真係唔係講笑的，送兩張圖畀大家，好可能見過，我亦寫過。兩張一樣嘅嘢，聯儲局資產負債表，第一張係2003-2020，第二張係2020年初至今。早排先寫過去到5萬億，話咁快已經6萬億嚟緊頭。
（聯儲局資產負債表，2003-2020）
（聯儲局資產負債表，2003-2020）
唔列式了，但你睇第二張圖，計下數，過去一星期，聯儲局真係一秒鐘印緊100萬美金！大家睇路了。當然不代表美股或港股實升，但啲錢總會走去某啲位。記住stay invested
我唯一想知，點解計出嚟真係咁啱好似係1秒1百萬？個印鈔機嘅負荷？但大家都知唔係真係印出嚟，係電腦之嘛，咁係個程式上限？定點？「下次點算」？
另外，大家都睇咗美國慘不忍睹嘅就業數據，首次申領失業救濟人數，非農職位等等。我想講嘅係，而家事後睇返，當中聯儲局忽然大減息，人人狂批，包括我。事後睇返，係咪聯儲局有先見之明？
疫情回落
無論如何，股市應該係見咗底了。至少港股係，美股都……應該係。除咗多得美國QE開水後，疫情似乎開始真係有啲轉機，亦係好消息。點見到轉機？見到歐洲四個重災區，意西英法，確診死亡之類都開始見頂。美國方面，至少紐約開始見到死亡數字跌。股市當然唔會等完全過去先郁。
In KS We Trust
本欄讀者當然知道埃汾過去幾日都勁推長和系，今日就到隻長和（1）發威。係恒指成份股第二大升幅（最勁嗰隻陣間講），升6%。仲要係貢獻恒指點數第四多—以長和佔比咁細嚟講，好勁的了。貢獻最多當然照舊係嗰三大重磅，冇乜特別。
比較特別嘅係，你見到50隻恒指成份股，係全升嘅。似乎係好嘅先兆？當然悲觀嘅覺得雞犬皆升，隨你。
升得最多嗰隻成份股？應該不在個表度。咁估到應該係唔大嘅公司（升最多貢獻都唔入頭十六）。答案係，太古（19）。應該係3月30日嘅專欄文章提過，呢隻嘢極大折讓。但你話係咪私有化？未必，未咁快。當中涉及太複雜嘅嘢。一日國泰（293）同國航（753）啲互控未搞掂，都好難就咁私有化太古—當然進取啲諗，不如一鑊過做晒所有嘢？即係國航買起國泰，然後英國佬施懷雅家族再私有化埋太古。世紀大刁，堪比長和系重組。冇咁易，但又係提個方向畀大家諗。
香港電視（1137），高息股，電訊股
呢個就幾篇都提過，不再一一重覆。市升梗係容易認叻，香港電視呢啲繼續有得玩，都係睇會突破高位。應該冇咁快又配股掛？
但高息股同電訊股比較值得一講再講。匯控減派息，一班小股東同議員等等去維權，依我睇嚟係浪費時間。我自己講過嘅不再重覆，可以睇下David Webb講嘅嘢。
而股票永遠係，睇將來。一大班匯控信徒，最後死心接受現實後，會點？呢個「退休恩物」嘅位，總要有人填。上星期兩篇專欄寫過下，你見成堆可靠高息股都跑出晒。記住，要可靠。唔好開個報價機睇下邊隻最高息就算（咁未免太容易），派唔派到先係重點。寧願要（相對）穩陣嘅5厘息，唔好要派唔到嘅8厘。
你睇今日跑出嘅，聯通（762），中電信（728），數碼通（315），和電（315）。應該唔止係電訊嘅原因，仲有係，派得到嘅高息。留意愛股長江基建（1038）同香港電訊（6823）都仲有力。
銀行股．．．．．．
最後預告少少，呢排其實提銀行股都個個擰頭，我都係。但，世事無絶對。首先今次疫情，銀行絶對唔係重災區，銀行系統相當穩定。另外，過去咁多年，都見到低息環境傷害銀行，息差受壓。呢個唔似會轉變，但另一角度睇，息減到咁，再收窄嘅空間其實好細。而有個比較contrarian嘅講法，係估之後長債債息會上（並非不可能），因為各國政府財政狀況惡化—如果係咁，銀行股就逃出生天了。絶對唔係叫你而家買，畢竟呢個故事要好多關中晒先有，而家仲有好多更抵嘅股票。但，到其他嘢升得七七八八，就可以諗了。當然其實我係指香港或美國嘅銀行股，中資永遠係另一種玩法。嚟緊我有篇在GoBear出嘅文會講呢樣嘢
版務
盡量去精益求精，今日大家見到，啲link全部嵌返入字入面，應該大家會比較易睇易用，亦都慳到我時間。
另外，在homeblogger文章上，有留言區的。只有訂戶先可以留言，我會盡量解答，但只限文章相關嘅問題。
最後，建議大家可以自己save低啲舊文，方便易睇。我未必次次會記得返邊篇文講過邊隻股票咁。