就梗係入市訊號
基本上都不用多解，不過留意，你睇到都已經4月中。所以短炒嘅冇乜用。但的確見到基金經理配置股票最多時，市場就危險。唔一定係佢地燈（但亦可能係）
今次熊市好反常
今次熊市，同史上所有咁多次熊市比。綠色點係冇衰退嘅熊市，綠方格係呢堆冇衰退熊市嘅平均。紅色點係有衰退嘅熊市，紅色方格係呢堆有衰退熊市嘅平均。黑色點係所有熊市嘅平均，而黑色方格係而家呢個熊市—而可以肯定經濟會衰退—係咪有啲唔妥？
當然，有人圈咗呢個圖畀咗答案：關鍵就係，聯儲局。早年嘅熊市或衰退，聯儲局係收緊銀根嘅。
美股好少跌15%
畀多個圖你壯膽，「美股好少跌超過15%」。而家年初至今就18%。呢個應該係過去70年嘅數字，跌到超過15%，得4次。「所以而家入市都OK」。當然啦，中地雷嘅嘢，一次就夠死。呢啲圖其實都係呃神騙鬼，呃客多。唔係冇用，但不能太倚賴。唔想一次中地雷就死？就睇下一段。
記住，千其唔好亂借錢
股市無關。而埃汾近一兩年對樓市嘅睇法都係好簡單：自住都係要買，投資/炒就免了。希望呢位苦主你唔識，但重點當然係因為佢負債重，個市一回，最先死就呢啲人，亦都係殺晒呢啲友個市先定。自住樓當然都係要做按揭，等到呼丕先買都唔知去到幾時（埃汾當年都等到可以呼丕先買—但照做九成按揭）。但額外嘅槓杆，就不必了。
同埋，保住你份工。