埃汾今日（星期三）夜晚有事幹，所以提早少少出文。主要係講昨日（星期二）市況，反正今日冇乜太特別嘅嘢
繼續炒疫情見曙光
兩個世界。美股嘅，計道指的話，由低位已經反彈兩成幾。如果只係拘泥於跌兩成就熊市升兩成就牛市，咁你一個月已經見到又熊又牛，即係多餘。恒指跌得少，彈得亦較少。
想講嘅係幾個一路以嚟嘅信念，水清則無魚，股票炒將來，同埋股市帶動返新聞。你話有乜利消息？其實好似冇乜。美國嘅就業數據極之恐怖，嚟緊啲經濟數字好難睇。但有乜所謂？一早price in 晒
真係要講，就係可能疫情見底，亦係上一期講嘅嘢。或者睇返上面兩個圖，兩大重災區都見回落，而歐洲亦都開始諗住慢慢解封—會唔會快咗啲？唔知。如果再爆發嘅，可能大市又插過。
乜指標都見晒就冇戲唱啦
同時見，你見講左幾篇文嘅指標，開始見到晒。美金回落啦，難得人民幣又穩。拆息又跌啦，講返，到你所有呢啲指標出晒，大市低位已經升返幾千點啦。
聯儲局研究買股票？
唔止，你見前聯儲局主席耶倫出嚟話應該研究容許聯儲局買股票添，正係我之前大膽講嘅當。當然，佢認為而家唔需要住，大家都見市況穩定咗，唔需要住。但佢意思明顯係可以做定準備，萬一再有不穩，聯儲局仲有工具。話時話，呢排只見佢同伯南克成日出嚟講嘢，但一般前朝官員唔應該咁多嘢講的。反而鮑威爾好似少出聲？定我留意唔到？
QE4就當然要勁過之前版本
另一樣嘢，唔知係咪有關，但上篇專欄講過，聯儲局一秒鐘印緊100萬美金。應該開始見效。以下係另一好圖，畀你睇下今次QE（第4代）同以前1，2，3代比較如何。「咁就當然係新版勁好多」。然後剛剛先話資產負債表突破5萬億，6萬億嘛。出面估，好可能去到9萬億先諗收手。諗起非行家朋友嘅一句：就算聽日火星人打地球，我地應對嘅方法都應該係印錢
QE會唔會益到香港樓市？一半半
半off topic講（大家有興趣我可以講多啲），朋友傳嚟嘅廣告，屯門樓盤（埃汾住屯門）。265萬。固然呢層樓同我咁上下老，但，好似計計下，30萬可以入到場。而埃汾自住樓固然自己名，但老婆仲有首置Quota，「唔用好似好嘥」。不過老婆其實專業過我，見到尺價同年頭唔係爭太遠，完全唔算劈得勁。所以再諗。雖然埃汾好似明明話香港樓而家，自住可以，投資冇乜必要。但「首置Quota唔用好似好嘥」，無論如何，QE不代表股市實升，你見港股之前都唔係十分受惠於QE，但啲錢總會走去某啲地方。可能係美股，可能係樓，甚至係金。最差就係持有現金。
唔好做槓杆，買自住樓除外
亦都同你講埋理財。埃汾苦口婆心叫大家，保住份工，唔好借錢。固然贏錢時叻仔，但大家唔係一窮二白偷渡落嚟（唔係架可？），何必咁樣去搏。埃汾恥笑「九層塔借上借買匯控」嘅文十分紅，不在呢度重覆。大家唔好犯呢啲錯誤。你見金融危機都係咁，就咁資產價格跌唔死人，但槓杆就死人了。而差不多每次金融危機都去一去槓杆，殺晒啲借錢嘅人先。
千萬千萬唔好股災去轉強積金
另一常見嘅理財錯誤，可能你都做過，就係，「轉強積金」。埃汾大大話話都打咗16年工（呼），但我強積金啲比例，從來都冇變過，100%股票，然後各個地區都有。就係咁簡單。之前見市差走去轉返咩穩定基金嘅，咪就係平價時沽晒股票出去咯，然後升返上嚟又唔知追唔追好。你話借咗錢嘅被迫低位斬就冇計，本身做金融嘅，成日對住市，判斷受影響亦冇計。但如果係普通人嘅，使乜咁樣因為大跌而同人地人踩人？每次都講到世界末日，但結果呢？
信報畢老林昨日（星期二）篇文極好（要科水），入面個圖亦好簡單話你知：我當你月供股票嘅，為你帶來最多回報，就梗係2008嗰幾個月啦。強積金亦都變相係月供股票，你根本可以享受呢個平均成本法。自己走去手痕嘅，就冇得怪人了。
In KS we trust, as always
個股方面，唔再不停重覆。但，李嘉誠父子又再增持長和（1）長實（1113）啦。信匯控嘅，不如信李嘉誠啦，佢嘅往績真係近乎完美，特別係買自己公司。最多潛水一陣，你有幾可見佢會大輸？我記憶中，以前長實和黃年代，一樣都係冇。
繼續睇好長江基建
除咗長和長實外，埃汾愛股長江基建（1038）一樣強。派息算係做到（咁多年都加到派息！），美金弱，澳紙英鎊升返，仲有係公用股。中電（2）甚至四連升，升咗成10%。真係唔使搞到好複雜又做OD LINE又借錢買匯控拎完啲息又借上借咁。
恒生跑輸中銀香港
有趣係，恒生（11）唔跟喎，呢期開始跑輸中銀（2388）。原因不明，但兩隻嘅派息都未必太可靠。恒生，會唔會畀阿媽匯控甚至英國限派息？可能得？恒生亦係昨日（星期二）50隻成份股入面唯一一隻跌嘅。
版務
正如埃汾所講，每日精益求精，希望大家滿意改咗少少版面後，而家嘅版本。暫時訂閱數字都不錯，但可以的話叫多啲朋友更好。最好有一日去到同我正職差不多收入，我就可能辭埋份工全職寫，到時就更勁
另外，作為一個打工仔，我當然知嚟緊星期五，同下星期一都放假。但我應該係會照寫的，除非home blogger 冇人upload．即係寫我必定照寫，但你有機會星期二先見到。