匯控已死，維基當立
呢篇亦係我星期一明報專欄嘅題，當然有機會畀編輯改。內容同呢篇唔多同，而大家當然係比其他人更先睇到。今日因為網速技術問題，會多字少圖少link，抱歉。但其實上我Facebook Page （http://bit.ly/2RqXfYv）會搵得返大部份。
先講嘅，當然係王維基。早早同呢度讀者提過HKTV Mall （1137），叫大家留意4月頭出嘅3月數據。結果話咁快星期四晚就出咗。詳細分析在Facebook 有（https://bit.ly/39Lrt0t）
簡單嘅，睇樓上個圖。其實我最初見到比較謹慎，按年當然靚仔，但按月比增長唔算太勁。但投資者似乎都收貨，股價逆市升4%去到1個月高位，算對大家有交代啦？現價依然吸引，相信會係破頂。最搞笑係連CEC阿信屋（759）都炒埋上嚟，升三成咁滯。其實完全不能比較，但CEC得幾億市值，稍為有消息就爆上。
但我今日想講嘅，其實係匯控（5）減派息嘅後續。其實星期三專欄已寫過，後來我仲寫咗篇入門文，講咩係除淨，唔係好知嘅可以睇（https://bit.ly/3bL7Vuk）
咁仲有乜好講？記住一雞死一雞鳴。匯控死咗，咁咩公司會冒起？留意今次匯控死嘅，係作為「穩陣退休收息股」嘅地位。所以我唔係研究業務上有咩公司會取代佢（其實環球銀行都係冇乜運行）
你睇今日（星期五）恒指雖然跌，但有一堆公司跑出咗，唔同行業，但共通點都係：防守股，同埋真—高息股。咩係假高息股？業務唔穩陣嘅，有機會減派息嘅。所以你見今日內銀並唔係特別強。
首先係中銀（2388），連升幾日，但本人麻麻地，有嘅可持有，冇嘅唔使買。本地銀行環境唔見得好。
我心中嘅真命真子，其實係香港電訊（6823），簡簡單單，電話費上網費總要交。況且經過今次大隔離後，大家更加知道上網不能或缺。諗下如果你隔離十四日而斷咗網（例如用有線嘅），會有乜後果？照計公司有加價空間。
連帶連數碼通（315）和電（215）都炒起埋。關唔閞5G事？可能，但暫時都係揀香港電訊（6823）。更過癮嘅係，連中資電訊三寶都郁埋，中移動（941），聯通（762），中電信（728）全數炒起。但明顯地只係因為防守性，加價空間冇乜嘅，3G上4G時已見過，唔似香港咁自由加。
吾友甚至鍾意電盈（8），記得舊文我寫過（https://bit.ly/2w7eoAy）。8號仔咪就係6823再加電視。咁我明明寫過電視業務係蝕唔少錢嘅。但重新諗下又覺得朋友有啲道理—係蝕錢，但一早知道啦，what if 佢一路改善？咁改善個原因係乜？又係嗰句，一雞死一雞鳴，就係搶晒無線（511）啲客。另外留意，少講政治。但大家都知，商家要食兩家茶禮唔易，太親中會瀨嘢，太反中又會。咁有咩人可以兩面行到？正係唔肯減租但大家都當佢良心嘅李嘉誠。同樣地，你見Now台Viu台，其實食到兩邊茶禮的。呢份功力唔易，抵李生發。
其他公用股嘅，電能（6）中電（2）都強，甚至地鐵（66）都升。可見市場開始追返呢啲防守股收息股。但除咗6823外，至鍾意都係長江基建（1038）。以前寫過。
國際方面，快講一樣嘢。除咗有負利率負債息外，而家仲有負油價（https://bloom.bg/2UGHa4B）。但嚴格嚟講有啲取巧，只係某啲偏門嘅產品，同埋並冇真係成交。但都夠驚。有趣嘅係，出現完呢樣嘢冇耐，就見到油價大反跌。我以為係物極必反，市場有痴線事件，有人將佢合理化，後來就會轉變。正如2016嗰期嘅負債息，大家都搵理由去解釋，話新常態，然後見到債價大跌，帶嚟2017嘅股市大升。